இந்த ஒப்பந்தத்தின் கீழ் சவுதி அரேபியா அணு ஆயுதக் கவசத்தைப் பெறாது. இது பாகிஸ்தானுக்கு மட்டுமே. வேறு எந்த நாட்டிற்கும் அணு ஆயுதங்களை நாங்கள் வழங்க முடியாது. பாகிஸ்தான் மீதான தாக்குதல்களைத் தடுக்க அணு ஆயுதங்கள் உருவாக்கப்பட்டன.
பாகிஸ்தானின் பாதுகாப்பு அமைச்சர் கவாஜா ஆசிப் சவுதி பாதுகாப்பு ஒப்பந்தத்தை நிராகரித்துள்ளார். இஸ்லாமாபாத்தில் செய்தியாளர்களிடம் பேசிய கவாஜா, ‘‘இந்த ஒப்பந்தத்தின் கீழ் சவுதி அரேபியா அணு ஆயுதக் கவசத்தைப் பெறாது. இது பாகிஸ்தானுக்கு மட்டுமே. வேறு எந்த நாட்டிற்கும் அணு ஆயுதங்களை நாங்கள் வழங்க முடியாது. பாகிஸ்தான் மீதான தாக்குதல்களைத் தடுக்க அணு ஆயுதங்கள் உருவாக்கப்பட்டன. நமது இறையாண்மையைப் பாதுகாக்க அவற்றைப் பயன்படுத்துவோம். அணு ஆயுதங்கள் தொடர்பாக பாகிஸ்தான் எந்த ஒப்பந்தத்தையும் செய்யாது. சவுதி ஒப்பந்தம் அனைவருக்கும் முன்னால் உள்ளது’’ எனத் தெரிவித்துள்ளார்.
நேற்று ரியாத்தில், பாகிஸ்தான் பிரதமர் ஷாபாஸ் ஷெரீப், ராணுவத் தலைவர் அசிம் முனீர் ஆகியோர் சவுதி பட்டத்து இளவரசர் முகமது பின் சல்மான், சவுதி பாதுகாப்பு அமைச்சர் காலித் பின் சல்மான் ஆகியோருடன் ஒரு ஒப்பந்தத்தில் கையெழுத்திட்டனர். இந்த ஒப்பந்தம் பாதுகாப்பு தொடர்பானது.
இதன்படி, இரு நாடுகளின் எந்த ஒரு நாடு மீதும் தாக்குதல் நடந்தால், அது இரு நாடுகளுக்கும் எதிராகக் கருதப்படும். பாகிஸ்தானும், சவுதி அரேபியாவும் இணைந்து வெளிப்புற நெருக்கடிகளை எதிர்த்துப் போராடுவதாக அறிவித்தன. இது பாகிஸ்தான், சவுதி அரேபியாவிற்கு அணு ஆயுதங்களை வாடகைக்கு எடுத்துள்ளதாக ஊகங்களுக்கு வழிவகுத்தது.
தற்போது, மத்திய கிழக்கில் அணு ஆயுதக் கேடயத்தைக் கொண்ட ஒரே நாடு இஸ்ரேல் மட்டுமே. இஸ்ரேல் 90 க்கும் மேற்பட்ட அணு ஆயுதங்களைக் கொண்டுள்ளது. ஆனாலும், இஸ்ரேல் இதை ஒருபோதும் அதிகாரப்பூர்வமாக அறிவிக்கவில்லை.
இந்த ஒப்பந்தத்தின் வரைவு அனைவருடனும் பகிர்ந்து கொள்ளப்பட்டுள்ளதாக கூறியுள்ள கவாஜா, சவுதி அரேபியாவைத் தவிர, மற்ற வளைகுடா நாடுகளுடனும் நாங்கள் பேசுவோம். எங்களுடன் கூட்டாக சேர விரும்பும் எந்த நாடும் இதில் சேர்க்கப்படும். அனைத்து முஸ்லிம் நாடுகளையும் ஒன்றிணைப்பதே எங்கள் குறிக்கோள்’’ எனத் தெரிவித்துள்ளார்.
சவுதி அரேபியாவுடன், பாகிஸ்தான் ஒப்பந்தப் பேச்சுவார்த்தை நடத்திய விதம் ஈரான் தொடர்பான சந்தேகத்தை ஆழப்படுத்தியுள்ளது. சவுதி அரேபியாவிற்கும், ஈரானுக்கும் இடையே திரை மறைவில் ஒரு போர் தொடர்கிறது. பாகிஸ்தான், ஈரானின் அண்டை நாடு. ஈரான் இந்த ஒப்பந்தம் குறித்து கருத்து தெரிவிக்கவில்லை.
பாகிஸ்தானின் தகவல் மற்றும் ஒளிபரப்பு அமைச்சர் தரார் கூறுகையில், ‘‘இந்த ஒப்பந்தம் இரண்டு புனித மசூதிகளைப் பாதுகாப்பதற்காகவே செய்யப்பட்டது. இஸ்ரேல் தொடர்ந்து வளைகுடா நாடுகளை குறிவைத்து வருவகிறது. சவுதி அரேபியாவையும் குறிவைத்திருக்கலாம். இந்த ஒப்பந்தத்தை மேற்கொள்வதன் மூலம் அந்த சாத்தியத்தை நாங்கள் மழுங்கடித்துள்ளோம்" என்று அவர் கூறினார்.