கேரளாவில் இளைஞர் காங்கிரஸ் பிரமுகர் காவல் நிலையத்தில் தாக்கப்பட்ட சிசிடிவி காட்சிகள் வெளியாகி அதிர்ச்சியை ஏற்படுத்தியுள்ளன. சசி தரூர் உள்ளிட்ட எதிர்க்கட்சிகள் கடும் கண்டனம் தெரிவித்துள்ள நிலையில், அரசு எந்த அதிகாரப்பூர்வ அறிக்கையும் வெளியிடவில்லை.
கேரளாவில் குன்னம்குளம் காவல் நிலையத்தில் இளைஞர் காங்கிரஸ் பிரமுகர் ஒருவர் கொடூரமாக தாக்கப்பட்ட சிசிடிவி காட்சிகள் வெளியாகி பெரும் புயலைக் கிளப்பியுள்ளது. இந்த சம்பவத்திற்கு எதிர்க்கட்சிகள் கடும் கண்டனம் தெரிவித்துள்ளன.
வெளியான சிசிடிவி காட்சிகளில், வி.எஸ். சுஜித் என்ற இளைஞர் காங்கிரஸ் பிரமுகர் காவல் நிலையத்திற்குள் காவல்துறையினரால் கொடூரமாக தாக்கப்படுவது தெளிவாக பதிவாகியுள்ளது. இந்த காணொளி சமூக வலைதளங்களில் வேகமாகப் பரவி பெரும் அதிர்ச்சியை ஏற்படுத்தியுள்ளது.
சசி தரூர் விமர்சனம்
Related Articles
காங்கிரஸ் கட்சியின் மூத்த தலைவரும் திருவனந்தபுரம் நாடாளுமன்ற உறுப்பினருமான சசி தரூர் தனது சமூக வலைதளப் பக்கத்தில் இந்த சம்பவம் குறித்து கடும் கண்டனம் தெரிவித்துள்ளார். "குன்னம்குளத்தில் காவல் நிலையத்தில் நடைபெற்ற கொடூரமான தாக்குதல் காட்சிகளை கண்டு நான் அதிர்ச்சி அடைந்தேன். இளைஞர் காங்கிரஸ் பிரமுகர் வி.எஸ். சுஜித் மீதான இந்த கொடூரத் தாக்குதல், நம் காவல் நிலையங்கள் சித்திரவதை கூடாரங்களாக மாறி வருவதை நினைவூட்டுகிறது," என்று அவர் குறிப்பிட்டுள்ளார். மேலும், இது ஒரு தனிப்பட்ட சம்பவம் அல்ல என்றும், இது இந்த அரசில் ஏற்பட்டுள்ள ஆழமான சீர்கேட்டின் அறிகுறி என்றும் அவர் கூறியுள்ளார்.
சசி தரூர், உள்துறை அமைச்சகத்தை தன்வசம் வைத்துள்ள முதலமைச்சர் பினராயி விஜயன் பொறுப்பேற்க வேண்டும் என்று வலியுறுத்தியுள்ளார். இச்சம்பவத்தில் ஈடுபட்ட காவல்துறை அதிகாரிகள் மீது துறை ரீதியான நடவடிக்கை மட்டும் போதாது என்றும், அவர்களை பணியிலிருந்து நீக்கி, சட்டப்படி கடுமையான நடவடிக்கை எடுக்க வேண்டும் என்றும் அவர் கோரிக்கை விடுத்துள்ளார். இது மனித உரிமை மீறல் என்றும், கேரளாவின் மனசாட்சிக்கு இது ஒரு கறை என்றும் அவர் கூறியுள்ளார்.
அரசு எடுத்த நடவடிக்கை என்ன?
இதற்கிடையில், இந்த விவகாரம் தொடர்பாக மாநில அரசு இதுவரை எந்தவித அதிகாரபூர்வ அறிக்கையையும் வெளியிடவில்லை. ஆனால், திரிசூர் சரகத்தின் துணை ஆய்வாளர் (டிஐஜி) எஸ். ஹரிசங்கர், இச்சம்பவம் தொடர்பாக இரண்டு ஆண்டுகளுக்கு முன்பே துறை ரீதியான விசாரணை நடத்தப்பட்டு, குற்றவாளிகள் மீது நடவடிக்கை எடுக்கப்பட்டதாக உறுதிப்படுத்தியுள்ளார்.
குற்றவாளிகளாக கண்டறியப்பட்ட மூன்று அதிகாரிகளின் ஊதிய உயர்வு இரண்டு ஆண்டுகளுக்கு நிறுத்தப்பட்டதாகவும் அவர் தெரிவித்துள்ளார்.
எதிர்க்கட்சிகளின் எதிர்ப்பு மற்றும் குற்றச்சாட்டுகள்
டிஐஜி-யின் இந்த பதிலை எதிர்க்கட்சிகள் கடுமையாக விமர்சித்துள்ளன. எதிர்க்கட்சித் தலைவர் வி.டி. சதீசன், முதலமைச்சர் பினராயி விஜயன் சீருடை அணிந்த குற்றவாளிகளை பாதுகாக்கிறார் என்று குற்றம் சாட்டியுள்ளார். குற்றம்சாட்டப்பட்ட அதிகாரிகள் இன்னும் பணியில் இருப்பதை சுட்டிக்காட்டியுள்ள அவர், அவர்களுக்கு வழங்கப்பட்ட தண்டனை வெறும் பெயரளவுதான் என்று விமர்சித்துள்ளார்.