முட்டாள்.. அறிவு இருக்கா உனக்கு? பெண் பத்திரிகையாளர் கேள்வியால் கடுப்பாகி கத்திய டிரம்ப்!
அமெரிக்க அதிபர் டொனால்டு டிரம்ப், ஆப்கானிஸ்தான் அகதிகள் குறித்து கேள்வி கேட்ட பெண் பத்திரிகையாளரை "முட்டாள்" என்று பகிரங்கமாகத் திட்டியுள்ளார். பெண் ஊடகவியலாளர்களை நோக்கி அவர் தொடர்ந்து இழிவாகப் பேசிவருகிறார்.
டொனால்டு டிரம்ப் கோபம்
அமெரிக்க அதிபர் டொனால்டு டிரம்ப், தனக்குப் பிடிக்காத கேள்விகளைக் கேட்கும் பெண் ஊடகவியலாளர்கள் மீது இழிவான கருத்துகளைத் தெரிவிக்கும் வரிசையில், வியாழக்கிழமை அன்று ஒரு பெண் பத்திரிகையாளரைப் பார்த்து "முட்டாள்" என்று பகிரங்கமாகத் திட்டிய சம்பவம் மீண்டும் சர்ச்சையைக் கிளப்பியுள்ளது.
ஃப்ளோரிடாவில் உள்ள தனது மாளிகையில் செய்தியாளர்களைச் சந்தித்த டிரம்ப், அமெரிக்காவில் குடியேறிய ஆப்கானிஸ்தானியர்களின் தகவல் சரிபார்ப்பு (vetting) குறித்த கேள்விகளை எதிர்கொண்டார். அப்போது, ஒரு பெண் பத்திரிகையாளர் ஒரு கேள்வியைக் கேட்கத் தொடங்கியபோது, டிரம்ப் குறுக்கிட்டு, "நீ என்ன முட்டாளா?" என்று ஆவேசத்துடன் கேட்டார்.
செய்தியாளர் கேட்ட கேள்வி
2021-ல் அமெரிக்கப் படைகள் ஆப்கானிஸ்தானில் இருந்து திடீரென விலகியதைத் தொடர்ந்து, அமெரிக்காவுக்குக் வந்த ஒரு ஆப்கானிஸ்தானைச் சேர்ந்த ஒருவர் புதன்கிழமை வெள்ளை மாளிகைக்கு அருகில் துப்பாக்கிச் சூடு நடத்தினார். இதில் இரண்டு காவலர்கள் (National Guard soldiers) சுட்டுக் கொல்லப்பட்டனர்.
அமெரிக்காவிற்குக் கொண்டு வரப்பட்ட ஆப்கானிஸ்தானியர்கள் குறித்து முன்னாள் அதிபர் ஜோ பிடனை ஏன் குற்றம் சாட்டுகிறீர்கள் என்று அந்தப் பத்திரிகையாளர் கேள்வி எழுப்பினார்.
டிரம்பின் பதிலடி
இதற்கு ஆக்ரோஷமாகப் பதிலளித்த டிரம்ப், ஜோ பிடன் அரசுதான் ஆப்கானிஸ்தான் நாட்டினரை நாட்டிற்குள் அனுமதித்தனர் என்று என்று சீறினார். தாலிபன்கள் மீண்டும் அதிகாரத்தைக் கைப்பற்றியபோது, ஒரு அமெரிக்க இராணுவ விமானத்தில் முழுக்க மக்கள் ஏறியிருக்கும் காட்சியின் படத்தைக் கையில் வைத்திருந்தவாறே அவர் பேசினார்.
"நீங்கள் ஒரு முட்டாள்தனமான நபர் என்பதால்தான் இந்தக் கேள்விகளைக் கேட்கிறீர்கள்," என்று டிரம்ப் கடுமையாகச் சாடினார்.
தொடரும் இழிவான பேச்சுகள்
அதிபர் டிரம்பின் செய்தியாளர் சந்திப்புகளில் ஆவேசமான பேச்சுக்களும், இழிவான கருத்துக்களும் உதிர்க்கப்படுவது வாடிக்கையாகிவிட்டது. குறிப்பாகப் பெண் பத்திரிகையாளர்கள் மீது அவர் தனது கோபத்தை வெளிப்படுத்துவது அடிக்கடி நடக்கிறது.
முன்னதாக, டிரம்பிற்கு வயதானதால் ஏற்பட்ட உடல்நலப் பிரச்சினைகள் பற்றி நியூயார்க் டைம்ஸ் பத்திரிகையில் கட்டுரை எழுதிய பெண் பத்திரிகையாளரை "அசிங்கமானவர்" (ugly) என்று திட்டினார்.
இந்த மாதத்தின் தொடக்கத்தில் ஒரு பெண் பத்திரிகையாளரை "பன்றி" (piggy) என்று ஏசினார். மற்றொருவரை "பயங்கரமான நபர்" (a terrible person) என்றும் குறைகூறினார்.
ஊடகங்களில் உள்ள பெண்களுக்கு எதிராக டிரம்ப் தொடர்ந்து பயன்படுத்தி வரும் இத்தகைய தரக்குறைவான வார்த்தைகள், அவரது பாணியாகவே இருப்பது மீண்டும் ஒருமுறை வெளிச்சத்திற்கு வந்துள்ளது.
