தேர்தல் ஆணையத்திற்கு எதிராக நடைபெற்ற எதிர்ப்பு பேரணியில் ராகுல் காந்தி, கனிமொழி உள்ளிட்ட இந்தியா கூட்டணி எம்.பி.க்கள் டெல்லி காவல்துறையினரால் கைது செய்யப்பட்டனர்.
வாக்காளர் மோசடி குற்றச்சாட்டுகளை எதிர்த்து INDIA கூட்டணி எம்.பி.க்கள் திங்களன்று தேர்தல் ஆணையத்திற்கு பேரணி சென்றனர். ராகுல் காந்தி, பிரியங்கா காந்தி, சஞ்சய் ராவத், சாகரிகா கோஷ் உள்ளிட்டோர் கைது செய்யப்பட்டனர். கைது நடவடிக்கையின் போது செய்தியாளர்களிடம் பேசிய ராகுல் காந்தி, “உண்மை நாட்டுக்குத் தெரியும். இது அரசியல் போராட்டமல்ல. அரசியலமைப்பை காப்பாற்றும் போராட்டம். ஒரு நபர், ஒரு வாக்குக்கான போராட்டம். தூய்மையான வாக்காளர் பட்டியல் வேண்டும்” என்று கூறினார்.
Related Articles
INDIA கூட்டணியின் போராட்டம்
பீகாரில் நடைபெறும் சிறப்பு வாக்காளர் பட்டியல் திருத்தப் பணிகள் மற்றும் 2024 மக்களவைத் தேர்தலில் நடந்ததாகக் கூறப்படும் வாக்காளர் மோசடி குறித்து INDIA கூட்டணி எம்.பி.க்கள் திங்களன்று தேர்தல் ஆணையத்திற்கு எதிராகப் போராட்ட பேரணி நடத்தினர். நிர்வாசன் சதன் நோக்கிச் சென்ற எம்.பி.க்களை டெல்லி போலீசார் தடுத்தனர்.
மக்களவை எதிர்க்கட்சித் தலைவர் ராகுல் காந்தி தலைமையில் நாடாளுமன்றத்தின் மகர் துவாரில் இருந்து பேரணி தொடங்கியது. “வாக்குத் திருட்டு” குறித்த தங்கள் கவலைகளைத் தேர்தல் ஆணையத்திடம் தெரிவிக்க எம்.பி.க்கள் பேரணி நடத்தினர்.
இதற்கிடையில், எதிர்க்கட்சி எம்.பி.க்கள் பேரணிக்கு அனுமதி கோரவில்லை என்று டெல்லி போலீசார் தெரிவித்தனர்.
கைது செய்யப்பட்ட INDIA கூட்டணித் தலைவர்கள் அருகிலுள்ள காவல் நிலையத்திற்கு அழைத்துச் செல்லப்பட்டதாகவும், எத்தனை எம்.பி.க்கள் கைது செய்யப்பட்டனர் என்பதைக் கணக்கிட்டு வருவதாகவும், போராட்டத்திற்கு அனுமதி இல்லை என்றாலும் தங்களுக்குத் தகவல் வந்ததாகவும், அவர்கள் முடிவு செய்தால், தேர்தல் ஆணைய அலுவலகத்திற்குச் செல்ல வசதி செய்து தருவதாகவும், தேர்தல் ஆணையத்தில் போதுமான போலீஸ் பாதுகாப்பு இருப்பதாகவும் புது டெல்லி கூடுதல் காவல் ஆணையர் தீபக் புரோகித் தெரிவித்தார்.
30 எம்.பி.க்களுக்கு மட்டுமே தேர்தல் ஆணையம் அனுமதி அளித்ததாகவும், அதிக எண்ணிக்கையில் வந்ததால் அவர்களைக் கைது செய்ததாகவும், 30 எம்.பி.க்கள் மட்டுமே தேர்தல் ஆணையத்தைச் சந்திக்க அனுமதிக்கப்படுவார்கள் என்று தெரிவித்ததாகவும் புது டெல்லி துணை ஆணையர் தேவேஷ் குமார் மஹ்லா கூறினார்.
போலீசாரின் இந்தக் கூற்றுக்குப் பதிலளித்த காங்கிரஸ் எம்.பி. இம்ரான் பிரதாப்கர்ஹி, “அவர்கள் ஒருபோதும் அனுமதிப்பதில்லை. அரசாங்கத்தின் உத்தரவின் பேரில் அவர்கள் அரசியல் மொழியைப் பயன்படுத்துகிறார்கள். ராகுல் காந்தி தலைமையில் முழு எதிர்க்கட்சியும் பேரணி நடத்தும். அவர்கள் எங்களைத் தடுக்க முயற்சிப்பார்கள், ஆனால் தேர்தல் ஆணைய அலுவலகத்தை அடைய நாங்கள் எங்களால் முடிந்த அனைத்தையும் செய்வோம்” என்றார்.
