Asian Games 2026: சிக்ஸர் மழை பொழிந்த இந்திய மகளிர் அணி.. ஆசிய விளையாட்டில் புதிய சாதனை ஸ்கோர்!

Asian Games 2026: 2026 ஆசிய விளையாட்டுப் போட்டியின் இறுதி ஆட்டத்தில் இந்திய மகளிர் அணி இலங்கையை புரட்டி எடுத்தது. ஸ்மிருதி மந்தனா, ரிச்சா கோஷ் ஆகியோரின் அதிரடியால் 216/3 என்ற இமாலய ஸ்கோரை குவித்து இந்தியா புதிய சாதனை படைத்துள்ளது.

Image Credit : X/BCCIWomen

ஆசிய விளையாட்டுப் போட்டியில் புதிய வரலாறு படைத்த இந்தியா

2026 ஆசிய விளையாட்டு மகளிர் கிரிக்கெட் இறுதிப்போட்டியில் இந்திய அணி இலங்கை பந்துவீச்சாளர்களை கதறவிட்டது. ஜப்பானின் நிஷின் நகரில் உள்ள கோரோகி ஸ்போர்ட்ஸ் பார்க்கில் நடந்த இந்த போட்டியில் டாஸ் வென்ற இந்தியா முதலில் பேட்டிங் செய்தது. 20 ஓவர்களில் 3 விக்கெட் இழப்புக்கு 216 ரன்கள் குவித்து, ஆசிய விளையாட்டு வரலாற்றிலேயே புதிய சாதனையை இந்திய மகளிர் அணி பதிவு செய்தது. இந்திய தொடக்க வீராங்கனைகளான ஸ்மிருதி மந்தனா, ஷஃபாலி வர்மா ஆரம்பம் முதலே இலங்கை பந்துவீச்சாளர்களை வெளுத்து வாங்கினர். பவர்பிளே முடிவில் விக்கெட் இழப்பின்றி இந்தியா 67 ரன்கள் எடுத்தது. சமரி வீசிய 5வது ஓவரில் இருவரும் தலா ஒரு சிக்ஸர், ஒரு பவுண்டரி அடித்து 19 ரன்களை திரட்டினர்.

Image Credit : X/BCCIWomen

11 ஆயிரம் ரன்கள் கிளப்பில் இணைந்து மந்தனா புதிய சாதனை

முதல் விக்கெட்டுக்கு 9.6 ஓவர்களில் 99 ரன்கள் பார்ட்னர்ஷிப் அமைத்தனர். 29 பந்துகளில் 48 ரன்கள் (3 பவுண்டரி, 3 சிக்ஸர்) எடுத்த ஷஃபாலி, பிரபோதா பந்துவீச்சில் காவ்யா கவிந்தியிடம் கேட்ச் கொடுத்து அரைசதத்தை தவறவிட்டார். துணை கேப்டன் ஸ்மிருதி மந்தனா அபாரமான அரைசதம் அடித்து அணிக்கு வலுவான அடித்தளம் அமைத்தார். 45 பந்துகளை சந்தித்த அவர் 5 பவுண்டரி, 7 சிக்ஸர்களுடன் 79 ரன்கள் குவித்து சுகந்திகா குமாரி பந்துவீச்சில் அவுட்டானார். இதன் மூலம் சர்வதேச கிரிக்கெட்டில் 11,000 ரன்களை கடந்த முதல் இந்திய வீராங்கனை என்ற வரலாற்று சாதனையை மந்தனா படைத்தார். மேலும், டி20 போட்டிகளில் ஷஃபாலி - மந்தனா ஜோடி 4,000 ரன்கள் பார்ட்னர்ஷிப் என்ற மைல்கல்லையும் எட்டியது.

Image Credit : X/BCCIWomen

ரன் ரேட்டை குறையாமல் பார்த்துக்கொண்ட கேப்டன் ஹர்மன்பிரீத்

ஷஃபாலி அவுட்டானதும் களமிறங்கிய கேப்டன் ஹர்மன்பிரீத் கவுர் 17 பந்துகளில் 3 பவுண்டரிகளுடன் 19 ரன்கள் எடுத்தார். அவர் சீக்கிரமே அவுட்டானாலும், களத்தில் இருந்தவரை ரன் ரேட் குறையாமல் பார்த்துக்கொண்டார். கவிஷா தில்ஹாரி பந்துவீச்சில் சமரி அதபத்துவிடம் கேட்ச் கொடுத்து ஹர்மன் வெளியேறினார். ஸ்மிருதி மந்தனா அவுட்டான பிறகு வந்த விக்கெட் கீப்பர் ரிச்சா கோஷ் மைதானத்தில் சிக்ஸர் மழை பொழிந்தார்.

Image Credit : X/BCCIWomen

கடைசி ஓவர்களில் சிக்ஸர் மழை பொழிந்த ரிச்சா கோஷ்

வெறும் 22 பந்துகளில் 6 பவுண்டரி, 3 சிக்ஸர்களுடன் 222.73 ஸ்ட்ரைக் ரேட்டில் 49 ரன்கள் குவித்து ஆட்டமிழக்காமல் இருந்தார். மிதாலி அயோத்யா வீசிய கடைசி ஓவரில் இரண்டு பிரம்மாண்ட சிக்ஸர்கள், ஒரு பவுண்டரி உட்பட 25 ரன்களை ரிச்சா திரட்டினார். கடைசி 5 ஓவர்களில் இந்தியா 1 விக்கெட்டை மட்டும் இழந்து 74 ரன்களை குவித்தது. பாரதி 7 பந்துகளில் 7 ரன்களுடன் ஆட்டமிழக்காமல் இருந்தார். இலங்கை தரப்பில் சுகந்திகா குமாரி (1/37), சமுதி பிரபோதா (1/34), கவிஷா தில்ஹாரி (1/35) தலா ஒரு விக்கெட் எடுத்தனர். 216 ரன்கள் குவித்த இந்தியா, இலங்கைக்கு 217 ரன்கள் என்ற இமாலய இலக்கை நிர்ணயித்துள்ளது.