BBL: நேதன் எல்லிஸ் அசத்தல் பவுலிங்; ஜுவெல் அபார அரைசதம்! மெல்பர்ன் ஸ்டார்ஸை வீழ்த்தி ஹோபர்ட் ஹரிகேன்ஸ் வெற்றி

பிக்பேஷ் லீக்கில் காலெப் ஜூவெல்லின் சிறப்பான பேட்டிங்கால் மெல்பர்ன் ஸ்டார்ஸை 2 விக்கெட் வித்தியாசத்தில் வீழ்த்தி ஹோபர்ட் ஹரிகேன்ஸ் வெற்றி பெற்றது. 

பிக்பேஷ் டி20 லீக் தொடர் ஆஸ்திரேலியாவில் விறுவிறுப்பாக நடந்துவருகிறது. ஹோபர்ட் ஹரிகேன்ஸ் மற்றும் மெல்பர்ன் ஸ்டார்ஸ் அணிகளுக்கு இடையே ஹோபர்ட்டில் நடந்த போட்டியில் டாஸ் வென்ற ஹோபர்ட் ஹரிகேன்ஸ் அணி ஃபீல்டிங்கை தேர்வு செய்தது.

ஹோபர்ட் ஹரிகேன்ஸ் அணி:

காலெப் ஜுவெல், பென் மெக்டர்மோட் (விக்கெட் கீப்பர்), ஜாக் க்ராவ்லி, டார்ஷி ஷார்ட், டிம் டேவிட், ஆசிஃப் அலி, மிட்செல் ஓவென், ஃபஹீம் அஷ்ரஃப், டாம் ஆண்ட்ரூஸ், நேதன் எல்லிஸ் (கேப்டன்), ரைலீ மெரிடித்.

மெல்பர்ன் ஸ்டார்ஸ் அணி:

ஜோ கிளார்க் (விக்கெட் கீப்பர்), தாமஸ் ரோஜர்ஸ், ஹில்டன் கார்ட்ரைட், பியூ வெப்ஸ்டர், நிக் லார்கின், ஜேம்ஸ் செய்மர், க்ளிண்ட் ஹின்ச்லிஃப், நேதன் குல்ட்டர்நைல், லுக் உட், லியாம் ஹாட்ச்சர், ஆடம் ஸாம்பா (கேப்டன்).

முதலில் பேட்டிங் ஆடிய மெல்பர்ன் ஸ்டார்ஸ் அணியின் தொடக்க வீரர்கள் ஜோ கிளார் (4) மற்றும் தாமஸ் ரோஜர்ஸ் (2) ஆகிய இருவரும் ஒற்றை இலக்கத்தில் வெளியேறி ஏமாற்றமளித்தனர். 3ம் வரிசையில் இறங்கிய கார்ட்ரைட் நிலைத்து ஆடி அரைசதம் அடித்தார். 47 பந்தில் 8 பவுண்டரிகளுடன் 57 ரன்கள் அடித்தார். வெப்ஸ்டர் 27 ரன்களும், ஜேம்ஸ் செய்மர் 7 பந்தில் 20 ரன்களும் அடித்தனர். மற்ற அனைவருமே ஒற்றை இலக்கத்தில் ஆட்டமிழக்க, 20 ஓவரில் 131 ரன்கள் மட்டுமே அடித்தது மெல்பர்ன் ஸ்டார்ஸ் அணி.

அபாரமாக பந்துவீசிய ஹோபர்ட் ஹரிகேன்ஸ் அணியின் கேப்டனும் ஃபாஸ்ட் பவுலருமான நேதன் எல்லிஸ் 4 ஓவரில் வெறும் 12 ரன்கள் மட்டுமே விட்டுக்கொடுத்து 2 விக்கெட் வீழ்த்தினார்.

132 ரன்கள் என்ற எளிய இலக்கை விரட்டிய ஹோபர்ட் ஹரிகேன்ஸ் அணியின் தொடக்க வீரர் காலெப் ஜுவெல் அபாரமாக பேட்டிங் ஆடி அரைசதம் அடித்தார். அதிரடி அரைசதம் அடித்த ஜுவெல் 44 பந்தில் 70 ரன்கள் அடித்து 12வது ஓவரில் ஆட்டமிழந்தார். 3ம் வரிசையில் இறங்கிய ஜாக் க்ராவ்லி 30 ரன்களுக்கு ஆட்டமிழக்க, 14.3 ஓவரில் 114 ரன்களுக்கு ஹோபர்ட் ஹரிகேன்ஸ் அணி 4 விக்கெட்டை இழந்தது. அதன்பின்னர் டார்ஷி ஷார்ட்(8), மிட்செல் ஓவன்(0), ஃபஹீம் அஷ்ரஃப் (0), ஆசிஃப் அலி(9) ஆகிய நால்வரும் மளமளவென ஆட்டமிழக்க, 14 ரன்களுக்கு அடுத்த 4 விக்கெட்டுகளை இழந்தது ஹோபர்ட் அணி. ஆனால் ஜுவெல்லின் அதிரடி அரைசதத்தால் கிட்டத்தட்ட வெற்றியை நெருங்கியதாலும், இலக்கு எளிதானது என்பதாலும் இலக்கை எட்டி 2 விக்கெட் வித்தியாசத்தில் ஹோபர்ட் ஹரிகேன்ஸ் அணி வெற்றி பெற்றது.