தோனி தலைமையில் மிரட்டப்போகும் CSK! எதிர்பார்ப்பில் ரசிகர்கள் - பிளேயிங் 11ல் அதிரடி மாற்றம்?

ஐபிஎல் 18வது சீசனின் இன்றைய போட்டியில் சென்னை சூப்பர் கிங்ஸ் அணி கொல்கத்தா நைட் ரைடர்ஸ் அணியை எதிர்கொள்கிறது. இந்த போட்டியில் தோனி மீண்டும் கேப்டனாக களம் இறங்குவதால் போட்டியின் மீதான ஆர்வம் அதிகரித்துள்ளது.  

Chennai IPL

Chennai Super Kings: சென்னை சூப்பர் கிங்ஸ் ரசிகர்கள் இப்படி ஒரு திருப்பத்தை கனவில் கூட நினைத்திருக்க மாட்டார்கள். 43 வயதில் எம்.எஸ்.தோனி மீண்டும் சிஎஸ்கே கேப்டனாகிறார். ஐபிஎல் 18வது சீசனில் ஐந்து போட்டிகளில் விளையாடி ஒரு வெற்றியை மட்டுமே பெற்று புள்ளிப் பட்டியலில் பின் தங்கியுள்ள சென்னை அணியை தோனி மீட்டெடுப்பாரா? சீசனின் நடுவே எம்.எஸ்.தோனி மீண்டும் கேப்டனாகும்போது சிஎஸ்கே ரசிகர்கள் மிகுந்த நம்பிக்கையில் உள்ளனர். 

Mahendra Singh Dhoni

10 சீசன்களில் இறுதிப்போட்டி

தோனி Chennai Super Kings அணியை 10 ஐபிஎல் சீசன்களில் இறுதிப் போட்டிக்கு அழைத்துச் சென்ற கேப்டன். ஐந்து கோப்பைகளை வென்று தந்த சாதனையாளர். ஆனால், ஐபிஎல் 18வது சீசனில் சென்னை அணியின் தொடக்கம் சரியில்லை. சீசனில் ஆடிய ஐந்து போட்டிகளில் நான்கு போட்டிகளில் தோல்வியடைந்தது. முதல் போட்டியில் சொந்த மண்ணான சேப்பாக்கத்தில் மும்பை இந்தியன்ஸை நான்கு விக்கெட் வித்தியாசத்தில் வீழ்த்தி சென்னை சீசனைத் தொடங்கியது. அதன் பிறகு நான்கு போட்டிகளிலும் அணி தோல்வியடைந்தது. 

Chennai Super Kings

RCBயிடம் அதே சேப்பாக்கத்தில் 50 ரன்கள் வித்தியாசத்தில் மோசமான தோல்வி. ராஜஸ்தான் ராயல்ஸிடம் கௌஹாத்தியில் 6 ரன்கள் வித்தியாசத்தில் தோல்வியடைந்தது. டெல்லி கேப்பிடல்ஸிடம் 25 ரன்கள் வித்தியாசத்திலும், பஞ்சாப் கிங்ஸிடம் 18 ரன்கள் வித்தியாசத்திலும் தோல்வியைத் தழுவியது. சீசனில் அணியின் ஆறாவது போட்டியில் கொல்கத்தா நைட் ரைடர்ஸை சென்னை சூப்பர் கிங்ஸ் எதிர்கொள்ளும்போது தோனிக்கு போட்டி அவ்வளவு எளிதாக இருக்காது. போட்டி சேப்பாக்கத்தில் நடந்தாலும் சொந்த மைதானத்தில் தொடர்ச்சியாக மூன்று தோல்விகளை சந்திக்காமல் இருக்க வேண்டிய கட்டாயத்தில் சிஎஸ்கே உள்ளது. 

Dhoni

காயம் காரணமாக வெளியேறிய ருதுராஜ் கெய்க்வாட்டுக்கு பதிலாக அணியில் இடம்பெற உள்ள ராகுல் திரிபாதி ஃபார்மில் இல்லை. ரச்சின் ரவீந்திரா - டெவான் கான்வேயின் தொடக்க ஆட்டம் சென்னையின் ஸ்கோரை நிர்ணயிக்கும். ஷிவம் துபே மற்றும் விஜய் சங்கர் ஆகியோர் மிடில் ஆர்டரில் தடுமாறுகிறார்கள். சேப்பாக்கம் மைதானத்தின் ஸ்பின் ஆடுகளத்தில் நூர் அகமதுவின் ஸ்பின் பந்துவீச்சு மட்டுமே நம்பிக்கை அளிக்கிறது. எனவே, அணியின் வரிசையில் தோனி சில மாற்றங்களைச் செய்யக்கூடும். மீண்டும் தல கேப்டனாகிறார். 

CSK Vs KKR

இன்று சேப்பாக்கம் மைதானத்தில் மஞ்சள் நிற ரசிகர்கள் அலைமோதக்கூடும். கடந்த போட்டியில் தோனி அடித்த சிக்ஸர்களை ரசிகர்கள் இன்றும் எதிர்பார்க்கலாம். ஆனால், இதுவரை செட் ஆகாத சிஎஸ்கே பிளேயிங் லெவனை வைத்து தோனி என்ன அதிசயம் செய்யப் போகிறார் என்பதை பொறுத்திருந்துதான் பார்க்க வேண்டும். இன்னும் ஒரு தோல்வியை சென்னை சூப்பர் கிங்ஸ் அணி ஐபிஎல் 2025-ல் தாங்க முடியாது. கடைசி போட்டியில் லக்னோ சூப்பர் ஜெயன்ட்ஸிடம் தோற்றாலும் கொல்கத்தா நைட் ரைடர்ஸ் அணியை குறைத்து மதிப்பிட முடியாது. பலர் ஃபார்மில் இல்லாவிட்டாலும் குயின்டன் டி காக், ஆண்ட்ரே ரசல், சுனில் நரைன், மொயின் அலி, வருண் சக்கரவர்த்தி, ரிங்கு சிங், வெங்கடேஷ் ஐயர் என பல அதிரடி வீரர்கள் நிறைந்த அணி கேகேஆர். கேப்டன் அஜிங்க்ய ரஹானே நல்ல ஃபார்மில் உள்ளார்.