IND vs AUS: இவரை தூக்கிட்டு அவரை அணிக்குள் கொண்டு வருவதுதான் நல்லது..! மாற்றத்திற்கு தயாரான ரோஹித், டிராவிட்

ஆஸ்திரேலியாவிற்கு எதிரான 3வது டெஸ்ட்டில் ஆடிராத முகமது ஷமியை, அகமதாபாத்தில் நடக்கும் கடைசி டெஸ்ட் போட்டியில் ஆடவைக்க வேண்டும் என்று இந்திய அணியின் கேப்டன் ரோஹித் சர்மா மற்றும் தலைமை பயிற்சியாளர் ராகுல் டிராவிட் ஆகிய இருவரும் முடிவு செய்துள்ளனர். 

இந்தியா - ஆஸ்திரேலியா இடையேயான 4 டெஸ்ட் போட்டிகள் கொண்ட தொடரின் முதலிரண்டு போட்டிகளில் இந்திய அணியும், 3வது போட்டியில் ஆஸ்திரேலிய அணியும் வெற்றி பெற்றதால் 2-1 என இந்திய அணி முன்னிலை வகிக்கிறது. 3வது டெஸ்ட்டில் பெற்ற வெற்றியின் மூலம் ஆஸ்திரேலிய அணி ஐசிசி டெஸ்ட் சாம்பியன்ஷிப் ஃபைனலுக்கு முன்னேறிவிட்டது. 

வரும் 9ம் தேதி அகமதாபாத்தில் தொடங்கும் கடைசி டெஸ்ட் போட்டியில் இந்திய அணி ஜெயித்தால் மட்டுமே, இந்த தொடரை வெல்ல முடியும் என்பதுடன், ஐசிசி டெஸ்ட் சாம்பியன்ஷிப் ஃபைனலுக்கும் முன்னேற முடியும் என்பதால், கடைசி டெஸ்ட் போட்டி இந்திய அணிக்கு மிக முக்கியம்.

எனவே கண்டிப்பாக வெற்றி பெற்றே தீர வேண்டும் என்ற தீவிரத்தில் உள்ள இந்திய அணி, கடைசி டெஸ்ட் போட்டியில் ஒரு மாற்றம் செய்ய முடிவு செய்துள்ளது. 3வது டெஸ்ட்டில் ஓய்வளிக்கப்பட்ட முகமது ஷமியை 4வது டெஸ்ட்டில் ஆடவைக்க திட்டமிட்டுள்ளது. உமேஷ் யாதவ் 3வது டெஸ்ட்டின் முதல் இன்னிங்ஸில் வெறும் 4 ஓவர்கள் மட்டுமே வீசி 3 விக்கெட் வீழ்த்தி அசத்தியதால் அவரை அணியில் வைத்துக்கொண்டு சிராஜை நீக்கிவிட்டு ஷமியை ஆடவைக்கும் முனைப்பில் உள்ளது.

இந்த ஆண்டு இறுதியில் ஒருநாள் உலக கோப்பை நடக்கவுள்ளது. ஏற்கனவே பும்ரா காயத்தால் அவதிப்பட்டுவருவதால் முகமது ஷமியின் ஃபிட்னெஸ் மிக முக்கியம். ஐபிஎல்லும் வரும் 31ம் தேதி தொடங்குவதால் இந்திய ஃபாஸ்ட் பவுலர்களின் ஃபிட்னெஸ் பராமரிப்பிற்கு முக்கியத்துவம் கொடுத்து மருத்துவக்குழுவுடன் ஆலோசித்து, ஃபாஸ்ட் பவுலர்களுக்கு தேவையான ஓய்வளித்துவருகிறது. அந்தவகையில் தான் ஷமி 3வது டெஸ்ட்டில் ஓய்வு கொடுக்கப்பட்டு உட்காரவைக்கப்பட்டார். இந்திய அணி அந்த டெஸ்ட்டில் தோற்றதால் கடைசி டெஸ்ட்டில் ஷமியை அணிக்குள் கொண்டுவருகிறது இந்திய அணி நிர்வாகம்.