மிட்சல் ஸ்டார்க்கின் புயலில் சிக்கி சின்னாபின்னமான இந்தியா: 180க்கு ஆல் அவுட் - மீண்டும் மோசமான சாதனை

இந்தியா, ஆஸ்திரேலியா இடையேயான இரண்டாவது டெஸ்ட் கிரிக்கெட் போட்டி ஆஸ்திரேலியாவின் அடிலெய்ட் மைதானத்தில் நடைபெற்று வருகிறது. டாஸ் வென்ற இந்திய அணி பேட்டிங்கை தேர்வு செய்தது. முதல் போட்டியில் வெற்றி பெற்ற கொண்டாட்டத்தில் இரண்டாவது போட்டியில் களம் இறங்கிய இந்திய அணிக்கு தொடக்கமே அதிர்ச்சி காத்திருந்தது. 

தொடக்க ஆட்டக்காரரான ஜெய்ஸ்வால் முதல் பந்திலேயே மிட்சல் ஸ்டார்க்கிடம் LBW முறையில் அவுட்டாகி அதிர்ச்சி கொடுத்தார். பின்னர் களம் இறங்கிய சுப்மன் கில் கே.எல்.ராகுலடன் சேர்ந்து சிறிது நேரம் தாக்குபிடித்து ஆடினர். ஆனால் இந்த ஜோடியும் நிலைத்து நிற்கவில்லை. கே.எல்.ராகுல் (KL Rahul) 37 ரன்களும், கில் 31 ரன்களும் எடுத்து ஆட்டம் இழந்தனர். விராட் கோலி 7 ரன்களிலும், ரிஷப் பண்ட் 21 ரன்களிலும் நடையை கட்டினர்.

லோ-மிடில் ஆர்டரில் களம் இறங்கிய கேப்டன் ரோகித் ஷர்மா 3 ரன்களில் வெளியேறினார். இளம் வீரரான நிதிஷ் குமார் ரெட்டி 54 பந்துகளில் 42 ரன்கள் (3 பவுண்டரி, 3 சிக்சர்) அடித்து ஆட்டம் இழந்தார். இறுதியில் இந்திய அணி வெறும் 180 ரன்களுக்கு ஆட்டம் இழந்து ரசிகர்களுக்கு அதிர்ச்சி கொடுத்தது.

மோசமான சாதனை
இதற்கு முன் ஆஸ்திரேலியாவுக்கு எதிராக பகல் இரவு டெஸ்ட் போட்டியில் இந்தியாவின் குறைந்த பட்ச ஸ்கோராக 202, 244 ரன்கள் இருந்தது. அதிகபட்சமாக 259/9 ரன்கள் எடுத்திருந்தது. இந்நிலையில் தற்போது மோசமான சாதனையாக 180 ரன்னுக்கு சுருண்டுள்ளது.