இந்தியா ஆஸ்திரேலியா இடையேயான முதல் டெஸ்ட்டில் ஆஸ்திரேலிய அணி வென்ற நிலையில், அந்த போட்டியுடன் விராட் கோலி திரும்பிவிட்ட போதிலும், கோலி, ஷமி ஆகிய நட்சத்திர வீரர்கள் இல்லாமல் ரஹானே தலைமையிலான இந்திய அணி, ஆஸ்திரேலியாவை வீழ்த்தி 8 விக்கெட் வித்தியாசத்தில் அபார வெற்றி பெற்றது.

இதன்மூலம், ரஹானே டெஸ்ட் கிரிக்கெட்டில் ஒரு கேப்டனாக 100 சதவிகித வின்னிங் கேப்டனாக திகழ்கிறார். ரஹானே இதுவரை 3 டெஸ்ட் போட்டிகளில் இந்திய அணியின் கேப்டனாக செயல்பட்டுள்ளார். அவரது கேப்டன்சியில் ஆடிய 3 போட்டிகளிலும் இந்திய அணி வெற்றி பெற்றுள்ளது.

2017ல் தர்மசாலாவில் ஆஸி.,க்கு எதிரான டெஸ்ட், 2018ல் பெங்களூருவில் நடந்த ஆஸ்திரேலியாவுக்கு எதிரான டெஸ்ட் மற்றும் இந்த தொடரில் மெல்போர்னில் நடந்த 2வது டெஸ்ட் ஆகிய 3 போட்டிகளில் ரஹானே கேப்டனாக இருந்து அணியை வழிநடத்தியுள்ளார். இந்த 3 போட்டிகளிலுமே இந்திய அணி தான் வென்றது.

இந்நிலையில், சிட்னியில் ஆஸி.,க்கு எதிரான 3வது டெஸ்ட் போட்டியில் வென்றால், இந்திய அணியின் கேப்டனாக பொறுப்பேற்ற பின், முதல் 4 டெஸ்ட் போட்டிகளில் வெற்றி பெற்ற கேப்டன் என்ற தோனியின் ரெக்கார்டை சமன் செய்துவிடுவார் ரஹானே. 2008ல் அனில் கும்ப்ளேவிற்கு பிறகு, இந்திய டெஸ்ட் அணியின் கேப்டனாக பொறுப்பேற்ற தோனி, அவர் வழிநடத்திய முதல் 4 டெஸ்ட் போட்டிகளிலும் இந்திய அணிக்கு வெற்றியை தேடிக்கொடுத்தார். அந்த சாதனையை சமன் செய்து, பின்னர் தகர்க்கும் வாய்ப்பும் ரஹானேவிற்கு உள்ளது. அதை செய்கிறாரா என்று பார்ப்போம்.