டிஜிட்டல் உலகில் மறுபிறவி? மெட்டாவின் புதிய திட்டம் ஏற்படுத்தும் வியப்பு!
Meta இறந்தவர்களின் சோஷியல் மீடியா கணக்குகளை AI மூலம் இயக்கும் தொழில்நுட்பத்திற்கு மெட்டா காப்புரிமை பெற்றுள்ளது. இது டிஜிட்டல் மறுபிறவியா? முழு விவரம்.
Meta
நாம் இறந்த பிறகு நமது ஃபேஸ்புக், இன்ஸ்டாகிராம் கணக்குகள் என்னவாகும் என்று எப்போதாவது யோசித்திருக்கிறீர்களா? பொதுவாக, அவை 'நினைவுப் பக்கங்களாக' (Memorialized accounts) மாற்றப்படும். ஆனால், மெட்டா (Meta) நிறுவனம் இப்போது ஒரு படி மேலே சென்று, இறந்தவர்களின் சமூக வலைத்தள செயல்பாடுகளை செயற்கை நுண்ணறிவு (AI) மூலம் தொடரச் செய்யும் புதிய தொழில்நுட்பத்திற்கான காப்புரிமையைப் பெற்றுள்ளது.
எப்படி செயல்படும் இந்த AI?
மெட்டா நிறுவனம் 2023-ல் தாக்கல் செய்த இந்த காப்புரிமைக்கு (Patent) இப்போது ஒப்புதல் கிடைத்துள்ளது. இதன்படி, ஒரு பயனர் இறந்தாலோ அல்லது நீண்ட காலம் சமூக வலைத்தளங்களில் ஆக்டிவாக இல்லாவிட்டாலோ, ஒரு பிரத்யேக AI அமைப்பு அந்த பயனரைப் போலவே செயல்படத் தொடங்கும். இதற்காக, அந்த பயனர் முன்பு பதிவிட்ட பதிவுகள் (Posts), கமெண்ட்கள், மெசேஜ்கள் மற்றும் ரியாக்ஷன்கள் ஆகியவற்றை AI கற்றுக்கொள்ளும்.
டிஜிட்டல் இரட்டையர் (Digital Twin)
சுருக்கமாகச் சொன்னால், இது உங்களைப் போலவே சிந்தித்துச் செயல்படும் ஒரு 'டிஜிட்டல் இரட்டையரை' உருவாக்கும் முயற்சி. நீங்கள் எப்படிப் பேசுவீர்கள், எப்படி பதில் அளிப்பீர்கள் என்பதைத் துல்லியமாகக் கணித்து, உங்கள் இல்லாத குறையைத் தீர்க்கும் வகையில் இந்த AI சாட்பாட் (Chatbot) செயல்படும். இது இறந்தவர்களின் உறவினர்களுக்கு ஆறுதலாக இருக்கும் என்று மெட்டா தரப்பில் கூறப்படுகிறது.
'க்ரீஃப் டெக்' (Grief Tech) என்ற புதிய உலகம்
இறந்தவர்களை டிஜிட்டல் முறையில் உயிர்ப்பிக்கும் தொழில்நுட்பம் 'க்ரீஃப் டெக்' என்று அழைக்கப்படுகிறது. ஏற்கனவே மைக்ரோசாஃப்ட் (Microsoft) போன்ற நிறுவனங்கள் இதற்கான காப்புரிமையை வைத்துள்ளன. இருப்பினும், இது பல தார்மீகக் கேள்விகளை எழுப்புகிறது. ஒருவரின் அனுமதியின்றி அவரைப் போலவே AI செயல்படுவது சரியா? இது தவறாகப் பயன்படுத்தப்பட்டால் என்ன செய்வது? போன்ற விவாதங்கள் எழுந்துள்ளன.
மெட்டாவின் விளக்கம்
தற்போது இது வெறும் காப்புரிமை மட்டுமே என்றும், இப்போதைக்கு இதை நடைமுறைக்குக் கொண்டுவரும் திட்டம் இல்லை என்றும் மெட்டா தெரிவித்துள்ளது. பல தொழில்நுட்ப நிறுவனங்கள் எதிர்காலத் தேவைகளுக்காகப் பல காப்புரிமைகளைப் பதிவு செய்வது வழக்கம். ஆனால், பிளாக் மிரர் (Black Mirror) வெப் சீரிஸில் வருவது போல, எதிர்காலத்தில் நாம் இல்லாமலே நம் சோஷியல் மீடியா கணக்குகள் இயங்கும் நாள் வெகு தொலைவில் இல்லை என்றே தோன்றுகிறது.
ஸ்மார்ட்போன்கள் மற்றும் AI முதல் சைபர் பாதுகாப்பு, அறிவியல் முன்னேற்றங்கள் வரை — சமீபத்திய தொழில்நுட்ப (Technology News in Tamil) அப்டேட்களை தொடர்ச்சியாக பெறுங்கள். டிஜிட்டல் டிரெண்ட்ஸ் குறித்து நிபுணர்களின் கருத்துகள், விரிவான தகவல்கள் மற்றும் பிரேக்கிங் நியூஸை வழங்கும் ஒரே தளம் ஏஷ்யாநெட் தமிழ் நியூஸ்.புதிய கேஜெட் ரிலீஸ் ஆனதா? புதிய ஸ்டார்ட்அப்புகள் வந்தவையா? எதிர்காலத்தை மாற்றக்கூடிய எந்த டெக் பாலிஸி வந்துள்ளது? இவை அனைத்திற்கும் சிறு சிறு தகவல்கள் இங்கு கிடைக்கும். டெக் விளக்கக் குறிப்புகள் மற்றும் கேஜெட் டெமோ வீடியோக்களையும் நீங்கள் பார்க்கலாம்.
