உங்கள் ஏர் கூலரை ஏசி போல சில்லென்று மாற்ற 5 அட்டகாசமான டிப்ஸ்
கடுமையான வெயிலைச் சமாளிக்க ஏசி இல்லாதவர்கள், வீட்டில் உள்ள ஏர் கூலரையே ஏசி போல மாற்றலாம். கூலிங்கை அதிகரிக்கச் சில எளிய வழிகளைக் கையாண்டால், குறைந்த செலவில் இந்த கோடையிலும் உங்கள் வீடு ஜில்லென்று மாறும். குளுகுளு அனுபவத்தைப் பெற இதுவே சிறந்த வழி!
தேன்கூடு அட்டைகளும் நறுமணமும்!
பழைய வைக்கோல் போன்ற கூலிங் பேட்களை மாற்றிவிட்டு, ஹனிகோம்ப் (Honeycomb) பேட்களைப் பயன்படுத்துங்கள். இது அதிக நேரம் குளிர்ச்சியைத் தக்கவைக்கும். கூலர் தண்ணீரில் இரண்டு சொட்டு லெமன்கிராஸ் அல்லது லாவண்டர் ஆயில் சேர்த்தால், ஏசி போல நறுமணத்துடன் கூடிய குளிர்ந்த காற்று வீடு முழுவதும் வீசும்!
'ஐஸ் கியூப்' மேஜிக் :
பலர் கூலர் தொட்டியிலேயே ஐஸ் கட்டிகளைப் போடுவார்கள். இது மோட்டாரை சீக்கிரம் பழுதாக்கும். அதற்கு பதில், கூலரின் மேல் பகுதியில் உள்ள நீர் தெளிக்கும் தட்டில் (Water tray) ஐஸ் கட்டிகளை வையுங்கள். அங்கிருந்து தண்ணீர் குளிர்ந்து பேட்களில் இறங்கும் போது, காற்று வழக்கத்தை விட 5°C முதல் 8°C வரை கூடுதலாகக் குளிர்ச்சியாக இருக்கும்.
ஜன்னல் கதவு... மூடியே இருக்கணுமா?
ஏசி பயன்படுத்தும் போது கதவை மூடுவோம். ஆனால் கூலருக்கு அப்படிச் செய்யக்கூடாது. கூலரை ஜன்னலுக்கு மிக அருகில் வைத்து, பின் பக்கத்தில் இருந்து வெளிக்காற்று உள்ளே வருமாறு வையுங்கள். அதே சமயம், அறையின் எதிர்ப்புறம் உள்ள கதவை லேசாகத் திறந்து வைத்தால் Cross Ventilation ஏற்பட்டு, புழுக்கம் நீங்கி ஏசி எஃபெக்ட் கிடைக்கும்.
அந்த 15 நிமிட இடைவேளை :
கூலரை ஆன் செய்த உடனே ஃபேனை ஓடவிடாதீர்கள். முதலில் தண்ணீரை (Pump) மட்டும் ஆன் செய்து 10 முதல் 15 நிமிடங்கள் ஓடவிடுங்கள். கூலிங் பேட்கள் முழுமையாக நனைந்த பிறகு ஃபேனை ஆன் செய்தால், முதல் நிமிடம் முதலே சில்லிங் காற்று வரும். இது பேட்கள் காய்ந்து வருவதால் ஏற்படும் வெப்பத்தைத் தவிர்க்கும்.
உப்புத் தண்ணீரைத் தவிர்க்கவும் :
உங்கள் பகுதியில் உப்புத் தண்ணீர் இருந்தால், அது கூலரின் பேட்களில் படிந்து காற்றைத் தடுக்கும் . வாரம் ஒருமுறை தண்ணீரை முழுமையாக மாற்றிவிட்டு, ஒரு டீஸ்பூன் வினிகர் அல்லது பேக்கிங் சோடா கலந்து தொட்டியைச் சுத்தப்படுத்துங்கள். இது பாசி படிவதைத் தடுத்து, தூய்மையான காற்றை உறுதி செய்யும்.
ஏஷ்யாநெட் தமிழ் நியூஸின் லைஃப்ஸ்டைல் பிரிவு, வாசகர்களுக்கு வாழ்க்கை முறை, உறவுகள் மற்றும் நடைமுறை வாழ்க்கை குறித்து வளமான தகவல்களை வழங்குகிறது. இதில் ஆரோக்கிய ஆலோசனைகள், உணவு மற்றும் ஊட்டச்சத்து குறிப்புகள், ஃபாஷன் டிரெண்ட்ஸ் மற்றும் தினசரி வாழ்க்கையை மேம்படுத்தும் சிந்தனையூட்டும் கருத்துகள் அடங்கும்.
