வான்கடேனாலே வான வேடிக்கை தான்.. இங்கிலாந்தை வீழ்த்தி இறுதிப் போட்டிக்கு தகுதி பெறுமா இந்தியா..?

டி20 உலகக்கோப்பை தொடரின் இரண்டாவது அரையிறுதிப் போட்டியில் இந்தியா, இங்கிலாந்து அணிகள் இன்று மும்பை வான்கடே மைதானத்தில் மோதுகின்றன. இந்த போட்டியில் வெற்றி பெறும் அணி இறுதிப் போட்டியில் நியூசிலாந்து அணியுடன் மோதும்.

Image Credit : Getty

இந்தியா Vs இங்கிலாந்து..

கிரிக்கெட் உலகின் மிகப்பெரிய திருவிழாவான டி20 உலகக் கோப்பை அதன் உச்சகட்டத்தை எட்டியுள்ளது. இன்று இரவு 7:00 மணிக்கு மும்பை வான்கடே மைதானத்தில் நடைபெறும் இரண்டாவது அரையிறுதிப் போட்டியில், பலம் வாய்ந்த இந்திய அணி சம பலத்துடன் வலம் வரும் இங்கிலாந்தை எதிர்கொள்கிறது. 2022 மற்றும் 2024-க்குப் பிறகு, மூன்றாவது முறையாக ஒரு உலகக் கோப்பை அரையிறுதியில் இந்த இரு அணிகளும் மோதுவதால், இது ஒரு 'ஹாட்ரிக்' மோதலாக ரசிகர்களால் பார்க்கப்படுகிறது.

Image Credit : Getty

இந்தியாவின் அதிரடிப் பயணம்

சூர்யகுமார் யாதவ் தலைமையிலான இந்திய அணி, லீக் சுற்றில் ஒரு தோல்வியைக் கூட சந்திக்காமல் கம்பீரமாக சூப்பர் 8 சுற்றுக்கு முன்னேறியது. இருப்பினும், சூப்பர் 8 சுற்றில் தென்னாப்பிரிக்காவிடம் தோல்வியைத் தழுவியது ரசிகர்களுக்கு சற்று அதிர்ச்சியை ஏற்படுத்தியது. ஆனால், வாழ்வா-சாவா என்ற கட்டாயத்தில் ஜிம்பாப்வே மற்றும் வெஸ்ட் இண்டீஸ் அணிக்கு எதிராக அதிரடியாக விளையாடிய இந்திய அணி வெற்றி பெற்று அரையிறுதிக்கு தகுதி பெற்றது. குறிப்பாக மேற்கிந்திய தீவுகளுக்கெதிரான போட்டியில் சஞ்சு சாம்சனின் அதிரடியான 97* (50 பந்துகள்) ரன்களின் உதவியுடன் இந்தியா வெற்றி பெற்றது.

தற்போது வரை இந்தியாவின் பேட்டிங்கில் கேப்டன் சூர்யகுமார் யாதவ் (231 ரன்கள்) மற்றும் இஷான் கிஷன் முன்னிலையில் உள்ளனர். பந்துவீச்சில் வருண் சக்கரவர்த்தி 12 விக்கெட்டுகளுடன் மிரட்டி வருகிறார். இருப்பினும், இன்றைய போட்டியில் இங்கிலாந்து வீரர்களைக் கட்டுப்படுத்த 'மிஸ்டரி ஸ்பின்னர்' வருணுக்குப் பதிலாக அனுபவ வீரர் குல்தீப் யாதவ் களமிறக்கப்படலாம் என எதிர்பார்க்கப்படுகிறது.

Image Credit : X/ICC

மீண்டெழுந்த இங்கிலாந்து

மறுபுறம், ஹாரி புரூக் தலைமையிலான இங்கிலாந்து அணி இந்தத் தொடரில் மிகவும் சவாலான பாதையைக் கடந்து வந்துள்ளது. நேபாளத்திற்கு எதிரான லீக் போட்டியில் வெறும் 4 ரன்கள் வித்தியாசத்தில் தட்டுத்தடுமாறி வெற்றி பெற்ற அந்த அணி, சூப்பர் 8 சுற்றில் விஸ்வரூபம் எடுத்தது. பாகிஸ்தான், இலங்கை மற்றும் நியூசிலாந்து ஆகிய அணிகளைத் தோற்கடித்து தனது பிரிவில் முதலிடம் பிடித்து அரையிறுதிக்குத் தகுதி பெற்றது. ஹாரி புரூக் (228 ரன்கள்) மற்றும் வில் ஜாக்ஸ் ஆகியோரது அதிரடி ஆட்டம் இந்தியாவுக்கு பெரும் அச்சுறுத்தலாக இருக்கும்.

Image Credit : X@BCCI

மைதானம் மற்றும் வானிலை

அதிரடி ரன் குவிப்புக்கு பெயர் பெற்ற மும்பை வான்கடே மைதானம் பொதுவாக பேட்ஸ்மேன்களுக்கு சொர்க்கமாகக் கருதப்பட்டாலும், சமீபத்திய வெப்ப நிலை காரணமாக புற்கள் ஓரளவு பராமரிக்கப்பட்டுள்ளன. இது வேகப்பந்து வீச்சாளர்களுக்கு ஆரம்பத்தில் கைகொடுக்கலாம். மாலை நேரத்தில் பனிப்பொழிவு (Dew factor) இருக்கும் என்பதால், டாஸ் வெல்லும் அணி முதலில் பந்துவீச்சைத் தேர்வு செய்யவே அதிக வாய்ப்புள்ளது.

இந்தியாவின் கோட்டை வான்கடே..?

சர்வதேச டி20 போட்டிகளில் வான்கடே மைதானத்தில் இந்திய அணியின் செயல்பாடுகள் குறித்த முக்கிய விவரங்கள் இதோ:

ஒட்டுமொத்த சாதனை விளையாடிய போட்டிகள்: 7

வெற்றிகள்: 5

தோல்விகள்: 2

வெற்றி சதவீதம்: சுமார் 71%

இந்திய அணி இந்த மைதானத்தில் கடைசியாக 2016-ஆம் ஆண்டு (மேற்கிந்தியத் தீவுகளுக்கு எதிராக) ஒரு டி20 போட்டியில் தோற்றது. அதன்பிறகு கடந்த 9 ஆண்டுகளாக இங்கு விளையாடிய அனைத்து டி20 போட்டிகளிலும் இந்தியா தோல்வியே சந்திக்காமல் வெற்றி நடை போட்டு வருகிறது.

உத்தேச லெவன்:

இந்தியா: சஞ்சு சாம்சன், இஷான் கிஷன், திலக் வர்மா, சூர்யகுமார் யாதவ் (C), ஹர்திக் பாண்டியா, ரிங்கு சிங்/ஷிவம் துபே, அக்சர் படேல், வாஷிங்டன் சுந்தர், ஜஸ்பரீத் பும்ரா, அர்ஷ்தீப் சிங், குல்தீப் யாதவ்/வருண் சக்கரவர்த்தி.

இங்கிலாந்து: பில் சால்ட், ஜோஸ் பட்லர், வில் ஜாக்ஸ், ஹாரி புரூக் (C), லியாம் லிவிங்ஸ்டன், சாம் கர்ரன், ஜேமி ஓவர்டன், ஜோஃப்ரா ஆர்ச்சர், ஆதில் ரஷித், ரீஸ் டாப்லி.