IND vs SA: அதிகார மிதப்பில் இருந்தால் இதுதான் நடக்கும்..! கம்பீரை விமர்சித்த விராட் கோலி சகோதரர்!

தென்னாப்பிரிக்காவுக்கு எதிரான டெஸ்ட் தொடரில் இந்திய அணி படுமோசமாக விளையாடிய நிலையில், தலைமை பயிற்சியாளர் கவுதம் கம்பீரை விராட் கோலியின் சகோதரர் விகாஸ் கோலி கடுமையாக விமர்சனம் செய்துள்ளார்.

தோல்வியின் பாதையில் இந்தியா

தென்னாப்பிரிக்காவுக்கு எதிரான இரண்டாவது டெஸ்ட் போட்டியில் இந்திய அணி தடுமாறி வரும் நிலையில், விராட் கோலியின் மூத்த சகோதரர் விகாஸ் கோலி, இந்திய அணி நிர்வாகத்தை மறைமுகமாக சாடியுள்ளார். 

முதல் டெஸ்ட் போட்டியில் 30 ரன்கள் வித்தியாசத்தில் தோல்வியடைந்த இந்திய அணி 2வது டெஸ்ட் போட்டியில் 549 என்ற இமாலய இலக்கை ஆடும்போது 27/2 என கிட்டத்தட்ட தோல்வியின் பாதையில் சென்று வருகிறது.

Image Credit : Getty

விராட் கோலியின் சகோதரர் விகாஸ் கோலி விமர்சனம்

விராட் கோலியின் மூத்த சகோதரர் விகாஸ் கோலி த்ரெட்ஸ் சமூக வலைத்தளத்தில் வெளியிட்ட பதிவில், தற்போதைய நிர்வாகத்தின் கீழ் செயல்படுத்தப்பட்ட மாற்றங்கள் குறித்து கேள்வி எழுப்பியுள்ளார்.

 தேவையில்லாத தலையீடுகள், முன்பு டெஸ்ட் போட்டிகளில் இந்தியாவிற்கு வெற்றியைத் தந்த ஒரு அமைப்பை சீர்குலைத்துவிட்டதாக அவர் குறிப்பிட்டுள்ளார். இந்திய அணியின் தலைமைப் பயிற்சியாளர் கௌதம் கம்பீரின் பெயரை அவர் குறிப்பிடவில்லை என்றாலும், இந்தப் பதிவு அவரை விமர்சிக்கும் வகையிலேயே அமைந்துள்ளது.

தேவையில்லாமல் மாற்றி, அதிகாரம் செய்ய முயற்சி

"வெளிநாட்டு மண்ணில்கூட வெற்றி பெறுவதற்காக விளையாடிய காலம் ஒன்று இருந்தது. இப்போது இந்தியாவிலேயே போட்டியை காப்பாற்ற போராடுகிறோம். நன்றாக இருந்த விஷயங்களை தேவையில்லாமல் மாற்றி, அதிகாரம் செய்ய முயற்சித்தால் இதுதான் நடக்கும்'' என்று விகாஸ் கோலி தனது த்ரெட்ஸ் பதிவில் எழுதியுள்ளார்.

Image Credit : ANI

கம்பீரின் கீழ் இந்திய அணி மோசம்

கவுதம் கம்பீரின் பயிற்சியின் கீழ் இந்தியாவின் டெஸ்ட் செயல்பாடு படிப்படியாக சரிவை சந்தித்துள்ளது. கடந்த ஆண்டு நியூசிலாந்துக்கு எதிரான உள்நாட்டுத் தொடரில் 3-0 என்ற கணக்கில் இந்தியா ஒயிட்வாஷ் ஆனது. அதைத் தொடர்ந்து ஆஸ்திரேலியாவில் நடந்த பார்டர்-கவாஸ்கர் டிராபியில் 3-1 என்ற கணக்கில் தோல்வியடைந்தது.

அவரது பதவிக்காலத்தில் வெற்றிகளை விட அதிக தோல்விகளை அணி பதிவு செய்துள்ளது இதில் உள்நாட்டில் ஏற்பட்ட தொடர் தடுமாற்றங்களும் அடங்கும். இந்தியாவின் பேட்டிங் வரிசையின் தூண்களாக இருந்த விராட் கோலி மற்றும் ரோஹித் ஷர்மாவின் டெஸ்ட் கிரிக்கெட் ஓய்வுக்கு பிறகு இந்தியா மிக மோசமாக தடுமாறி வருவது குறிப்பிடத்தக்கது.