சர்வதேச டி20 கிரிக்கெட்டில் தொடர்ச்சியாக 4 பந்தில் 4 விக்கெட்டுகளை வீழ்த்தி சாதனை பட்டியலில் இணைந்துள்ளார் ஜேசன் ஹோல்டர்.
இங்கிலாந்து அணி வெஸ்ட் இண்டீஸில் சுற்றுப்பயணம் செய்து ஆடிவருகிறது. 5 டி20 போட்டிகள் கொண்ட தொடரை 3-2 என வெஸ்ட் இண்டீஸ் அணி வென்றது.
கடைசி டி20 போட்டி இன்று பார்படாஸில் நடந்தது. இந்த போட்டியில் முதலில் பேட்டிங் ஆடிய வெஸ்ட் இண்டீஸ் அணி 20 ஓவரில் 179 ரன்களை குவிக்க, 180 ரன்கள் என்ற சவாலான இலக்கை விரட்டிய இங்கிலாந்து அணி, 162 ரன்களுக்கு சுருண்டு 17 ரன்கள் வித்தியாசத்தில் தோல்வியடைந்தது.
வெஸ்ட் இண்டீஸ் அணி இந்த போட்டியில் வெற்றி பெற முக்கிய காரணமாக திகழ்ந்தவர் ஆல்ரவுண்டர் ஜேசன் ஹோல்டர். இங்கிலாந்து இன்னிங்ஸின் கடைசி ஓவரை வீசிய ஜேசன் ஹோல்டர், அந்த ஓவரின் 2வது பந்தில் கிறிஸ் ஜோர்டானையும், 3வது பந்தில் நன்றாக செட்டில் ஆகியிருந்த சாம் பில்லிங்ஸையும்(41), 4வது பந்தில் அடில் ரஷீத் மற்றும் 5வது பந்தில் சாகிப் மஹ்மூத்தையும் வீழ்த்தி இங்கிலாந்தை ஆல் அவுட் செய்தார் ஜேசன் ஹோல்டர்.
கடைசி ஓவரில் தொடர்ச்சியாக 4 பந்தில் 4 விக்கெட்டுகளை வீழ்த்தி வெஸ்ட் இண்டீஸ் அணிக்கு வெற்றியை பெற்றுக்கொடுத்தார் ஜேசன் ஹோல்டர்.
இதன்மூலம், சர்வதேச டி20 கிரிக்கெட்டில் 4 பந்தில் 4 விக்கெட் வீழ்த்திய சாதனையாளர்களின் பட்டியலில் இணைந்துள்ளார் ஜேசன் ஹோல்டர். இதற்கு முன்பாக லசித் மலிங்கா, ரஷீத் கான் மற்றும் கர்டிஸ் காம்ஃபெர் ஆகிய மூவரும் தொடர்ச்சியாக 4 பந்தில் 4 விக்கெட் வீழ்த்தியிருந்தனர். இப்போது இந்த பட்டியலில் ஜேசன் ஹோல்டரும் இணைந்துள்ளார்.
