ட்ரோன் இயக்க பயிற்சி மட்டுமல்ல கடன் உதவியோடு மானியமும்.! தமிழக அரசு சூப்பர் அறிவிப்பு

தமிழக அரசு இளைஞர்களுக்கு வேலைவாய்ப்பு மற்றும் தொழில் தொடங்க பல்வேறு திட்டங்களை செயல்படுத்தி வருகிறது. சென்னையில் ட்ரோன் பயிற்சி தொழில் முனைவோர் மேம்பாட்டு திட்டத்தின் கீழ் நடைபெற உள்ளது. இதில் ட்ரோன் தொழில்நுட்பம், ஒளிப்பதிவு, விதிமுறைகள் குறித்து பயிற்சி அளிக்கப்படும்.

தமிழக அரசு இளைஞர்களுக்கு வேலைவாய்ப்பை ஏற்படுத்தி கொடுத்திடும் வகையில் பல்வேறு திட்டங்களை செயல்படுத்தி வருகிறது. அந்த வகையில் பல்வேறு வெளிநாட்டு நிறுவனங்களை தமிழகத்தில் தொழில் தொடங்கிடும் வகையில் ஒப்பந்தங்கள் மேற்கொள்ளப்பட்டு வருகிறது. இதன் காரணமாக பல லட்சம் இளைஞர்களுக்கு வேலைவாய்ப்பு கிடைத்து வருகிறது. இதற்காக ஓவ்வொரு மாவட்டத்திலும் சிறப்பு வேலை வாய்ப்பு முகாமை நடத்தி வருகிறது.

இது மட்டுமில்லாமல் சொந்த தொழில் செய்ய விரும்புபவர்களுக்காக  பயிற்சியும் அளித்து கடனுதிக்கான வழிகாட்டியும் வருகிறது. அந்த வகையில் பேக்கரி தொழில், அழகு சாதனை பொருட்கள் தயாரித்தல், மூலிகை பொருட்கள் தயாரித்தல் போன்ற பல்வேறு சிறப்பு பயிற்சி வகுப்புகளை நடத்தி வருகிறது. 

ட்ரோன் இயக்க 3 நாள் பயிற்சி வகுப்புகள்

இந்த நிலையில் தமிழக அரசின் தொழில் முனைவோர் மேம்பாடு மற்றும் புத்தாக்க நிறுவனம், சென்னையில், 3 நாட்கள் தொழில் முனைவோர் மேம்பாட்டு திட்டம் ட்ரோன் பயிற்சி வரும் 18.03..2025 முதல் 20.03.2025 தேதி வரை காலை 9.30 மணி முதல் மதியம் 6.00 மணி வரை நடைபெற உள்ளதாக தெரிவிக்கப்பட்டுள்ளது.

இதன் படி  இப்பயிற்சியில் ட்ரோன் விதிமுறைகள் & ட்ரோன் தொழில்நுட்ப அறிமுகம்,  ட்ரோன் ஒளிப்பதிவு நுட்பங்கள், வான்வழி புகைப்படம் எடுத்தல் பற்றிய கண்ணோட்டம், FPV ஒளிப்பதிவு DGCA இன் கீழ் விமான விதிமுறைகள் மற்றும் பாதுகாப்பு போன்றவை கற்றுத்தரப்படும் என கூறப்பட்டுள்ளது. 

பயிற்சியில் கலந்து கொள்ள தகுதிகள்

மேலும் ட்ரோன் பயிற்சி வகுப்பின் போது அரசு வழங்கும் உதவி திட்டங்கள்  மற்றும் மானியங்கள் ஆகியவையும் விளக்கப்படும் என கூறப்பட்டுள்ளது. எனவே இப்பயிற்சியில் ஆர்வமுள்ள தொழில்முனைவோர் (ஆண்/பெண்) 18 வயதுக்கு மேற்பட்ட குறைந்தபட்ச கல்வித் தகுதி 10வது வகுப்புடன் விண்ணப்பிக்கலாம். இப்பயிற்சியில் பங்குபெறும் பயனாளிகளுக்கு குறைந்த வாடகையில் குளிரூட்டப்பட்ட தங்கும் விடுதி உள்ளது தேவைப்படுவோர் இதற்கு விண்ணப்பித்து பெற்றுக் கொள்ளலாம் என தெரிவிக்கப்பட்டுள்ளது. 

தொடர்பு கொள்ள வேண்டிய முகவரி

ட்ரோன் பயிற்சி வகுப்பு பற்றிய கூடுதல் விவரங்களை பெற விரும்புவோர் www.editn.in என்ற வலைத்தளத்தில் தெரிந்து கொள்ளலாம். மேலும் விவரங்களுக்கு அலுவலக வேலை நாட்களில் (திங்கள் முதல் வெள்ளி வரை) காலை 10 மணி முதல் மாலை 5.45 மணி வரை தொடர்பு கொள்ள வேண்டிய முகவரி மற்றும் தொலைபேசி / கைபேசி எண்கள்.

தமிழ்நாடு தொழில் முனைவோர் மேம்பாடு மற்றும் புத்தாக்க நிறுவனம், சிட்கோ தொழிற்பேட்டை, இடிஐஐ அலுவலக சாலை ஈக்காட்டுத்தாங்கல்,- 600032. 8668108141/8668102600/7010143022. இந்த பயிற்சி வகுப்பில் கலந்து கொள்ள முன்பதிவு அவசியம் என தெரிவிக்கப்பட்டுள்ளது.