government ஸ்மார்ட்போன் நிறுவனங்களிடம் 'சோர்ஸ் கோட்' விவரங்களை மத்திய அரசு கேட்டதாக வெளியான தகவலை PIB மறுத்துள்ளது. உண்மையில் நடந்தது என்ன? முழு விவரம் இதோ.
கடந்த சில நாட்களாகத் தொழில்நுட்ப உலகில் ஒரு செய்தி காட்டுத்தீயாகப் பரவியது. அதாவது, ஆப்பிள் (Apple), சாம்சங் (Samsung) போன்ற முன்னணி ஸ்மார்ட்போன் நிறுவனங்களிடம், அவற்றின் தயாரிப்புகளுக்கான 'சோர்ஸ் கோட்' (Source Code) விவரங்களை இந்திய அரசு கட்டாயமாகக் கேட்பதாக ராய்ட்டர்ஸ் (Reuters) நிறுவனம் செய்தி வெளியிட்டிருந்தது. இது சர்வதேச அளவில் பெரும் விவாதத்தைக் கிளப்பிய நிலையில், தற்போது மத்திய அரசின் பத்திரிகை தகவல் அலுவலகத்தின் உண்மை கண்டறியும் குழு (PIB Fact Check) இதற்குத் தகுந்த விளக்கமளித்து வதந்திக்கு முற்றுப்புள்ளி வைத்துள்ளது.
வதந்தியும் அரசின் விளக்கமும்
ஸ்மார்ட்போன் தயாரிப்பாளர்கள் தங்கள் சாதனங்களின் மிக முக்கிய ரகசியமான 'சோர்ஸ் கோட்'டைப் பகிருமாறு இந்திய அரசு அழுத்தம் கொடுப்பதாகக் கூறப்பட்டது. ஆனால், இந்தத் தகவல் முற்றிலும் தவறானது என்று PIB Fact Check உறுதிபடத் தெரிவித்துள்ளது. மத்திய மின்னணு மற்றும் தகவல் தொழில்நுட்ப அமைச்சகம் (MeitY) அத்தகைய எந்தவொரு கோரிக்கையையும் ஸ்மார்ட்போன் நிறுவனங்களிடம் வைக்கவில்லை என்றும், உள்நாட்டு ரகசியங்களையோ அல்லது சோர்ஸ் கோட் விவரங்களையோ கேட்கவில்லை என்றும் தெளிவுபடுத்தியுள்ளது.
சோர்ஸ் கோட் (Source Code) என்றால் என்ன? ஏன் இவ்வளவு முக்கியம்?
இந்தச் சர்ச்சையின் மையப்புள்ளியே 'சோர்ஸ் கோட்' தான். எளிதாகச் சொல்ல வேண்டுமென்றால், இது ஒரு ஸ்மார்ட்போனின் டிஜிட்டல் வரைபடம் (Digital Blueprint) போன்றது. போனின் மெமரி, பிராசஸர், சென்சார்கள் மற்றும் ஹார்டுவேர் ஆகியவை எப்படிச் செயல்பட வேண்டும் என்பதைத் தீர்மானிக்கும் அடிப்படை நிரல்கள் (Program Files) இவைதான். ஆப்பிள் மற்றும் சாம்சங் போன்ற நிறுவனங்கள், தங்கள் வாடிக்கையாளர்களுக்குத் தனித்துவமான பாதுகாப்பை வழங்க இந்தத் தகவல்களைத் தான் பயன்படுத்துகின்றன. இது மிகவும் ரகசியமானது என்பதால், எந்த நிறுவனமும் இதை வெளியாட்களுடன் பகிர்ந்துகொள்ள விரும்புவதில்லை.
Related Articles
உண்மையில் நடந்தது என்ன? MeitY விளக்கம்
அப்படியானால் இந்தச் சர்ச்சை எழக் காரணம் என்ன? மொபைல் சாதனங்களின் பாதுகாப்பை (Security Framework) உறுதி செய்வதற்காக, சம்பந்தப்பட்ட நிறுவனங்களுடன் வழக்கமான ஆலோசனைக் கூட்டங்களை (Routine Stakeholder Consultations) நடத்த மத்திய அரசு திட்டமிட்டிருந்தது. இது பாதுகாப்பை மேம்படுத்துவதற்கான ஒரு சாதாரண நடைமுறைதானே தவிர, நிறுவனங்களின் ரகசியங்களைப் பறிப்பதற்கான முயற்சி அல்ல என்று அரசு தரப்பில் தெரிவிக்கப்பட்டுள்ளது.
எதிர்கால விதிமுறைகள் எப்படி இருக்கும்?
சமூக ஊடகமான எக்ஸ் (X) தளத்தில் PIB வெளியிட்டுள்ள பதிவில், "மொபைல் பாதுகாப்பு தொடர்பாக இதுவரை எந்த இறுதி விதிமுறைகளும் (Final Regulations) உருவாக்கப்படவில்லை. அனைத்துத் தரப்பினருடனும் தகுந்த ஆலோசனை நடத்திய பிறகே எதிர்காலக் கொள்கைகள் வகுக்கப்படும்," என்று திட்டவட்டமாகக் குறிப்பிடப்பட்டுள்ளது. எனவே, ஆப்பிள் அல்லது சாம்சங் போன்ற நிறுவனங்களுக்கு மத்திய அரசு நெருக்கடி கொடுப்பதாக வெளியான செய்தியில் உண்மையில்லை என்பது உறுதியாகியுள்ளது.
