ஐபிஎல் 15வது சீசனுக்கான மெகா ஏலம் குறித்த அனைத்து தகவல்களையும் பார்ப்போம்.
ஐபிஎல் 15வது சீசனில் லக்னோ மற்றும் அகமதாபாத் அணிகள் புதிதாக இணைகின்றன. எனவே இந்த சீசனுக்கான ஏலம் மெகா ஏலமாக நடக்கவுள்ளது. நாளை(பிப்ரவரி 12) மற்றும் 13 ஆகிய தேதிகளில் மெகா ஏலம் பெங்களூருவில் நடக்கவுள்ளது.
இந்த ஏலத்தில் 370 இந்திய வீரர்கள் மற்றும் 220 வெளிநாட்டு வீரர்கள் என மொத்தம் 590 வீரர்கள் ஏலம் விடப்படுகின்றனர்.
ஐபிஎல் 15வது சீசனுக்கான மெகா ஏலத்தை பிப்ரவரி 12 மற்றும் 13 ஆகிய 2 நாட்களும் காலை 11 முதல் ஸ்டார் ஸ்போர்ட்ஸ் தொலைக்காட்சியில் நேரலையாக பார்க்கலாம். டிஸ்னி+ஹாட்ஸ்டாரிலும் ஏலத்தை பார்க்கலாம்.
ஒவ்வொரு அணிக்கும் வீரர்களை ஏலமெடுக்க ரூ.90 கோடி ஒதுக்கப்பட்டது. 8 பழைய அணிகளும் ஏலத்திற்கு முன்பாக அதிகபட்சமாக தலா 4 வீரர்களை தக்கவைக்கலாம் என்பதால், சில அணிகள் 4 வீரர்களையும், சில அணிகள் மூவரையும், பஞ்சாப் கிங்ஸ் அணி இருவரை மட்டுமே என தங்களுக்கு தேவையான வீரர்களை தக்கவைத்துவிட்டு, மற்ற வீரர்களை விடுவித்தன.
லக்னோ மற்றும் அகமதாபாத் ஆகிய 2 புதிய அணிகளும் ஏலத்திற்கு முன்பாக அதிகபட்சமாக 3 வீரர்களை வாங்கலாம் என்பதால், அந்த இரு அணிகளும் தலா 3 வீரர்களை எடுத்துள்ளன.
ஏலத்திற்கு முன்பாக அனைத்து அணிகளிடமும் இருக்கும் வீரர்கள், கையிருப்பு பணம், இன்னும் எத்தனை வீரர்களை எடுக்கலாம் என்பன போன்ற விவரங்களை பார்க்கலாம்.
சென்னை சூப்பர் கிங்ஸ்:
தக்கவைத்த வீரர்கள்: ரவீந்திர ஜடேஜா (ரூ.16 கோடி), தோனி (ரூ.12 கோடி), மொயின் அலி (ரூ.8 கோடி), ருதுராஜ் கெய்க்வாட் (ரூ.6 கோடி),
சிஎஸ்கேவிடம் இன்னும் ரூ.41 கோடி கையிருப்பில் உள்ளது. இன்னும் 21 வீரர்களை ஏலத்தில் எடுக்கலாம்.
மும்பை இந்தியன்ஸ்:
தக்கவைத்த வீரர்கள்: ரோஹித் சர்மா (ரூ.16 கோடி), ஜஸ்ப்ரித் பும்ரா (ரூ.12 கோடி), சூர்யகுமார் யாதவ் (ரூ.8 கோடி), கைரன் பொல்லார்டு (ரூ.6 கோடி)
மும்பை இந்தியன்ஸிடமும் ரூ.48 கோடி கையிருப்பில் உள்ள நிலையில், இன்னும் 21 வீரர்களை அந்த அணி ஏலத்தில் எடுக்கலாம்.
ராயல் சேலஞ்சர்ஸ் பெங்களூரு:
தக்கவைத்த வீரர்கள்: விராட் கோலி (ரூ.15 கோடி), க்ளென் மேக்ஸ்வெல் (ரூ.11 கோடி), முகமது சிராஜ் (ரூ.7 கோடி)
ஆர்சிபி அணியிடம் ரூ.57 கோடி கையிருப்பில் இருக்கிறது. அந்த அணி 3 வீரர்களை மட்டுமே தக்கவைத்ததால் ஏலத்தில் 22 வீரர்களை வாங்கலாம்.
சன்ரைசர்ஸ் ஹைதராபாத்:
தக்கவைத்த வீரர்கள்: கேன் வில்லியம்சன் (ரூ.14 கோடி), அப்துல் சமாத் (ரூ.4 கோடி), உம்ரான் மாலிக் (ரூ.4 கோடி)
சன்ரைசர்ஸ் ஹைதராபாத் அணியிடம் ரூ.68 கோடி கையிருப்பில் உள்ளது. அந்த அணி இன்னும் 22 வீரர்களை ஏலத்தில் எடுக்கமுடியும்.
ராஜஸ்தான் ராயல்ஸ்:
தக்கவைத்த வீரர்கள்: சஞ்சு சாம்சன் (ரூ.14 கோடி), ஜோஸ் பட்லர் (ரூ.10 கோடி), யஷஸ்வி ஜெய்ஸ்வால் (ரூ.4 கோடி)
ராஜஸ்தான் ராயல்ஸிடம் ரூ.62 கோடி கையிருப்பில் உள்ளது. 22 வீரர்களை ஏலத்தில் எடுக்கலாம்.
கொல்கத்தா நைட் ரைடர்ஸ்:
தக்கவைத்த வீரர்கள்: ஆண்ட்ரே ரசல் (ரூ.12 கோடி), வருண் சக்கரவர்த்தி (ரூ.8 கோடி), வெங்கடேஷ் ஐயர் (ரூ.8 கோடி), சுனில் நரைன் (ரூ.6 கோடி)
கேகேஆர் அணியிடம் ரூ.48 கோடி கையிருப்பில் உள்ளது. அந்த அணி 21 வீரர்களை ஏலத்தில் வாங்கலாம்.
டெல்லி கேபிடள்ஸ்:
தக்கவைத்த வீரர்கள்: ரிஷப் பண்ட் (ரூ.16 கோடி), அக்ஸர் படேல் (ரூ.9 கோடி), பிரித்வி ஷா (ரூ.7.5 கோடி), அன்ரிக் நோர்க்யா (ரூ.6.5 கோடி)
டெல்லி கேபிடள்ஸிடம் ரூ.47.5 கோடி கையிருப்பில் உள்ளது. இன்னும் 21 வீரர்களை ஏலத்தில் எடுக்கலாம்.
பஞ்சாப் கிங்ஸ்:
தக்கவைத்த வீரர்கள்: மயன்க் அகர்வால் (ரூ.12 கோடி), அர்ஷ்தீப் சிங் (ரூ.4 கோடி)
பஞ்சாப் கிங்ஸிடம் ரூ.72 கோடி கையிருப்பில் உள்ளது. அந்த அணி 8 வெளிநாட்டு வீரர்கள் உட்பட மொத்தம் 23 வீரர்களை ஏலத்தில் எடுக்கலாம்.
குஜராத் டைட்டன்ஸ்:
ஏலத்திற்கு முன் எடுத்த வீரர்கள்: ஹர்திக் பாண்டியா (ரூ.15 கோடி), ரஷீத் கான் (ரூ.15 கோடி), ஷுப்மன் கில் (ரூ.8 கோடி)
குஜராத் டைட்டன்ஸ் அணியிடம் ரூ.52 கோடி கையிருப்பில் உள்ளது. 22 வீரர்களை ஏலத்தில் வாங்கலாம்.
லக்னோ சூப்பர் ஜெயிண்ட்ஸ்:
ஏலத்திற்கு முன் எடுத்த வீரர்கள்: கேஎல் ராகுல் (ரூ.17 கோடி), மார்கஸ் ஸ்டோய்னிஸ் (ரூ.9.2 கோடி), ரவி பிஷ்னோய் (ரூ.4 கோடி)
லக்னோ அணியிடம் ரூ.59 கோடி கையிருப்பில் உள்ளது. 22 வீரர்களை ஏலத்தில் எடுக்கலாம்.
