ஐபிஎல் 2025: விராட் கோலியின் 973 ரன் சாதனையை தூள் தூளாக்கப் போகும் 5 வீரர்கள்!

விராட் கோலியின் 2016 ஐபிஎல் சாதனையான 973 ரன்களை இன்னும் யாரும் முறியடிக்கவில்லை. வரவிருக்கும் ஐபிஎல் 2025 சீசனில் இந்த சாதனையை முறியடிக்க சாத்தியமான 5 வீரர்கள் உள்ளனர்.

ராயல் சேலஞ்சர்ஸ் பெங்களூரு (ஆர்சிபி) அணியின் நட்சத்திர வீரர் விராட் கோலி 2016 ஐபிஎல் சீசனில் பல சாதனைகளை படைத்தார். ஐபிஎல் வரலாற்றில் அதிக ரன்கள் மற்றும் அதிக பேட்டிங் சராசரி உட்பட பல சாதனைகளை அவர் முறியடித்தார். 2016 ஐபிஎல் தொடரில், கோலி 16 போட்டிகளில் 4 சதங்கள் மற்றும் ஏழு அரை சதங்கள் உட்பட 81.08 சராசரியுடன் 973 ரன்கள் குவித்தார். 

விராட் கோலி இந்த வரலாற்று சாதனையை நிகழ்த்தி ஒன்பது வருடங்கள் ஆகிவிட்டன. எந்தவொரு பேட்ஸ்மேனும் ஒரு ஐபிஎல் சீசனில் அதிக ரன்கள் எடுத்த அவரது சாதனையை நெருங்கவில்லை. இருப்பினும், ஐபிஎல் 2025 நெருங்கி வருவதால், புதிய தலைமுறை வீரர்கள் கோலியின் இந்த சாதனையை முறியடிக்க வாய்ப்புள்ளது. கோலியின் 973 ரன்கள் சாதனையை முறியடிக்கக்கூடிய ஐந்து வீரர்களை பார்க்கலாம்.

சுப்மன் கில்

குஜராத் டைட்டன்ஸ் அணியின் கேப்டன் சுப்மன் கில் சர்வதேச கிரிக்கெட் மற்றும் ஐபிஎல் போட்டிகளில் வேகமாக முன்னேறி வருகிறார். அவர் விராட் கோலியின் வாரிசாக கருதப்படுகிறார். 2023 ஐபிஎல் தொடரில், சுப்மன் கில் விராட் கோலியின் 973 ரன்கள் சாதனையை நெருங்கி, 17 போட்டிகளில் 3 சதங்கள் மற்றும் 4 அரை சதங்கள் உட்பட 59.33 சராசரியுடன் 890 ரன்கள் குவித்தார்.

கடந்த சீசனில், 25 வயதான கில், 12 போட்டிகளில் ஒரு சதம் மற்றும் இரண்டு அரை சதங்கள் உட்பட 38.73 சராசரியுடன் 426 ரன்கள் எடுத்தார். கில் கடந்த ஐந்து ஐபிஎல் சீசன்களிலும் தொடர்ந்து சிறப்பாக விளையாடி ஒவ்வொரு சீசனிலும் 400 ரன்களுக்கு மேல் குவித்துள்ளார். அவரது நிலைத்தன்மை மற்றும் பெரிய ரன்கள் எடுக்கும் திறமையால் வரவிருக்கும் ஐபிஎல் சீசனில் விராட் கோலியின் சாதனையை முறியடிக்கக்கூடிய வீரர்களில் ஒருவராக இருக்கிறார்.

அபிஷேக் சர்மா

விராட் கோலியின் 973 ரன்கள் சாதனையை முறியடிக்கக்கூடிய மற்றொரு வீரர் சன்ரைசர்ஸ் ஹைதராபாத் அணியின் அதிரடி ஆட்டக்காரர் அபிஷேக் சர்மா. கடந்த ஐபிஎல் சீசனில், அபிஷேக் பேட்டிங்கில் சிறப்பாக செயல்பட்டு, 32.26 சராசரியுடன் மற்றும் 204.21 என்ற அற்புதமான ஸ்ட்ரைக் ரேட்டுடன் மூன்று அரை சதங்கள் உட்பட 484 ரன்கள் குவித்தார். அவரும் டிராவிஸ் ஹெட்டும் அதிரடியாக விளையாடி கடந்த சீசனில் சிறந்த தொடக்க ஆட்டக்காரர்களாக இருந்தனர். 

24 வயதான இவர், கடந்த மாதம் துபாயில் நடந்த இங்கிலாந்துக்கு எதிரான மூன்றாவது டி20 போட்டியில் 54 பந்துகளில் 135 ரன்கள் குவித்து 250 ஸ்ட்ரைக் ரேட்டில் விளையாடி அனைவரையும் திரும்பி பார்க்க வைத்தார். பந்து வீச்சாளர்களை முதல் பந்திலிருந்தே தாக்கக்கூடிய திறமையால், அபிஷேக் சர்மா இந்த சீசனில் விராட் கோலியின் சாதனையை முறியடிக்க வாய்ப்புள்ளது.

ருதுராஜ் கெய்க்வாட்

சென்னை சூப்பர் கிங்ஸ் அணியின் கேப்டன் ருதுராஜ் கெய்க்வாட் கடந்த சில சீசன்களாக ஐபிஎல் போட்டிகளில் தொடர்ந்து சிறப்பாக விளையாடி வருகிறார். அவர் 2021 ஐபிஎல் தொடரில் 635 ரன்கள் குவித்து ஆரஞ்சு தொப்பியை வென்றார். கடந்த ஆண்டு கேப்டனாக தனது முதல் ஐபிஎல் சீசனில், கெய்க்வாட் 14 போட்டிகளில் ஒரு சதம் மற்றும் நான்கு அரை சதங்கள் உட்பட 53 சராசரியுடன் 583 ரன்கள் குவித்தார்.

28 வயதான இவர் கடந்த ஆண்டு விஜய் ஹசாரே கோப்பையில் 5 போட்டிகளில் 123 ரன்கள் மட்டுமே எடுத்தார். இருப்பினும், ஐபிஎல் போட்டிகளில் அவர் சிறப்பாக விளையாடியுள்ளார். ருதுராஜ் கெய்க்வாட் விராட் கோலியின் சாதனையை முறியடிக்கக்கூடிய வீரர்களில் ஒருவராக கருதப்படுகிறார்.

யஷஸ்வி ஜெய்ஸ்வால்

ராஜஸ்தான் ராயல்ஸ் அணியின் தொடக்க ஆட்டக்காரர் யஷஸ்வி ஜெய்ஸ்வால் கிரிக்கெட் வரலாற்றில் மிகவும் அதிரடியான தொடக்க ஆட்டக்காரர்களில் ஒருவராக உருவெடுத்துள்ளார். இடது கை ஆட்டக்காரரான இவர் பந்து வீச்சாளர்களை துணிச்சலாக எதிர்கொள்கிறார். ஜெய்ஸ்வால் 2023 ஐபிஎல் சீசனில் 14 போட்டிகளில் 48.08 சராசரியுடன் ஒரு சதம் மற்றும் ஐந்து அரை சதங்கள் உட்பட 625 ரன்கள் குவித்தார்.

கடந்த சீசனில், ஜெய்ஸ்வால் 15 போட்டிகளில் ஒரு சதம் மற்றும் ஒரு அரை சதம் உட்பட 31.07 சராசரியுடன் 435 ரன்கள் எடுத்தார். கடந்த இரண்டு சீசன்களாக, 23 வயதான இவர் தொடர்ந்து சிறப்பாக விளையாடி வருகிறார். யஷஸ்வி ஜெய்ஸ்வால் தற்போது உலக கிரிக்கெட்டில் சிறந்த திறமையான பேட்ஸ்மேன்களில் ஒருவராக கருதப்படுகிறார். இவர் ஐபிஎல் 2025 இல் அதிரடியாக விளையாடினால் விராட் கோலியின் சாதனையை முறியடித்தாலும் ஆச்சரியப்படுவதற்கில்லை.

டிராவிஸ் ஹெட்

டிராவிஸ் ஹெட் அதிரடியாக விளையாடுவதால் விராட் கோலியின் சாதனையை முறியடிக்க வாய்ப்புள்ளது. ஹெட் கடந்த ஐபிஎல் சீசனில் 40.50 சராசரியுடன் மற்றும் 191.55 ஸ்ட்ரைக் ரேட்டில் ஒரு சதம் மற்றும் 4 அரை சதங்கள் உட்பட 567 ரன்கள் குவித்தார்.

டிராவிஸ் ஹெட் அபிஷேக் சர்மாவுடன் இணைந்து அதிரடியாக விளையாடினார். அவரது அதிரடி அணுகுமுறை மற்றும் சுழற்பந்து மற்றும் வேகப்பந்து வீச்சை ஆதிக்கம் செலுத்தும் திறன் காரணமாக, அவர் விராட் கோலியின் 973 ரன்கள் சாதனையை முறியடிக்கக்கூடிய வீரர்களில் ஒருவராக இருக்கிறார்.