கொளுத்தும் வெயிலுக்கு எப்போ எண்டு கார்டு தெரியுமா? பிரதீப் ஜான் கொடுத்த லேட்டஸ்ட் அப்டேட்

வானிலை முன்னறிவிப்பு

தமிழகத்தில் கடந்த சில நாட்களாக வெளியிலின் தாக்கம் உச்சத்தை அடைந்துள்ளது. ஏப்ரல் மாதத்தில் கொளுத்தும் வெயிலை விட தற்போது அதிகமாக அனல் காற்று வீசிவருகிறது. இதனால் மக்கள் வீடுகளில் இருந்து வெளியவே வரமுடியாத நிலை நீடித்து வருகிறது. இதனால் எப்போது வெயில் குறையும் என மக்கள் ஆவலோடு காத்துள்ளனர்.

இந்த நிலையில் இது தொடர்பாக சென்னை வானிலை ஆய்வு மையம் வெளியிட்டுள்ள அறிவிப்பில், சென்னை, மதுரை, திருச்சி உள்ளிட்ட பல மாவட்டங்களில் வெயிலின் தாக்கமானது உச்சத்தில் இருப்பதாக தெரிவிக்கப்பட்டுள்ளது. மேலும் மேற்கு திசை காற்றின் வேகமாறுபாடு காரணமாக, இன்று மற்றும் நாளை (18.09.2024 மற்றும் 19.09.2024) தமிழகத்தில் ஒரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும் என தெரிவிக்கப்பட்டுள்ளது. 

வெப்ப எச்சரிக்கை

தமிழகத்தில் அடுத்த 2 தினங்களுக்கு (18.09.2024 மற்றும் 19.09.2024) அதிகபட்ச வெப்பநிலை ஒருசில இடங்களில் 2"-4" செல்சியஸ் இயல்பை விட அதிகமாக இருக்கக்கூடும். அதிக வெப்பநிலை மற்றும் அதிக ஈரப்பதம் இருக்கும் பொழுது ஓரிரு இடங்களில் அசௌகரியம் ஏற்படலாம் என எச்சரிக்கை விடுத்துள்ளது. 

சென்னை வானிலை முன்னறிவிப்பு:

அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 38-39" செல்சியஸை ஒட்டியும், குறைந்தபட்ச வெப்பநிலை 28-29° செல்சியஸை ஒட்டியும் இருக்கக்கூடும் என கூறப்பட்டுள்ளது. 
 

மீனவர்களுக்கான எச்சரிக்கை:

தமிழக கடலோரப்பகுதிகள்:

18.09.2024 முதல் 22,09.2024 வரை: மன்னார் வளைகுடா, தென்தமிழக கடலோரப்பகுதிகள் மற்றும் அதனை ஒட்டிய குமரிக்கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும்.

வங்கக்கடல் பகுதிகள்:

18.09.2024 முதல் 22.09.2024 வரை: தெற்கு வங்கக்கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும் என தெரிவிக்கப்பட்டுள்ளது. 

தமிழ்நாடு வெதர்மேன் அப்டேட்

மேற்கு திசையில் இருந்து வீசும் தரைக்காற்று வெப்பமாக இருப்பதன் காரணமாகவே தமிழகத்தில் வெயில் சுட்டெரித்து வருவதாக தனியார் வானிலை ஆய்வாளர் பிரதீப் ஜான் தெரிவித்துள்ளார். இதுவரை இல்லாத வகையில் செப்டம்பர் மாதத்தில் வெயில் அதிகரித்ததுள்ளதாக கூறினார். நேற்று மட்டும் மதுரை மற்றும் சென்னையில் வெயில் உச்சத்தில் இருந்ததாக தெரிவித்துள்ளார். 22 ஆண்டுகளுக்குப் பின் செப்டம்பர் மாதத்தில் நேற்று சென்னையில் அதிகபட்ச வெயில் பதிவாகி உள்ளதாக கூறினார். இந்த வெயிலின் தாக்கம் இன்னும் இரண்டு நாட்களுக்கு நீடிக்கும் எனவும் தெரிவித்துள்ளார். 

வானிலை ஆய்வாளர்கள் தகவல்

கேரளாவில் இருந்து தமிழகம் நோக்கி வரவேண்டிய ஈரக்காற்றுதிசை மாறியதால், வெயிலின் தாக்கம் கடுமையாக உள்ளதாக தெரிவித்துள்ள வானிலை ஆய்வாளர்கள், வருகிற 22ஆம் தேதி  வங்கக்கடலில் புதிதாக காற்றழுத்தத் தாழ்வுப் பகுதி உருவாக வாய்ப்பு இருப்பதாகவும் இதன் காரணமாக மேற்கில் இருந்து தமிழகம் நோக்கி ஈரக்காற்று திரும்ப வாய்ப்புள்ளதால் வெயிலின் தாக்கம் வருகிற ஞாயிற்றுக்கிழமைக்கு பிறகு குறைய வாய்ப்பு இருப்பதாக தெரிவித்துள்ளனர்.