கர்நாடகாவின் கார்வார் கடற்கரையில், சீனாவில் தயாரிக்கப்பட்ட ஜி.பி.எஸ் கருவி பொருத்தப்பட்ட கடற்புறா ஒன்று பிடிபட்டுள்ளது. முக்கிய கடற்படை தளத்திற்கு அருகில் கண்டெடுக்கப்பட்டதால், உளவு வேலையாக இருக்குமோ என்ற கோணத்திலும் தீவிர விசாரணை நடைபெற்று வருகிறது.
கர்நாடகாவின் கார்வார் கடற்கரைப் பகுதியில், சீனாவில் தயாரிக்கப்பட்ட ஜி.பி.எஸ் (GPS) கண்காணிப்பு கருவி பொருத்தப்பட்ட கடற்புறா (Seagull) ஒன்று கண்டெடுக்கப்பட்டுள்ளது.
இந்தியாவின் மிக முக்கியமான 'ஐ.என்.எஸ் கடம்பா' (INS Kadamba) கடற்படை தளத்திற்கு மிக அருகில் இந்தப் பறவை பிடிபட்டுள்ளதால், பாதுகாப்பு முகமைகள் தீவிர விசாரணை மேற்கொண்டு வருகின்றன.
சம்பவம் நடந்தது என்ன?
உத்தர கன்னடா மாவட்டத்தின் கார்வார் கடற்கரையில் உள்ள திம்மக்கா பூங்கா அருகே ஒரு கடற்புறாவின் முதுகில் விசித்திரமான கருவி ஒன்று இருப்பதை உள்ளூர் மக்கள் கவனித்தனர். இது குறித்து உடனடியாக வனத்துறையின் கடல்சார் பிரிவுக்குத் தகவல் தெரிவிக்கப்பட்டது.
Related Articles
வனத்துறை அதிகாரிகள் அந்தப் பறவையைப் பிடித்து ஆய்வு செய்தபோது, அதில் இருந்த ஜி.பி.எஸ் கருவியில் "சீன அறிவியல் அகாடமியின் சுற்றுச்சூழல் அறிவியல் ஆராய்ச்சி மையம்" (Research Centre for Eco-Environmental Sciences, Chinese Academy of Sciences) என்ற முத்திரை இருந்தது கண்டறியப்பட்டது.
ஆராய்ச்சியா அல்லது உளவு வேலையா?
அந்த ஜி.பி.எஸ் கருவியில் இருந்த தரவுகளை ஆய்வு செய்தபோது, அந்தப் பறவை ஆர்க்டிக் பகுதிகள் உட்பட சுமார் 10,000 கிலோமீட்டருக்கும் அதிகமான தூரம் பறந்து கர்நாடகக் கடற்கரையை வந்தடைந்தது தெரியவந்தது.
பொதுவாகக் கடற்புறாக்களின் இடம்பெயர்வு, உணவுப் பழக்கம் மற்றும் பயணப் பாதைகளை ஆய்வு செய்ய இது போன்ற கருவிகள் பொருத்தப்படுவது வழக்கம் என்று வனத்துறை அதிகாரிகள் தெரிவித்துள்ளனர். முதற்கட்ட விசாரணையில் இது ஒரு ஆராய்ச்சித் திட்டத்தின் பகுதியாக இருக்கலாம் என்றே கருதப்படுகிறது.
இருப்பினும், இந்தப் பறவை பிடிபட்ட இடம் மிகவும் முக்கியமானது. இந்தியாவின் மிகப்பெரிய போர் விமானம் தாங்கி கப்பல்கள் மற்றும் நீர்மூழ்கிக் கப்பல்கள் நிலைநிறுத்தப்பட்டுள்ள ஐ.என்.எஸ் கடம்பா கடற்படை தளத்தின் அருகே இது கண்டறியப்பட்டதால், இதில் ஏதேனும் உளவு வேலைகள் (Espionage) இருக்குமா என்ற கோணத்திலும் தொழில்நுட்ப சோதனைகள் நடத்தப்பட்டு வருகின்றன.
உயர்மட்ட விசாரணை
கார்வார் மூத்த காவல் அதிகாரி தீபன் எம்.என் இது குறித்துக் கூறுகையில், "வனத்துறையின் கடல்சார் பிரிவு இந்தப் பறவையைக் கண்டறிந்து விசாரணை நடத்தி வருகிறது. நாங்கள் அவர்களுடன் இணைந்து ஜி.பி.எஸ் கருவியின் விபரங்களைச் சரிபார்த்து வருகிறோம்," என்றார்.
மேலும், அந்தச் சீன ஆராய்ச்சி நிறுவனத்தைத் தொடர்புகொண்டு, இந்த ஆய்வின் நோக்கம் மற்றும் காலக்கெடு குறித்து விபரங்களைக் கேட்கவும் அதிகாரிகள் திட்டமிட்டுள்ளனர். கடந்த 2024 நவம்பர் மாதத்திலும், இதே போன்ற கண்காணிப்பு கருவி பொருத்தப்பட்ட 'வார் ஈகிள்' (War Eagle) ஒன்று கார்வாரில் பிடிபட்டது. ஆனால், அது வனவிலங்கு ஆராய்ச்சி தொடர்பானது என்பது பின்னர் உறுதி செய்யப்பட்டது குறிப்பிடத்தக்கது.
