ராஜஸ்தான் ராயல்ஸுக்கு எதிரான போட்டியில் 37 ரன்கள் வித்தியாசத்தில் குஜராத் டைட்டன்ஸ் அணி அபார வெற்றி பெற்றது.

ஐபிஎல் 15வது சீசனில் ராஜஸ்தான் ராயல்ஸும் குஜராத் டைட்டன்ஸும் மோதிய போட்டி மும்பை டி.ஒய்.பாட்டீல் மைதானத்தில் நடந்த்து. இதற்கு முன் ஆடிய 4 போட்டிகளில் இரு அணிகளுமே தலா 3 வெற்றிகளை பெற்றிருந்த நிலையில், 4வது வெற்றியை பெறும் முனைப்பில் இரு அணிகளும் களமிறங்கின.

இந்த போட்டியில் டாஸ் வென்ற ராஜஸ்தான் ராயல்ஸ் கேப்டன் சஞ்சு சாம்சன் ஃபீல்டிங்கை தேர்வு செய்தார்.

ராஜஸ்தான் ராயல்ஸ் அணி:

ஜோஸ் பட்லர், தேவ்தத் படிக்கல், சஞ்சு சாம்சன் (கேப்டன், விக்கெட் கீப்பர்), ராசி வாண்டெர் டசன், ஷிம்ரான் ஹெட்மயர், ரியான் பராக், ஜிம்மி நீஷம், ரவிச்சந்திரன் அஷ்வின், குல்தீப் சென், பிரசித் கிருஷ்ணா, யுஸ்வேந்திர சாஹல்.

குஜராத் டைட்டான்ஸ் அணி:

மேத்யூ வேட் (விக்கெட் கீப்பர்), ஷுப்மன் கில், விஜய் சங்கர், ஹர்திக் பாண்டியா (கேப்டன்), டேவிட் மில்லர், அபினவ் மனோகர், ராகுல் டெவாட்டியா, ரஷீத் கான், லாக்கி ஃபெர்குசன், முகமது ஷமி, யஷ் தயால்.

முதலில் பேட்டிங் ஆடிய குஜராத் டைட்டன்ஸ் அணியின் தொடக்க வீரர் மேத்யூ வேட் அதிரடியாக தொடங்கினார். 6 பந்தில் 3 பவுண்டரிகளுடன் 12 ரன்கள் அடித்த வேட் 2வது ஓவரில் ரன் அவுட்டானார். 3ம் வரிசையில் இறங்கிய விஜய் சங்கர் 7 பந்தில் 2 ரன் மட்டுமே அடித்து ஆட்டமிழந்தார். ஷுப்மன் கில்லும் 13 ரன்களுக்கு நடையை கட்டினார்.

53 ரன்களுக்கு குஜராத் அணி 3 விக்கெட்டுகளை இழந்துவிட்ட நிலையில், அதன்பின்னர் கேப்டன் ஹர்திக் பாண்டியாவும், அபினவ் மனோகரும் இணைந்து அடித்து ஆடினர். 4வது விக்கெட்டுக்கு இருவரும் இணைந்து 86 ரன்களை சேர்த்தனர். 28 பந்தில் 43 ரன்கள் அடித்து அபினவ் மனோகர் ஆட்டமிழந்தார். அதிரடியாக ஆடிய பாண்டியா அரைசதம் அடிக்க, டேவிட் மில்லர் டெத் ஓவர்களில் அடித்து ஆடி 14 பந்தில் 31 ரன்கள் அடித்தார். அரைசதம் அடித்த ஹர்திக் பாண்டியா 52 பந்தில் 8 பவுண்டரிகள் மற்றும் 4 சிக்ஸர்களுடன் 87 ரன்களை குவிக்க, 20 ஓவரில் 192 ரன்கள் அடித்தது குஜராத் டைட்டன்ஸ் அணி.

193 ரன்கள் என்ற கடின இலக்கை விரட்டிய ராஜஸ்தான் ராயல்ஸ் அணியின் தொடக்க வீரர் ஜோஸ் பட்லர் தொடக்கம் முதலே அடித்து ஆடினார். பவர்ப்ளே முடிவதற்குள்ளாகவே 23 பந்தில் அரைசதத்தை பூர்த்தி செய்தார் பட்லர். 24 பந்தில் 54 ரன்கள் அடித்து பவர்ப்ளேயின் கடைசி ஓவரான 6வது ஓவரில் ஃபெர்குசன் பந்தில் ஆட்டமிழந்தார். ஃபெர்குசன் வீசிய அந்த 6வது ஓவரில் 3ம் வரிசையில் இறங்கிய அஷ்வின் மற்றும் தொடக்க வீரர் பட்லர் ஆகிய இருவரும் ஆட்டமிழந்தனர். அதன்பின்னர் சாம்சன, ஹெட்மயர், வாண்டெர் டசன் ஆகிய வீரர்களும் ஆட்டமிழக்க 20 ஓவரில் ராஜஸ்தான் அணி155 ரன் மட்டுமே அடித்து தோற்றது. 37 ரன்கள் வித்தியாசத்தில் குஜராத் அணி அபார வெற்றி பெற்றது.