Perth: அறிமுக டெஸ்ட்டில் 6 விக்கெட் கைப்பற்றிய பாகிஸ்தான் வீரர் அமீர் ஜமால் – ஆஸ்திரேலியா 487 ரன்கள் குவிப்பு!

பெர்த் டெஸ்ட் போட்டியில் பாகிஸ்தான் வீரர் அமீர் ஜமால் தனது முதல் டெஸ்ட் போட்டியிலேயே 6 விக்கெட்டுகள் கைப்பற்றி சாதனை படைத்துள்ளார்.

Aamer Jamal Test Match

ஆஸ்திரேலியாவில் சுற்றுப்பயணம் மேற்கொண்ட பாகிஸ்தான் 3 போட்டிகள் கொண்ட டெஸ்ட் தொடரில் பங்கேற்கிறது. இந்த தொடருக்கான பாகிஸ்தான் அணிக்கு ஷான் மசூத் கேப்டனாக நியமிக்கப்பட்டுள்ளார். இரு அணிகளுக்கு இடையிலான முதல் டெஸ்ட் போட்டி தற்போது பெர்த் மைதானத்தில் நடந்து வருகிறது. இதில், டாஸ் வென்ற ஆஸ்திரேலியா முதலில் பேட்டிங் செய்வதாக அறிவித்தது.

Perth Test Match: Aamer Jamal

அதன்படி டேவிட் வார்னர் மற்றும் உஸ்மான் கவாஜா இருவரும் தொடக்க வீரர்களாக களமிறங்கினர். இந்த ஜோடி முதல் விக்கெட்டிற்கு 126 ரன்கள் குவித்தது. கவாஜா 41 ரன்களில் ஆட்டமிழந்தார். அடுத்து வந்த மார்னஸ் லபுஷேன் 16 ரன்களில் வெளியேறினார். ஸ்டீவ் ஸ்மித் 31 ரன்களிலும், டிராவிஸ் ஹெட் 40 ரன்னிலும் ஆட்டமிழந்தனர்.

Aamer Jamal

தனது கடைசி டெஸ்ட் தொடரில் விளையாடி வரும் வார்னர் சாதனையோடு வெளியேறினார். அவர் 211 பந்துகளில் 16 பவுண்டரி, 4 சிக்ஸ் உள்பட 164 ரன்கள் குவித்து ஆட்டமிழந்தார். இந்த ஆண்டில் அவர் அடித்த முதல் டெஸ்ட் சதமாகும். முதல் நாள் ஆட்டநேர முடிவில் ஆஸ்திரேலியா 5 விக்கெட் இழப்பிற்கு 346 ரன்கள் எடுத்திருந்தது. இதில், மார்ஷ் 15 ரன்னுடனும், அலெக்ஸ் கேரி 14 ரன்னுடனும் 2ஆம் நாள் ஆட்டத்தை தொடங்கினர்.

Australia vs Pakistan Perth Test

இதில் கேரி 34 ரன்களில் ஆட்டமிழந்தார். மார்ஷ் சதத்தை நோக்கி சென்ற நிலையில், 90 ரன்களில் ஆட்டமிழக்கவே ஆஸ்திரேலியா 113.2 ஓவர்களில் அனைத்து விக்கெட்டுகளையும் இழந்து 487 ரன்கள் குவித்தது.

Australia vs Pakistan Test Match

பவுலிங்கைப் பொறுத்த வரையில் பாகிஸ்தான் அணியில் அறிமுகமான அமீர் ஜமால் 6 விக்கெட்டுகள் கைப்பற்றி சாதனை படைத்தார். 27 வயதான அமீர் ஜமால் இங்கிலாந்திற்கு எதிரான டி20 தொடரின் மூலமாக பாகிஸ்தான் அணியில் அறிமுகமாகியுள்ளார். இன்னும் ஒருநாள் போட்டிகளில் விளையாடவில்லை.

Australia vs Pakistan 1st Test Match

இந்த நிலையில் தான் ஆஸ்திரேலியாவிற்கு எதிரான முதல் டெஸ்ட் போட்டியின் மூலமாக டெஸ்ட் தொடரில் அறிமுகமான ஜமால் 20.2 ஓவர்கள் வீசி ஒரு மெய்டன் உள்பட 111 ரன்கள் கொடுத்து 6 விக்கெட்டுகள் கைப்பற்றியுள்ளார். அனுபவம் வாய்ந்த ஷாகீன் அஃப்ரிடி ஒரு விக்கெட் மட்டுமே கைப்பற்றியுள்ளார். குர்ரம் ஷாஜாத் 2 விக்கெட் கைப்பற்றியுள்ளார்.