ஜார்க்கண்ட்டை வீழ்த்தி தமிழ்நாடு அபார வெற்றி..! பேட்டிங், பவுலிங் இரண்டிலும் செம மிரட்டல்
சையத் முஷ்டாக் அலி தொடரில் முதல் போட்டியில் ஜார்க்கண்ட்டை 66 ரன்கள் வித்தியாசத்தில் வீழ்த்தி தமிழ்நாடு அணி அபார வெற்றி பெற்று வெற்றியுடன் தொடரை தொடங்கியுள்ளது.
உள்நாட்டு டி20 தொடரான சையத் முஷ்டாக் அலி தொடர் இன்று தொடங்கியது. தமிழ்நாடு மற்றும் ஜார்க்கண்ட் அணிகள் மோதிய போட்டி கொல்கத்தா ஈடன் கார்டன் மைதானத்தில் நடந்தது. டாஸ் வென்ற ஜார்க்கண்ட் அணி, தமிழ்நாட்டை முதலில் பேட்டிங் செய்ய பணித்தது.
இதையடுத்து முதலில் பேட்டிங் ஆடிய தமிழ்நாடு அணி 191 ரன்கள் அடித்தது. தமிழ்நாடு அணியின் தொடக்க வீரர்களாக ஹரி நிஷாந்த் மற்றும் ஜெகதீசன் ஆகிய இருவரும் களமிறங்கினர். இருவரும் இணைந்து தமிழ்நாடு அணிக்கு நல்ல தொடக்கத்தை அமைத்து கொடுத்தனர். ஜெகதீசன் 27 ரன்களுக்கு ஆட்டமிழக்க, முதல் விக்கெட்டுக்கு 72 ரன்களை சேர்த்தனர்.
அதன்பின்னர் விஜய் சங்கர் வெறும் 4 ரன்களுக்கு ஆட்டமிழந்தார். இதையடுத்து 4ம் வரிசையில் களத்திற்கு வந்த கேப்டன் தினேஷ் கார்த்திக், ஐபிஎல்லில் கொல்கத்தா ஈடன் கார்டனில் அதிகமாக ஆடியிருப்பதால், அந்த அனுபவத்தை பயன்படுத்தி, ஜார்க்கண்டின் பவுலிங்கை பொளந்துகட்டி சிக்ஸர் மழை பொழிந்தார். வெறும் 17 பந்தில் 3 பவுண்டரிகள் மற்றும் 4 சிக்ஸர்களுடன் 46 ரன்கள் அடித்தார் தினேஷ் கார்த்திக்.
ஷாருக்கான் 4 பந்தில் 2 சிக்ஸர்களுடன் 14 ரன்கள் அடித்து கேமியோ ரோல் செய்தார். ஒருமுனையில் ஜெகதீசன், விஜய் சங்கர், தினேஷ் கார்த்திக், ஷாருக்கான் என விக்கெட்டுகள் விழுந்தாலும், மறுமுனையில் நிலைத்து ஆடி அரைசதம் அடித்து, கடைசிவரை இழுத்துச்சென்ற தொடக்க வீரர் ஹரி நிஷாந்த், கடைசி வரை ஆட்டமிழக்காமல் 92 ரன்கள் அடித்து களத்தில் இருந்தார். ஆனால் அவரால் சதமடிக்க முடியவில்லை.
இதையடுத்து 192 ரன்கள் என்ற கடினமான இலக்கை விரட்டிய ஜார்க்கண்ட் அணி தொடக்கம் முதலே சீரான இடைவெளியில் அடுத்தடுத்து விக்கெட்டுகளை இழந்தது. அந்த அணியின் முக்கியமான வீரர்களான, கேப்டன் இஷான் கிஷன்(9), விராட் சிங்(23), சவுரப் திவாரி(9), அனுகுல் ராய்(4) உட்பட அனைத்து வீரர்களுமே சொற்ப ரன்களில் ஆட்டமிழந்ததால் 20 ஓவரில் ஜார்க்கண்ட் அணி வெறும் 123 ரன்களுக்கு சுருண்டதால் 66 ரன்கள் வித்தியாசத்தில் அபார வெற்றி பெற்றது தமிழ்நாடு அணி.
சேனலை கிளிக் செய்து பின்தொடரவும்
