ஒரே போட்டியில் 5 சாதனைகள்! யுவராஜ், ரோஹித்தை ஓரங்கட்டிய அபிஷேக் சர்மா
இந்தியா மற்றும் நியூசிலாந்துக்கு இடையேயான 3வது டி20 போட்டி கவுகாத்தியில் நடைபெற்றது. இதில் அபிஷேக் சர்மா 5 புதிய சாதனைகளையும் படைத்துள்ளார். இப்போட்டியில் 8 விக்கெட் வித்தியாசத்தில் வெற்றி பெற்ற இந்திய அணி தொடரையும் கைப்பற்றியது.
கவுகாத்தியில் அபிஷேக் சர்மா ருத்ரதாண்டவம்
நியூசிலாந்துக்கு எதிரான மூன்றாவது டி20 போட்டியில், இந்திய அணியின் அதிரடி வீரர் அபிஷேக் சர்மா அபாரமாக பேட்டிங் செய்தார். அவர் 20 பந்துகளில் 7 பவுண்டரிகள், 5 சிக்ஸர்களுடன் 68 ரன்கள் எடுத்து ஆட்டமிழக்காமல் இருந்தார். அவரது அதிரடியால் இந்திய அணி 154 ரன்கள் இலக்கை வெறும் 10 ஓவர்களில் சேஸ் செய்தது. இந்த போட்டியில் அபிஷேக் 5 முக்கிய சாதனைகளை படைத்துள்ளார். அவற்றை இங்கு காணலாம்.
இரண்டாவது அதிவேக அரைசதம்
டி20 போட்டிகளில் அதிவேகமாக அரைசதம் அடித்த இந்திய வீரர் என்ற சாதனையை அபிஷேக் சர்மா படைத்துள்ளார். அவர் 14 பந்துகளில் அரைசதம் அடித்தார். இதன்மூலம் 16 பந்துகளில் அரைசதம் அடித்த ஹர்திக் பாண்ட்யாவின் சாதனையை முறியடித்தார். 12 பந்துகளில் அரைசதம் அடித்த யுவராஜ் சிங்கிற்கு அடுத்தபடியாக, அபிஷேக் சர்மா இந்த பட்டியலில் இரண்டாவது இடத்தைப் பிடித்துள்ளார்.
பவர்பிளேயில் அதிக அரைசதங்கள்
இந்திய அணிக்காக பவர்பிளேயில் அதிக அரைசதங்கள் அடித்த வீரர் என்ற சாதனையை அபிஷேக் சர்மா படைத்துள்ளார். 2 முறை அரைசதம் அடித்திருந்த முன்னாள் கேப்டன் ரோஹித் சர்மாவை அவர் முந்தியுள்ளார். அபிஷேக் தற்போது 3 அரைசதங்களுடன் முதலிடத்தில் உள்ளார். இஷான் கிஷன், யஷஸ்வி ஜெய்ஸ்வால், கே.எல். ராகுல் தலா 1 முறையுடன் அடுத்தடுத்த இடங்களில் உள்ளனர்.
50+ ரன்களில் அதிகபட்ச ஸ்ட்ரைக் ரேட்
இந்தப் போட்டியில் அபிஷேக் சர்மாவின் ஸ்ட்ரைக் ரேட் 340.00. இது ஒரு புதிய சாதனையாகும். டி20 போட்டிகளில் 50+ ரன்கள் எடுத்த இன்னிங்ஸில், அதிக ஸ்ட்ரைக் ரேட் கொண்ட இரண்டாவது இந்திய வீரர் ஆனார். சூர்யகுமார் யாதவை (277.27) அவர் முந்தினார். யுவராஜ் சிங் (362.50) இந்தப் பட்டியலில் முதலிடத்தில் உள்ளார்.
200+ ஸ்ட்ரைக் ரேட்டில் அதிக 50+ ஸ்கோர்
இந்திய அணிக்காக 200+ ஸ்ட்ரைக் ரேட்டில் அதிகமுறை 50+ ரன்கள் அடித்த வீரர்கள் பட்டியலில் அபிஷேக் சர்மா இரண்டாவது இடத்திற்கு முன்னேறியுள்ளார். அவர் 7 முறை இந்த சாதனையை செய்துள்ளார். 5 முறை செய்திருந்த யுவராஜ் சிங்கை அவர் முந்தினார். சூர்யகுமார் யாதவ் 10 முறைகளுடன் இந்தப் பட்டியலில் முதலிடத்தில் உள்ளார்.
25 பந்துகளுக்குள் அதிக அரைசதங்கள்
25 பந்துகளுக்குள் அரைசதம் அடித்து அபிஷேக் சர்மா மற்றொரு சாதனையை படைத்துள்ளார். டி20 போட்டிகளில் 25 பந்துகளுக்குள் அதிகமுறை அரைசதம் அடித்த முதல் வீரர் ஆனார். அவர் 9 முறை இதைச் செய்துள்ளார். 8 முறை செய்திருந்த சூர்யகுமார் யாதவை அவர் முந்தினார். பில் சால்ட் மற்றும் எவின் லூயிஸ் (தலா 7 முறை) அடுத்த இடங்களில் உள்ளனர்.
