இரானி கோப்பை போட்டியில் மத்திய பிரதேசத்துக்கு எதிராக முதல் இன்னிங்ஸில் இரட்டை சதமும், 2வது இன்னிங்ஸில் சதமும் அடித்து யஷஸ்வி ஜெய்ஸ்வால் வரலாற்று சாதனை படைத்துள்ளார்.
ரஞ்சி தொடரின் முன்னாள் சாம்பியன் அணியுடன், மற்ற அணிகளை சேர்ந்த வீரர்கள் ரெஸ்ட் ஆஃப் இந்தியா அணி என்ற பெயரில் மோதும் போட்டி இரானி கோப்பை போட்டி ஆகும். அந்தவகையில் மத்திய பிரதேசம் மற்றும் ரெஸ்ட் ஆஃப் இந்தியா அணிகளுக்கு இடையேயான போட்டி குவாலியரில் நடந்துவருகிறது. இந்த போட்டியில் டாஸ் வென்ற ரெஸ்ட் ஆஃப் இந்தியா அணி பேட்டிங்கை தேர்வு செய்தது.
ரெஸ்ட் ஆஃப் இந்தியா அணி:
மயன்க் அகர்வால் (கேப்டன்), அபிமன்யூ ஈஸ்வரன், யஷஸ்வி ஜெய்ஸ்வால், பாபா இந்திரஜித், யஷ் துல், உபேந்திரா யாதவ் (விக்கெட் கீப்பர்), சௌரப் குமார், அதித் ஷெத், புல்கித் நரங், நவ்தீப் சைனி, முகேஷ் குமார்.
மத்திய பிரதேச அணி:
ஹிமானுஷு மண்ட்ரி (கேப்டன், விக்கெட் கீப்பர்), அர்ஹாம் அகுயில், ஷுபம் ஷர்மா, ஹர்ஷ் காவ்லி, யஷ் துபே, அமான் சோலங்கி, சரன்ஷ் ஜெய்ன், அனுபவ் அகர்வால், அங்கித் குஷ்வா, குமார் கார்த்திகேயா, ஆவேஷ் கான்.
முதலில் பேட்டிங் ஆடிய ரெஸ்ட் ஆஃப் இந்தியா அணியின் கேப்டன் மயன்க் அகர்வால் 2 ரன்களுக்கு ஆட்டமிழந்து ஏமாற்றமளித்தார். ஆனால் அதன்பின்னர் அபிமன்யூ ஈஸ்வரனும் யஷஸ்வி ஜெய்ஸ்வாலும் இணைந்து அபாரமாக பேட்டிங் ஆடி 2வது விக்கெட்டுக்கு 371 ரன்களை குவித்தனர். சதமடித்த அபிமன்யூ ஈஸ்வரன் 154 ரன்கள் அடித்தார். அபாரமாக ஆடிய யஷஸ்வி ஜெய்ஸ்வால் இரட்டை சதமடித்து 213 ரன்களை குவித்தார். ரெஸ்ட் ஆஃப் இந்தியா அணி முதல் இன்னிங்ஸில் 484 ரன்களை குவித்தது.
இதையடுத்து முதல் இன்னிங்ஸை ஆடிய மத்திய பிரதேச அணி, யஷ் துபேவின் சதத்தால்(109) 294 ரன்கள் அடித்தது. மற்ற வீரர்கள் யாரும் பெரிய பங்களிப்பு செய்யாததால் அந்த அணியால் பெரிய ஸ்கோர் அடிக்க முடியவில்லை.
190 ரன்கள் முன்னிலையுடன் 2வது இன்னிங்ஸை ஆடிய ரெஸ்ட் ஆஃப் இந்தியா அணியில் யஷஸ்வி ஜெய்ஸ்வால் மீண்டும் சிறப்பாக பேட்டிங் ஆடி சதமடித்தார். யஷஸ்வி ஜெய்ஸ்வால் 144 ரன்களை குவிக்க, 2வது இன்னிங்ஸில் ரெஸ்ட் ஆஃப் இந்தியா அணி 246 ரன்கள் அடித்தது. மொத்தமாக 436 ரன்கள் முன்னிலை பெற, மத்திய பிரதேச அணி 437 ரன்கள் என்ற கடின இலக்கை விரட்டுகிறது.
ஸ்பின்னர்கள் வீசிய நோ பாலால் இந்திய அணி அடைந்த டாப் 3 தோல்விகள்
இந்த போட்டியின் முதல் இன்னிங்ஸில் இரட்டை சதம்(213) மற்றும் 2வது இன்னிங்ஸில் சதமடித்ததன் (144) மூலம், இரானி கோப்பை போட்டியில் இரட்டை சதம் மற்றும் சதமடித்த முதல் வீரர் என்ற சாதனையை யஷஸ்வி ஜெய்ஸ்வால் படைத்துள்ளார்.
