திமுக கோட்டையில் ஓட்டை போடுவாரா விஜய்? தளபதியின் வெற்றி வாய்ப்பை தீர்மானிக்கும் அந்த ஒரு தொகுதி!

தமிழக அரசியலில் 2026 களம் சூடுபிடிக்க, விஜய் போட்டியிட வாய்ப்புள்ள தொகுதிகள் குறித்த எதிர்பார்ப்பு அதிகரித்துள்ளது. திமுக கோட்டையைத் தகர்க்கும் அந்த ஒரு தொகுதி எது? ஓர் அலசல்.

Image Credit : X/TVKVijayHQ

'அந்த ஒரு தொகுதி' எது?

தமிழக அரசியலில் 2026 சட்டமன்றத் தேர்தல் களம், முன்னெப்போதும் இல்லாத வகையில் ஒரு நட்சத்திரப் போராக உருவெடுத்துள்ளது. தமிழக வெற்றிக் கழகத்தின் தலைவர் விஜய், தனது அரசியல் பயணத்தின் முதல் அடியை எந்தத் தொகுதியில் எடுத்து வைப்பார் என்ற எதிர்பார்ப்பு ஒட்டுமொத்த மாநிலத்தையும் உற்றுநோக்க வைத்துள்ளது. குறிப்பாக, பல தசாப்தங்களாக திமுகவின் அசைக்க முடியாத கோட்டையாகத் திகழும் சென்னையில், விஜய் களம் காண்பது ஒரு மிகப்பெரிய அரசியல் மாற்றத்திற்கான அறிகுறியாகப் பார்க்கப்படுகிறது. பெரம்பூர், விருகம்பாக்கம், வேளச்சேரி என மூன்று தொகுதிகள் பரிசீலனையில் இருந்தாலும், அரசியல் சதுரங்கத்தில் விஜய்க்கு 'செக்' வைக்காத, அதேசமயம் வெற்றியை உறுதி செய்யும் 'அந்த ஒரு தொகுதி' எது? விரிவாகப் பார்ப்போம்.

Image Credit : X/TVKVijayHQ

பெரம்பூர்: திமுகவின் கோட்டையில் ஒரு விரிசல்?

தற்போதைய அரசியல் சூழலில், விஜய்யின் முதல் சாய்ஸாக பெரம்பூர் தொகுதி முன்னிலை பெற்றுள்ளது. இதற்கான காரணங்கள் வெறும் யூகங்கள் அல்ல, ஆழமான அரசியல் கணக்குகள். சமீபத்தில் தவெக நிர்வாகிகள் பெரம்பூரில் ஒரு கூட்டத்தைக் கூட்டி, விஜய் அங்கேயே போட்டியிட வேண்டும் என ஒருமனதாகத் தீர்மானம் நிறைவேற்றியுள்ளனர். தொகுதியில் நிலவும் குடிநீர் தட்டுப்பாடு, கொடுங்கையூர் குப்பைக் கிடங்கு விவகாரம் மற்றும் மழைக்கால வெள்ளப் பாதிப்புகள் ஆளும் திமுக எம்.எல்.ஏ மீது மக்கள் மத்தியில் ஒருவித அதிருப்தியை உருவாக்கியுள்ளது. இந்த 'ஆன்டி-இன்கம்பன்சி' அலையைத் தனக்குச் சாதகமாக மாற்ற விஜய் திட்டமிடுகிறார். பெரம்பூரில் பட்டியலின மற்றும் வன்னியர் சமூக மக்கள் சரிபாதியாக உள்ளனர். இவர்களுடன் வடசென்னை இளைஞர்களின் 'தளபதி' கிரேஸும் இணைந்தால், அது திமுகவுக்குப் பெரும் சவாலாக அமையும்.

Image Credit : X

விருகம்பாக்கம் மற்றும் வேளச்சேரி

'வி' சென்டிமென்ட் பலிக்குமா? விஜய்யின் பெயரில் உள்ள முதல் எழுத்தான 'V' என்ற சென்டிமென்ட் அடிப்படையில் விருகம்பாக்கம் மற்றும் வேளச்சேரி தொகுதிகளும் ஆலோசனையில் உள்ளன. விருகம்பாக்கத்தில்  சினிமா துறையைச் சார்ந்தவர்களும், நடுத்தர வர்க்கத்தினரும் அதிகம். ஆனால், அதிமுகவின் முன்னாள் எம்.எல்.ஏ விருகை ரவி மற்றும் திமுகவின் பிரபாகர் ராஜா என இரு பெரும் புள்ளிகளை எதிர்த்துப் போட்டியிடுவது கடும் சவாலாக இருக்கும். வேளச்சேரியில் படித்த வாக்காளர்கள் அதிகம் உள்ள தொகுதி. இருப்பினும், இங்கு பாஜகவும் அதிமுகவும் ஒருசேரக் குறிவைப்பதால், வாக்குகள் சிதறும் அபாயம் விஜய்க்கு உண்டு.

Image Credit : x

வெற்றி வாய்ப்பைத் தீர்மானிக்கும் அந்த 'ஒரு' தொகுதி!

இறுதியாகப் பார்த்தால், பெரம்பூர் தான் விஜய்க்கு 'சேஃப்' மற்றும் 'வெற்றி' வாய்ப்புள்ள தொகுதியாக அரசியல் நோக்கர்களால் கணிக்கப்படுகிறது.

ஏன் பெரம்பூர்? 

வடசென்னை எப்போதும் உழைக்கும் வர்க்கத்தின் மையம். அங்குள்ள இளைஞர்கள் மாற்றத்தை விரும்புகிறார்கள். திமுகவின் கோட்டையாகக் கருதப்படும் வடசென்னையிலேயே அவர்களை வீழ்த்தினால், அது விஜய்யின் அரசியல் எதிர்காலத்திற்கு ஒரு 'மாஸ்' என்ட்ரியாக அமையும்.

Image Credit : X

வெற்றிக்கு மகுடம் சூட்டிய அம்சங்கள்

வெறுமனே ஒரு நடிகராக அல்லாமல், ஒரு முழுநேர அரசியல்வாதியாக விஜய் எடுக்கும் இந்த முடிவு, 2026 தேர்தலின் தலையெழுத்தையே மாற்றக்கூடும். பெரம்பூர் தொகுதி விஜய்க்கு 'வெற்றி மகுடம்' சூட்டுமா அல்லது திமுக தனது கோட்டையைத் தக்கவைத்துக் கொள்ளுமா என்பது காலத்தின் கையில் உள்ளது. ஆனால் ஒன்று மட்டும் உறுதி—விஜய்யின் வருகை தமிழக அரசியலில் ஒரு புதிய 'கிளைமேக்ஸ்'-ஐ நோக்கி நகர்கிறது!