Cabbage Chutney: முட்டைக்கோஸில் இப்படி ஒரு சுவையான சட்டினியா? சிம்பிள் முறையில் இப்படி ஒருமுறை செய்து பாருங்க

Cabbage Chutney: இட்லி, தோசைக்கு சுவையான முட்டைகோஸ் சட்னி சுலபமான முறையில் எப்படி தயார் செய்வது என்பதை இந்த பதிவின் மூலம் பார்க்கலாம். 

cabbage chutney

தினமும் ஒரே மாதிரியான சட்டினி செய்து சாப்பிடுவதை விட உடலுக்கு பல்வேறு ஆரோக்கியம் அள்ளித் தரும், நீர்ச்சத்து நிறைந்த செம்ம டேஸ்ட்டியான முட்டைகோஸ் சட்னி எப்படி செய்யலாம்? என்பதை  இந்த பதிவின் மூலம் தெரிந்து கொள்ளுங்கள்

முட்டைகோஸ் சட்னி:

நறுக்கிய முட்டைக்கோஸ் – ஒரு கப்

 கடலை பருப்பு – ஒரு டீஸ்பூன்

உளுத்தம் பருப்பு – ஒரு டீஸ்பூன்

தனியா விதை – அரை ஸ்பூன

 வரமிளகாய் – நான்கு

பெரிய வெங்காயம் – ஒன்று

பச்சை மிளகாய் – 1

சமையல் எண்ணெய் – 4  டீஸ்புன் 

பழுத்த தக்காளி பழம் – 2

 நறுக்கிய மல்லித்தழை – ஒரு கொத்து 

உப்பு – தேவையான அளவு

புளி – சிறு நெல்லிக்காய் அளவு

செய்முறை விளக்கம்: 

முட்டைக்கோஸ் சட்னி செய்வதற்கு முதலில் ஒரு கப் அளவிற்கு முட்டைக்கோசை எடுத்து நன்கு கழுவி பொடிப்பொடியாக நறுக்கி வைத்துக் கொள்ளுங்கள்.

 அடுப்பில் கடாய் வைத்து ஒரு டேபிள் ஸ்பூன் அளவிற்கு எண்ணெய் விட்டு நறுக்கிய முட்டைகோஸை சேர்த்து அடுப்பை மிதமான தீயில் வைத்து பொன்னிறமாக வறுத்து எடுத்துக் கொள்ளவேண்டும்.

பிறகு அதே கடாயில் உளுந்தம் பருப்பு, கடலை பருப்பு, தனியா விதை, மிளகாய் ஆகியவற்றை ஒன்றாக சேர்த்து லேசாக வறுக்க வேண்டும். பிறகு பொடி பொடியாக நறுக்கிய வெங்காயத்தை சேர்த்து வதக்க வேண்டும். சின்ன வெங்காயம் சேர்த்தால் கூடுதல் சுவையாக இருக்கும்.

அதனுடன் பொடியாக நறுக்கிய பழுத்த தக்காளி பழங்கள்சேர்த்து வதக்க வேண்டும். பின்னர் புளியை கொட்டையில்லாமல் சேர்த்து கொள்ள வேண்டும், . பின் நறுக்கிய மல்லித்தழை சேர்த்து தேவையான அளவு உப்பு போட்டு முட்டைக்கோசை சேர்க்க வேண்டும். ஒரு நிமிடம் வதக்கி விட்டு பின்பு அடுப்பை அணைத்து விடுங்கள்.

இவற்றை ஒரு மிக்ஸி ஜாரில் சேர்த்து நைசாக அரைத்து எடுத்து வாருங்கள்.  பிறகு எண்ணெய், கடுகு போட்டு தாளித்து விடுங்கள் சுவையான முட்டைகோஸ் சட்டினி ரெடி..