protect wet leather shoes: மழையில் உங்கள் leather shoe ஈரமாகி விட்டதா? உடனடியாக இதை செய்ய மறக்காதீங்க

திடீரென வரும் மழையால் உங்களின் லெதர் ஷூ நனைந்து ஈரமாகி விட்டது என்றால், அதை நீண்ட காலம் பாதுகாப்பதற்கு சில முக்கியமான விஷயங்களை செய்ய வேண்டும். லெதர் ஷூ ஈரத்தால் வீணாகி விடாமல் இருக்க என்னென்ன செய்யலாம் என்பதை தெரிந்து கொள்ளலாம்.

Image Credit : stockPhoto

அதிகப்படியான ஈரத்தை நீக்குதல்:

வீட்டுக்கு வந்தவுடன், முதலில் காலணிகளின் வெளியே படிந்திருக்கும் அதிகப்படியான தண்ணீரை ஒரு மென்மையான, உலர் துணியால் மெதுவாகத் துடைக்கவும். அழுத்தித் துடைக்க வேண்டாம், அது தண்ணீரை இன்னும் உள்ளே தள்ளிவிடும். காலணிகளில் மண், சகதி அல்லது வேறு ஏதாவது படிந்திருந்தால், அது உலர்ந்து கெட்டியாவதற்கு முன் உடனடியாக அகற்றிவிடுங்கள். இல்லையெனில், காய்ந்த பிறகு அதை நீக்குவது கடினமாகிவிடும், மேலும் தோலில் கறைகள் படிய வாய்ப்புள்ளது.

Image Credit : stockPhoto

லேஸ்கள் மற்றும் இன்சோல்களை அகற்றுதல்:

காலணிகளில் உள்ள லேஸ்களை அவிழ்த்து தனியாக உலர வைக்கவும். லேஸ்கள் ஈரமாக இருந்தால், அவை உலரும் நேரம் அதிகரிக்கும். அதேபோல, காலணிகளுக்குள் இருக்கும் இன்சோல் கழற்ற முடிந்தால், அதையும் கழற்றி தனியாக உலர்த்தவும். காலணிகள் மிகவும் நனைந்திருந்தால், இன்சோலுக்கும் காலணியின் அடிப்பகுதிக்கும் இடையில் ஈரப்பதம் அதிகமாயிருக்கும். இவற்றை அகற்றுவது காலணி நன்றாக உலர உதவும், மேலும் துர்நாற்றம் வராமல் தடுக்கும். இன்சோல்களை எடுத்த பிறகு, காலணியின் உட்புறத்தில் உள்ள ஈரத்தையும் ஒரு துணியால் மெதுவாகத் துடைக்கவும். இது காலணியின் அனைத்துப் பகுதிகளும் ஒரே சீராக உலர உதவும்.

Image Credit : stockPhoto

செய்தித்தாள்களை உள்ளே திணித்தல்:

உலர்ந்த செய்தித்தாள்களை சுருட்டி காலணிகளுக்குள் திணிக்கவும். செய்தித்தாள் காலணிக்குள் இருக்கும் ஈரத்தை உறிஞ்சி வெளியே இழுக்கும். இது மிகவும் பயனுள்ள முறை. செய்தித்தாள் ஈரமாகிவிட்டால், உடனடியாக அதை அகற்றி புதிய, உலர்ந்த செய்தித்தாள்களை திணிக்கவும். காலணிகள் மிகவும் நனைந்திருந்தால், முதல் 20 நிமிடங்களில் செய்தித்தாள் வேகமாக ஈரமாகிவிடும், அப்போது அதை மாற்ற வேண்டியிருக்கும். பிறகு, ஈரப்பதம் குறையக் குறைய, செய்தித்தாள்களை மாற்றுவதற்கு அதிக நேரம் எடுக்கலாம்.

Image Credit : stockPhoto

காலணிகளை உலர விடவும் :

காலணிகளை தரையில் வைக்க வேண்டாம். தரையில் வைத்தால், அடிப்பகுதி உலராமல் ஈரப்பதம் சிக்கிக்கொள்ளும். காலணிகளை சற்று உயரமான இடத்தில், காற்று புழங்கும் இடத்தில் வைக்கவும். உதாரணமாக, ஒரு மெஷ் ஷூ ரேக்கில் வைக்கலாம் அல்லது சுவரில் சாய்த்து, அடிப்பகுதி மேலே இருக்கும்படி வைக்கலாம். காலணிகளை ஒன்றோடு ஒன்று ஒட்டாமல், இடைவெளி விட்டு வைக்க வேண்டும், அப்போதுதான் எல்லாப் பக்கங்களிலிருந்தும் காற்று படும். மிக முக்கியமாக, காலணிகளை சூரிய ஒளியிலோ, ஹீட்டர், ஹேர் ட்ரையர் போன்ற வெப்பமூட்டும் சாதனங்களுக்கு அருகிலோ வைக்கக் கூடாது. சூடான வெப்பம் தோலை சுருக்கி, கெட்டியாக்கி, வெடிப்புகளை உருவாக்கலாம், இதனால் காலணியின் வடிவம் கெட்டுவிடும். .

Image Credit : stockPhoto

துர்நாற்றத்தைத் தவிர்ப்பது எப்படி?

தோல் காலணிகள் நீண்ட நேரம் ஈரமாக இருந்தால், துர்நாற்றம் வர வாய்ப்புள்ளது. இதைத் தவிர்க்க, காலணிகள் காய்ந்ததும், ஒரு மெல்லிய துணிப்பையில் சிறிதளவு பேக்கிங் சோடாவை போட்டு காலணிகளுக்குள் இரவு முழுவதும் வைக்கலாம். பேக்கிங் சோடா துர்நாற்றத்தை உறிஞ்சும் அல்லது செடார் மரத்தால் செய்யப்பட்ட ஷூ ட்ரீக்களை பயன்படுத்துவதன் மூலம் காலணிகளின் ஈரப்பதத்தை உறிஞ்சுவதுடன், நல்ல இயற்கையான வாசனையையும் கொடுக்கும். இது காலணிகளுக்குள் துர்நாற்றம் வராமல் தடுக்கும்.

Image Credit : stockPhoto

கவனிப்பு மற்றும் பாதுகாப்பு:

காலணிகள் முழுமையாக உலர்ந்த பிறகு, அவற்றை ஒரு நல்ல தோல் கிளீனர் கொண்டு சுத்தம் செய்யவும். மழையில் படிந்த கறை, அழுக்கு ஆகியவற்றை இது நீக்கும். கிளீனர் பயன்படுத்தும் முன், சிறிய மறைவான இடத்தில் சோதித்துப் பார்த்து, தோலின் நிறம் மாறவில்லை என்பதை உறுதிப்படுத்திக் கொள்ளுங்கள்.

பிறகு, தோல் காலணிகளுக்கான கண்டீஷனர் தடவவும். ஈரப்பதத்தை இழந்த தோல் கடினமாகிவிடும், இந்த கண்டீஷனர் தோலுக்கு தேவையான எண்ணெயை மீண்டும் அளித்து, மென்மையாகவும், பளபளப்பாகவும் வைத்திருக்க உதவும். இது தோலின் நெகிழ்வுத்தன்மையை மீட்டெடுத்து, எதிர்காலத்தில் வெடிப்புகள் வருவதைத் தடுக்கும்.

Image Credit : stockPhoto

எதிர்கால பாதுகாப்பிற்கான குறிப்புகள்:

மழையில் நனைந்த காலணிகளை சரிசெய்வது ஒரு வழி. ஆனால், இனிமேல் இப்படி நனையாமல் இருக்க சில தடுப்பு நடவடிக்கைகளையும் எடுக்கலாம்:

வாட்டர் ப்ரூஃப் ஸ்ப்ரே : தோல் காலணிகளுக்கான பிரத்யேக வாட்டர் ப்ரூஃப் ஸ்ப்ரேக்கள் கடைகளில் கிடைக்கின்றன. மழைக்காலம் தொடங்கும் முன் தோல் காலணிகளில் இதை தடவி உலர விடுவதன் மூலம் காலணிகளுக்குள் நீர் புகாவண்ணம் பாதுகாக்கலாம், குறிப்பிட்ட கால இடைவெளியில் இதை மீண்டும் தடவ வேண்டும்.