Ajinkya Rahane: கிரிக்கெட்டுக்கு' குட்பை' சொன்ன ரஹானே.. இதுதான் காரணம்.. இன்ஸ்டாகிராமில் உருக்கம்!

Ajinkya Rahane: இந்திய அணியின் ஸ்டார் வீரர் அஜிங்க்யா ரஹானே சர்வதேச கிரிக்கெட்டில் இருந்து ஓய்வு பெறுவதாக அறிவித்துள்ளார். அவர் ஓய்வுக்கான காரணம் குறித்து இந்த செய்தியில் விரிவாக பார்க்கலாம்.

Image Credit : Getty

சர்வதேச கிரிக்கெட்ட்டில் அஜிங்க்யா ரஹானே ஓய்வு

இந்திய கிரிக்கெட் அணியின் மூத்த வீரர் அஜிங்க்யா ரஹானே, சர்வதேச கிரிக்கெட்டிலிருந்து ஓய்வு பெறுவதாக இன்று அறிவித்துள்ளார். இதன் மூலம், சுமார் இரண்டு தசாப்தங்களாக நீடித்த அவரது கிரிக்கெட் பயணம் முடிவுக்கு வந்துள்ளது. தன்னுடைய இன்ஸ்டாகிராம் பக்கத்தில் ஒரு உருக்கமான வீடியோவை பகிர்ந்து, இந்த முடிவை ரஹானே உறுதிப்படுத்தியுள்ளார். சர்வதேச கிரிக்கெட்டிலிருந்து விலகுவதற்கு இதுதான் சரியான நேரம் என்று அவர் கூறியுள்ளார்.

"வாழ்க்கையின் நிதர்சனம் என்னவென்றால், எல்லாவற்றுக்கும் ஒரு தொடக்கம் உண்டு, ஒரு முடிவும் உண்டு. நேரம் வரும்போது, அதை மதித்து நாம் செல்ல வேண்டும். என் பேட்டிங்கில் நான் எப்போதும் டைமிங்கை நம்பியிருக்கிறேன், அதன் முக்கியத்துவத்தையும் நான் புரிந்துகொண்டேன்" என்று ரஹானே கூறினார்.

Image Credit : ANI

ஓய்வை அறிவிக்க இதுதான் சரியான நேரம்

தொடர்ந்து தனது பதிவில் கூறிய அவர், "சர்வதேச கிரிக்கெட் மற்றும் அனைத்து வடிவங்களிலிருந்தும் எனது ஓய்வை அறிவிக்க சரியான நேரம் இது என்று உணர்கிறேன். சிறுவயதில் பயிற்சிக்கு மட்டும் பயணம் செய்த அந்த ஆரம்ப நாட்களில் இருந்து, இந்த விளையாட்டுக்கு நான் எல்லாவற்றையும் கொடுத்திருக்கிறேன். ஒவ்வொரு நாளும், ஒவ்வொரு இன்னிங்ஸிலும், பேட்டிங் செய்ய கிடைத்த ஒவ்வொரு வாய்ப்பிலும், இந்திய தொப்பியை அணிய வேண்டும் என்பதுதான் எப்போதும் கனவாக இருந்தது" என்று மேலும் கூறினார்.

நேர்மையுடன் விளையாடினேன்

ரஹானே தனது கிரிக்கெட் வாழ்க்கையில் எப்போதும் நாட்டிற்கும் அணிக்கும் முன்னுரிமை அளித்ததாகவும், நேர்மையுடன் விளையாடியதாகவும் கூறினார். "நான் ஒரு எளிய விதியைக் கடைப்பிடித்தேன். எப்போதும் என் நாட்டையும் என் அணியையும் எனக்கு முன்னால் வைத்தேன். இந்த விளையாட்டை நான் முழு நேர்மையுடன் விளையாடினேன். உங்கள் நோக்கம் சரியாக இருந்தால், விளையாட்டு எப்போதும் உங்களைக் கவனித்துக் கொள்ளும் என்று நான் எப்போதும் நம்பினேன்" என்றும் தெரிவித்தார்.

ரஹானே தனது கிரிக்கெட் வாழ்க்கை முழுவதும் ஆதரவளித்த பிசிசிஐ, மும்பை கிரிக்கெட் சங்கம் (MCA), தனது சக வீரர்கள், பயிற்சியாளர்கள், ஐபிஎல் அணிகள், குடும்பத்தினர், நண்பர்கள் மற்றும் ரசிகர்களுக்கு நன்றி தெரிவித்தார். "உயர்வு தாழ்வு என அனைத்திலும் எனக்கு ஆதரவளித்த அனைத்து கிரிக்கெட் ரசிகர்களுக்கும் ஒரு சிறப்பு நன்றி.

Image Credit : ANI

சர்வதேச போட்டிகளில் ரஹானே சாதனை

'அஜிங்க்யா' என்றால் வெல்ல முடியாதவன் என்று அர்த்தம், ஆனால் கிரிக்கெட் எனக்கு பலமுறை தோல்வியைக் காட்டியுள்ளது. கிரிக்கெட் வீரர்களாக, நாங்கள் வெற்றி பெறுவதை விட அடிக்கடி தோல்வியடைகிறோம். ஆனால், நான் ஒருபோதும் தோற்கடிக்கப்படாத ஒரு இடம் உண்டு. அது உங்கள் இதயங்களில்தான். உங்கள் அன்புக்கும், நம்பிக்கைக்கும், ஆதரவுக்கும் நன்றி. கேப் எண் 278, விடைபெறுகிறேன்" என்று ரஹானே முடித்தார்.

சர்வதேச போட்டிகளில் ரஹானே பல்வேறு சாதனைகளை புரிந்துள்ளார். 85 போட்டிகளில் 144 இன்னிங்ஸ்களில் விளையாடி, 38.46 சராசரியில் 5,077 ரன்கள் எடுத்துள்ளார். இதில் 12 சதங்களும் 26 அரைசதங்களும் அடங்கும்.

ஒருநாள் போட்டிகளில், 90 போட்டிகளில் 87 இன்னிங்ஸ்களில் விளையாடி, 35.26 சராசரியில் 2,962 ரன்கள் எடுத்துள்ளார். இதில் 3 சதங்களும் 24 அரைசதங்களும் அடங்கும். டி20 போட்டிகளில், 20 போட்டிகளில் 375 ரன்கள் எடுத்துள்ளார்.

Image Credit : X

டெஸ்ட் கிரிக்கெட்டில் சூப்பர் கேப்டன்

டெஸ்ட் கேப்டனாக ரஹானேவின் சாதனை சிறப்பாக உள்ளது. அவர் தலைமையில் இந்திய அணி ஒரு போட்டியில் கூட தோற்கவில்லை. நான்கு வெற்றிகள், இரண்டு டிராக்களுடன், குறைந்தபட்சம் ஐந்து போட்டிகளில் கேப்டனாக இருந்த இந்திய வீரர்களில் அதிக வெற்றி சதவீதத்தை ரஹானே கொண்டுள்ளார்.

2020-21 பார்டர்-கவாஸ்கர் டிராபியில், மெல்போர்னில் பெற்ற வரலாற்று சிறப்புமிக்க வெற்றி மற்றும் கப்பா மைதானத்தில் ஆஸ்திரேலியாவின் நீண்ட கால வெற்றிப் பயணத்தை முடிவுக்குக் கொண்டு வந்தது ஆகியவை அவரது கேப்டன்சியில் மறக்க முடியாத தருணங்கள். அந்த தொடரை இந்தியா 2-1 என்ற கணக்கில் வென்றது.

ரஹானே 2017-ல் தரம்சாலாவில் ஆஸ்திரேலியாவுக்கு எதிராகவும், 2018-ல் ஆப்கானிஸ்தானுக்கு எதிராகவும் இந்திய அணியை வெற்றிக்கு வழிநடத்தினார். ரஹானே ஐபிஎல் போட்டிகளில் தொடர்ந்து விளையாடி வருகிறார்.