IND vs AUS: அடுத்தடுத்த தோல்விகள்.. ஆஸ்திரேலிய அணி செய்த தவறுகளை லிஸ்ட் போட்டு அடித்த மைக்கேல் கிளார்க்

இந்தியாவிற்கு எதிரான டெஸ்ட் தொடரின் முதல் 2 போட்டிகளிலும் ஆஸ்திரேலிய அணி படுதோல்வி அடைந்த நிலையில், அந்த அணியின் தோல்விக்கான காரணங்களையும், அந்த அணி செய்த தவறுகளையும் சுட்டிக்காட்டியுள்ளார் மைக்கேல் கிளார்க். 

இந்தியா - ஆஸ்திரேலியா இடையேயான 4 டெஸ்ட் போட்டிகள் கொண்ட தொடர் நடந்துவருகிறது. இந்திய ஆடுகளங்கள் ஸ்பின்னிற்கு சாதகமாக இருக்கும் என்பதால் நேதன் லயன், அஷ்டான் அகர், டாட் மர்ஃபி, குன்னெமன் ஆகிய 4 ஸ்பின்னர்களுடன் இந்தியாவிற்கு வந்தது ஆஸ்திரேலிய அணி. 

இந்தியாவிற்கு எதிராக நல்ல ஸ்பின்னர்களை இறக்கி நெருக்கடி கொடுக்க வேண்டும், இந்திய ஸ்பின்னர்களை திறம்பட எதிர்கொள்ள வேண்டும் என்ற நோக்கில் தான் இந்தியாவிற்கு வந்தது. ஆனால் அவை இரண்டையுமே அந்த அணி சரியாக செய்யவில்லை. முதல் டெஸ்ட்டில் நேதன் லயன் மற்றும் அறிமுக ஸ்பின்னர் டாட் மர்ஃபி ஆகிய 2 ஸ்பின்னர்களுடன் ஆடியது. அந்த டெஸ்ட்டில் இந்திய அணி இன்னிங்ஸ் மற்றும் 132 ரன்கள் வித்தியாசத்தில் அபார வெற்றி பெற்றது. 

2வது டெஸ்ட்டில் குன்னெமனையும் சேர்த்து 3 ஸ்பின்னர்களுடன் ஆடியது. ஆனால் பேட்டிங்கில் சோபிக்கவில்லை. 2வது டெஸ்ட்டின் 2வது இன்னிங்ஸில் ஒரே செசனில் 9 விக்கெட்டுகளை இழந்து 113 ரன்களுக்கு ஆல் அவுட்டானது. அதில் 7 விக்கெட்டுகளை ஜடேஜாவிடமே இழந்தது. இந்திய ஸ்பின்னர்களை எதிர்கொள்வதிலும் சொதப்பி, இந்திய வீரர்களை ஸ்பின்னை வைத்து கட்டுப்படுத்துவதிலும் சொதப்பி 2 டெஸ்ட்டிலும் தோல்விகளை தழுவியது ஆஸ்திரேலிய அணி.

இந்நிலையில், ஆஸ்திரேலிய அணி இந்த தொடரில் செய்த தவறுகளை சுட்டிக்காட்டியுள்ளார் மைக்கேல் கிளார்க். இதுகுறித்து பேசிய மைக்கேல் கிளார்க், ஆஸ்திரேலிய அணியின் தோல்வியில் எனக்கு வியப்பே இல்லை. ஒரு பயிற்சி போட்டியிலாவது ஆடியிருந்தால் தான் கண்டிஷனை புரிந்துகொள்ள முடியும். பயிற்சி போட்டியில் ஆடாதது மிகப்பெரிய தவறு. அடுத்தது, அணி தேர்வு. முதல் டெஸ்ட்டில் அணி தேர்வும் தவறாகவே இருந்தது. 2வது டெஸ்ட்டில் கண்டிஷனை நன்கு தெரிந்துகொள்வதற்கு முன்பாகவே தொடக்கத்திலேயே ஸ்பின்னிற்கு எதிராக ஸ்வீப், ரிவர்ஸ் ஸ்வீப் ஷாட்டுகளை ஆடியது தவறு.  ஆஸ்திரேலிய அணியின் வியூகங்களுக்கு என்னாயிற்று என்று எனக்கு தெரியவில்லை. வெறும் 100+ (113) ரன்களுக்கு ஆல் அவுட்டானது. வெறும் இரண்டரை நாட்களில் போட்டி முடிந்துவிட்டது. என்று கிளார்க் விமர்சித்திருந்தார்.