ஐபிஎல் 2026: சிங்க நடை போடும் விராட்.! சரித்திரம் படைத்த கோலி.! புதிய வரலாறு படைத்த ஆர்சிபி நாயகன்!

குஜராத் அணிக்கு எதிரான போட்டியில், விராட் கோலி இந்திய மண்ணில் 10,000 டி20 ரன்களைக் கடந்த முதல் வீரர் என்ற உலக சாதனையை படைத்தார். மேலும், ஆர்சிபி அணிக்காக 300 சிக்சர்கள் மற்றும் 800 பவுண்டரிகளை விளாசிய முதல் வீரர் என்ற பெருமையையும் பெற்றார்.

Image Credit : ANI

புதிய வரலாறு படைத்த ஆர்சிபி நாயகன்!

ஐபிஎல் திருவிழா 18-வது ஆண்டாக கலைகட்டி வரும் நிலையில், கிரிக்கெட் உலகின் கண்கள் அனைத்தும் பெங்களூருவின் சின்னசாமி மைதானத்தை நோக்கியே திரும்பியுள்ளன. சாதனைகள் என்பது முறியடிக்கப்படுவதற்கே என்பதை ஒவ்வொரு போட்டியிலும் நிரூபித்து வரும் 'ரன் மெஷின்' விராட் கோலி, குஜராத் அணிக்கு எதிரான ஆட்டத்தில் மீண்டும் ஒருமுறை தனது ஆதிக்கத்தை நிலைநாட்டியுள்ளார். ஒரு வீரராக மட்டுமின்றி, ஒரு சகாப்தமாக கிரிக்கெட் வரலாற்றின் பக்கங்களில் தனது பெயரை தங்க எழுத்துக்களால் பொறித்துள்ளார் கோலி.

Image Credit : Getty

இந்திய மண்ணில் இமாலய மைல்கல்

டி20 கிரிக்கெட் வரலாற்றில் இதுவரை எந்தவொரு வீரரும் செய்யாத ஒரு பிரம்மாண்ட சாதனையை விராட் கோலி நேற்று நிகழ்த்திக் காட்டினார். ஒரே நாட்டில் விளையாடி 10,000 டி20 ரன்களைக் கடந்த உலகின் முதல் வீரர் என்ற வரலாற்றுச் சிறப்பை அவர் பெற்றார். இந்தப் போட்டியில் 49 ரன்களைக் கடந்தபோது, இந்திய மண்ணில் இந்த 10,000 ரன்கள் என்ற இமாலய இலக்கை அவர் எட்டினார். இவருக்கு அடுத்த இடத்தில் இருக்கும் ரோஹித் சர்மா 8,563 ரன்களுடன் நீண்ட தூரத்தில் இருப்பது, கோலியின் அசாத்தியமான நிலைத்தன்மையை பறைசாற்றுகிறது.

Image Credit : ANI

ஆர்சிபி-யின் தூணாக 'மெகா' சாதனை

ராயல் சேலஞ்சர்ஸ் பெங்களூரு அணிக்காக தொடக்கம் முதலே விளையாடி வரும் கோலி, அந்த அணிக்காக மற்றுமொரு மைல்கல்லை எட்டியுள்ளார். ஐபிஎல் வரலாற்றில் ஒரே அணிக்காக விளையாடி 300 சிக்சர்கள் மற்றும் 800 பவுண்டரிகளை விளாசிய முதல் வீரர் என்ற பெருமையை அவர் தட்டிச் சென்றார். 8 பவுண்டரிகள் மற்றும் 4 சிக்சர்களை பறக்கவிட்ட கோலியின் ஆட்டம், ரசிகர்களுக்கு விருந்தாக அமைந்தது மட்டுமின்றி, எதிரணி பந்துவீச்சாளர்களை நிலைகுலையச் செய்தது.

Image Credit : X

தவறிய கேட்சும்.. தப்பிய வாய்ப்பும்..

ஆட்டத்தின் முதல் பந்திலேயே கோலி கொடுத்த கேட்ச் வாய்ப்பை குஜராத் அணி கோட்டை விட்டது. புலிக்குக் கிடைத்த அந்த ஒரு வாய்ப்பு, குஜராத் அணியின் தோல்விக்கு அச்சாரமாக அமைந்தது. தப்பிப் பிழைத்த கோலி, அதன் பிறகு மைதானத்தின் நாலாபுறமும் பந்துகளை சிதறடித்தார். ஒருபுறம் ஐபிஎல் தொடரில் 9,000 ரன்கள் என்ற சாதனையை எட்ட இன்னும் 11 ரன்களே தேவை என்ற நிலையில் 81 ரன்களில் அவர் ஆட்டமிழந்தது ரசிகர்களுக்குச் சற்று ஏமாற்றமாக அமைந்தாலும், அவர் படைத்த உலக சாதனைகள் அந்த வருத்தத்தைப் போக்கியுள்ளன.

Image Credit : Getty

வெற்றிப் பாதையில் பெங்களூரு

குஜராத் அணியின் இளம் வீரர் சாய் சுதர்சன் அதிரடியாக சதம் விளாசி 205 ரன்கள் என்ற சவாலான இலக்கை நிர்ணயித்த போதிலும், கோலி மற்றும் தேவ்தூத் படிக்கல் கூட்டணியின் நிதானமான மற்றும் அதிரடியான ஆட்டத்தால் பெங்களூரு அணி 18.5 ஓவர்களிலேயே வெற்றியை ருசித்தது. இந்த 5 விக்கெட் வித்தியாசத்திலான வெற்றியின் மூலம், புள்ளிப் பட்டியலில் இரண்டாம் இடத்திற்கு முன்னேறி பிளே-ஆஃப் வாய்ப்பை பெங்களூரு அணி உறுதி செய்துள்ளது.

Image Credit : ANI

வயது வெறும் எண்கள் மட்டுமே

வயது வெறும் எண்கள் மட்டுமே என்பதைத் தனது பேட்டிங் மூலம் நிரூபித்து வரும் விராட் கோலி, நேற்றைய போட்டியின் மூலம் மீண்டும் ஒருமுறை 'கிங் கோலி' என்பதை மெய்ப்பித்துள்ளார். ஒரே நாட்டில் 10,000 ரன்கள், ஒரு அணிக்காக அதிகப்படியான பவுண்டரி, சிக்சர்கள் என அவர் படைத்த சாதனைகள் எதிர்கால வீரர்களுக்கு ஒரு பெரும் சவாலாகவே இருக்கும் என்பதில் ஐயமில்லை.