சிஎஸ்கே அணியின் அடுத்த கேப்டன் யார் என்று வீரேந்திர சேவாக் கருத்து கூறியுள்ளார்.
ஐபிஎல்லில் 15 சீசன்கள் வெற்றிகரமான முடிந்துள்ள நிலையில், 16வது சீசன் கடந்த மார்ச் 31ம் தேதி தொடங்கி விறுவிறுப்பாக நடந்துவருகிறது. இந்த 15 சீசனில் 4 முறை கோப்பையை வென்று ஐபிஎல்லின் வெற்றிகரமான அணியாக திகழ்கிறது சிஎஸ்கே. சிஎஸ்கே அணி 2 சீசனை தவிர, மற்ற ஆடிய அனைத்து சீசன்களிலும் பிளே ஆஃபிற்கு தகுதிபெற்றது.
ஐபிஎல்லில் ஃபைனல் வரை செல்வதையும், கோப்பையை வெல்வதையும் ஒரு வழக்கமாகவே வைத்துள்ள அணி சிஎஸ்கே. அந்தளவிற்கு அந்த அணி ஆதிக்கம் செலுத்த முக்கிய காரணம் கேப்டன் தோனி தான். எனவே சிஎஸ்கே அணி தொடர்ந்து இதேமாதிரி ஜொலிக்க வேண்டுமானால் அதற்கு சிறப்பான கேப்டன் அவசியம்.
எனவே தோனிக்கு அடுத்த கேப்டன் யார் என்ற கேள்வி வலுத்துவருகிறது. தான் இருக்கும்போதே அடுத்த கேப்டனை உருவாக்கி கொடுத்துவிட வேண்டும் என நினைத்த தோனி, கடந்த சீசனில் ஜடேஜாவை கேப்டனாக்கினார். ஆனால் ஜடேஜா கேப்டன்சியில் ஜொலிக்கவில்லை. அவரது கேப்டன்சியில் சிஎஸ்கே அணி தொடர் தோல்விகளை தழுவியது. மேலும் ஜடேஜா ஒரு கேப்டனாக சுதந்திரமாக செயல்பட முடியாத சூழலும் இருந்தது. தோனியின் தலையீடுகள் அதிகம் இருந்தன. பல்வேறு குழப்பங்களுக்கு மத்தியில் கடந்த சீசனின் பாதியில் கேப்டன்சியிலிருந்து விலகினார் ஜடேஜா.
அதன்பின்னர் சிஎஸ்கே அணியுடனான மோதல் போக்கையும் மீறி, ஜடேஜா சிஎஸ்கே அணியால் தக்கவைக்கப்பட்டார். ஆனால் அடுத்த கேப்டனாக ஜடேஜா நியமிக்கப்பட இனிமேல் வாய்ப்பில்லை. எனவே தோனிக்கு அடுத்த கேப்டன் யார் என்ற கேள்வி எழுந்துள்ளது. தோனியை போன்ற மிகவும் கூலான, நிதானமான, தெளிவான ஒருவரை கேப்டனாக நியமிக்க வேண்டும். அவர் சிறந்த வீரராகவும் இருக்க வேண்டும்.
அந்தவகையில், ருதுராஜ் கெய்க்வாட் தான் சிஎஸ்கே அணியின் அடுத்த கேப்டன் என்று வீரேந்திர சேவாக் கருத்து கூறியுள்ளார்.
IPL 2023: தம்பி நீ சரிப்பட்டு வரமாட்ட.. தூக்கி எறியும் சிஎஸ்கே..! ஆடும் லெவனில் ஒரு அதிரடி மாற்றம்
இந்தியாவின் மிகச்சிறந்த இளம் கிரிக்கெட் வீரர்களில் ஒருவர் ருதுராஜ் கெய்க்வாட். ஐபிஎல்லில் சிஎஸ்கே அணியில் ஆடும் ருதுராஜ் கெய்க்வாட், ஐபிஎல்லில் 2021 சீசனில் சிஎஸ்கே அணி 4வது முறையாக கோப்பையை வென்றபோது அந்த சீசனில் அதிக ரன்களை குவித்த வீரர் ருதுராஜ் கெய்க்வாட். உள்நாட்டு கிரிக்கெட்டிலும் தொடர்ச்சியான சதங்கள், இரட்டை சதங்கள் என அசாத்திய சாதனைகளை படைத்து அசத்தினார். இந்த சீசனின் முதல் போட்டியிலேயே 92 ரன்களை குவித்து இந்த சீசனையும் அபாரமாக தொடங்கியுள்ளார் ருதுராஜ் கெய்க்வாட். முதல் போட்டியின் ஃபார்மை இந்த சீசன் முழுக்க தொடர்வார் என நம்பப்படுகிறது.
