ஜஸ்பிரித் பும்ரா இமாலய சாதனை; 2024ன் சிறந்த கிரிக்கெட் வீரர் விருதை வென்றார்! செம மாஸ்!
ஐசிசியின் 2024ம் ஆண்டுக்கான சிறந்த கிரிக்கெட் வீரர் விருதை ஜஸ்பிரித் பும்ரா வென்றுள்ளார். ஏற்கெனவே 2024ம் ஆண்டின் சிறந்த டெஸ்ட் வீரர் விருதை உலகின் நம்பர் 1 பவுலரான ஜஸ்பிரித் பும்ரா தட்டிச்சென்றிருந்தார்.
Followஜஸ்பிரித் பும்ரா சாதனை
சர்வதேச கிரிக்கெட் கவுன்சில் (ஐசிசி) ஒவ்வொரு ஆண்டும் சிறப்பாக விளையாடும் வீரர்களை அடிப்படையாக வைத்து விருது வழங்கி வருகிறது. அதாவது டெஸ்ட் போட்டிகள், ஒருநாள் போட்டி மற்றும் டி20 போட்டிகளில் சிறந்த வீரரை தேர்வு செய்து விருது வழங்கி வருகிறது. அந்த வகையில் 2024ம் ஆண்டின் சிறந்த டி20 வீரர் விருதை இந்திய பாஸ்ட் பவுலர் அர்ஷ்தீப் சிங் வென்றிருந்தார்.
இதேபோல் 2024ம் ஆண்டின் சிறந்த டெஸ்ட் வீரர் விருதை உலகின் நம்பர் 1 பவுலரான ஜஸ்பிரித் பும்ரா தட்டிச்சென்றிருந்தார். இந்நிலையில், 2024 ஆம் ஆண்டுக்கான சிறந்த கிரிக்கெட் வீரர் விருதை ஜஸ்பிரித் பும்ரா வென்றுள்ளார். இதை ஐசிசி இப்போது அதிகாரப்பூர்வமாக அறிவித்துள்ளது. இந்த விருதுக்கான பரிந்துரை பட்டியலில் ஆஸ்திரேலியாவின் டிராவிஸ் ஹெட், இங்கிலாந்தின் ஜோ ரூட் மற்றும் ஹாரி புரூக் இருந்த நிலையில், இவர்கள் மூன்று பேரையும் ஓவர்டேக் செய்து பும்ரா விருதை தட்டிப்பறித்துள்ளார்.
ஐந்தாவது இந்திய வீரர்
இதன்மூலம் ஐசிசியின் சிறந்த கிரிக்கெட் வீரர் விருதை வென்ற ஐந்தாவது இந்திய வீரர் என்ற பெருமையை பும்ரா பெற்றுள்ளார். முன்னதாக சச்சின் டெண்டுல்கர், விராட் கோலி, ராகுல் டிராவிட் மற்றும் ரவிச்சந்திரன் அஸ்வின் ஆகியோர் ஐசிசியின் சிறந்த கிரிக்கெட் வீரர் விருதை வென்றிருந்த நிலையில், பும்ராவும் இப்போது அந்த பட்டியலில் இணைந்துள்ளார்.
2024ம் ஆண்டு ஜஸ்பிரித் பும்ராவுக்கு மகத்தான ஆண்டாக அமைந்துள்ளது. 31 வயதான ஜஸ்பிரித் பும்ரா கடந்த ஆண்டு இந்தியாவுக்காக 13 டெஸ்ட் போட்டிகளில் விளையாடி 71 விக்கெட்டுகளையும், 8 டி20 போட்டிகளில் விளையாடி 15 விக்கெட்டுகளையும் வீழ்த்தியுள்ளார்.
டி20 உலகக்கோப்பை நாயகன்
கடந்த ஆண்டு ஜூன் 1 முதல் 29 வரை மேற்கிந்திய தீவுகள் மற்றும் அமெரிக்காவில் நடைபெற்ற டி20 உலகக்கோப்பையை இந்தியா வெல்ல ஜஸ்பிரித் பும்ரா முக்கிய பங்காற்றினார். இந்த தொடரில் மட்டும் 4.17 என்ற எகானமியுடன், 8.26 என்ற ஸ்டிரைக் ரேட்டுடன் 15 விக்கெட்டுகளை அறுவடை செய்த பும்ரா, தொடர் நாயகன் விருதை வென்றார்.
ஜஸ்பிரித் பும்ரா 2024ம் ஆண்டு மட்டும் 13 டெஸ்ட் போட்டிகளில் விளையாடி 14.92 என்ற சராசரியுடன் 71 விக்கெட்டுகளை வீழ்த்தியுள்ளார். மேலும் 2024ல் மொத்தமாக 357 ஓவர்களை வீசியுள்ள பும்ரா ஓவருக்கு 2.96 ரன்கள் என்று மிகச்சிறந்த சிக்கன விகிதத்தை பெற்றுள்ளார். 30.1 ஸ்டிரைக் ரேட்டில் விக்கெட்டுகளை வீழ்த்தி இருக்கிறார்.
ஆஸ்திரேலிய தொடரில் ஆதிக்கம்
2024 தொடக்கத்தில் கேப்டவுனில் தென்னாப்பிரிக்காவுக்கு எதிரான டெஸ்ட்டில் 8 விக்கெட்டுகளை வீழ்த்தி பும்ரா இந்திய அணியை வெற்றி பெற வைத்தார். அண்மையில் ஆஸ்திரேலியாவில் நடந்த 5 போட்டிகள் கொண்ட டெஸ்ட் தொடரில் மொத்தமாக 32 விக்கெட்டுகளை வீழ்த்தி பும்ரா சாதனை படைத்திருந்தது குறிப்பிடத்தக்கது.
சேனலை கிளிக் செய்து பின்தொடரவும்
