மகாராஷ்டிராவின் சதாரா மாவட்டத்தில், பெண் மருத்துவர் ஒருவர் தற்கொலை செய்துகொண்டார். தனது தற்கொலைக்கு காவல் உதவி ஆய்வாளர் ஒருவரின் பாலியல் வன்கொடுமையே காரணம் என அவர் உள்ளங்கையில் எழுதிய கடிதம் அதிர்ச்சியை ஏற்படுத்தியுள்ளது.
மகாராஷ்டிரா மாநிலம் சதாரா மாவட்டத்தில் உள்ள அரசு மருத்துவமனையில் பணிபுரிந்த ஒரு பெண் மருத்துவர் (35) நேற்று முன்தினம் (வியாழக்கிழமை) இரவு விடுதி அறையில் தற்கொலை செய்துகொண்ட சம்பவம் அதிர்ச்சியை ஏற்படுத்தியுள்ளது.
தற்கொலை செய்துகொண்ட மருத்துவர் தனது உள்ளங்கையில் எழுதியிருந்த கடிதத்தில், கோபால் படானே என்ற காவல் உதவி ஆய்வாளர் (PSI) கடந்த ஐந்து மாதங்களாக தன்னை பாலியல் வன்கொடுமை (Rape) செய்து, பாலியல் தொல்லை கொடுத்ததாகக் குற்றம் சாட்டியுள்ளார்.
மேலும், தனது தற்கொலைக் குறிப்பில், பிரஷாந்த் பாங்கர் என்ற மற்றொரு நபர் தன்னை மனரீதியாகத் துன்புறுத்தியதாகவும் மருத்துவர் குறிப்பிட்டுள்ளார்.
Related Articles
முதலமைச்சர் உத்தரவு
இந்தச் சம்பவம் வெளிச்சத்துக்கு வந்தவுடன், மகாராஷ்டிர முதலமைச்சரும், உள்துறைத் துறைக்குப் பொறுப்பு வகிப்பவருமான தேவேந்திர பட்னாவிஸ் நிலைமையின் தீவிரத்தைக் கருதி, சதாரா காவல்துறை கண்காணிப்பாளரிடம் (SP) தொலைபேசியில் பேசியுள்ளார்.
மருத்துவர் தனது தற்கொலைக் குறிப்பில் குறிப்பிட்டிருந்த காவல் அதிகாரி உட்பட குற்றம் சாட்டப்பட்டவர்கள் அனைவரையும் உடனடியாக பணியிடை நீக்கம் செய்யவும், அவர்கள் மீது கடுமையான நடவடிக்கை எடுக்கவும் அவர் உத்தரவிட்டுள்ளார்.
காவல் அதிகாரி சஸ்பெண்ட்
தற்கொலைக் குறிப்பு வெளிவந்ததைத் தொடர்ந்து, குற்றம் சாட்டப்பட்ட காவல் உதவி ஆய்வாளர் கோபால் படானே சஸ்பெண்ட் செய்யப்பட்டுள்ளார். மேலும், அவர் மற்றும் பிரஷாந்த் பாங்கர் ஆகியோர் மீது பாலியல் வன்கொடுமை மற்றும் தற்கொலைக்குத் தூண்டுதல் ஆகிய பிரிவுகளின் கீழ் வழக்குப்பதிவு செய்யப்பட்டுள்ளது. தலைமறைவாக உள்ள இருவரையும் தீவிரமாகத் தேடி வருவதாக சதாரா மாவட்ட காவல்துறை கண்காணிப்பாளர் தெரிவித்துள்ளார்.
மகளிர் ஆணையம் தலையீடு:
மகாராஷ்டிரா மாநில மகளிர் ஆணையம் இந்தச் சம்பவத்தைக் கவனத்தில் எடுத்துக்கொண்டுள்ளது. ஆணையத்தின் தலைவர் ரூபாலி சகாங்கர், பாதிக்கப்பட்ட பெண் மருத்துவர் முன்பே புகார் அளித்தும் ஏன் நடவடிக்கை எடுக்கப்படவில்லை என்று விசாரிக்குமாறு காவல்துறைக்கு உத்தரவிட்டுள்ளார். குற்றவாளிகள் மீது உறுதியான நடவடிக்கை எடுக்க சதாரா போலீசாருக்கு அறிவுறுத்தப்பட்டுள்ளதாகவும் அவர் எக்ஸ் தளத்தில் பதிவிட்டுள்ளார்.
எதிர்க்கட்சிகள் கண்டனம்:
மாநில காங்கிரஸ் தலைவர் விஜய் நாம்ராவ் வடெட்டிவார், இந்தச் சம்பவத்துக்கு ஆளும் மகா-யுதி அரசை கடுமையாகச் சாடினார். "பாதுகாக்க வேண்டியவர்களே வேட்டையாடுபவர்களாக மாறினால் எப்படி நீதி கிடைக்கும்? இந்த பெண் ஏற்கனவே புகார் அளித்திருந்தும் ஏன் நடவடிக்கை எடுக்கப்படவில்லை?" என்று அவர் கேள்வி எழுப்பினார். தவறான நடத்தை கொண்ட காவல்துறை அதிகாரிகள் மீது கடுமையான நடவடிக்கை எடுக்கப்படாவிட்டால், இதுபோன்ற சம்பவங்கள் தொடரும் என்றும் அவர் வலியுறுத்தியுள்ளார்.
மருத்துவப் பரிசோதனை மற்றும் தடயவியல் ஆய்வுகளின் முடிவுகள் இந்த வழக்கில் முக்கியப் பங்காற்றும் என எதிர்பார்க்கப்படுகிறது.
