- Home
- Lifestyle
- Bananas: வாழைப்பழம் சீக்கிரம் கெட்டுப்போகுதா? சமையலறையில் இருக்கும் 'இந்த' ஒரு பொருள் போதும்!
Bananas: வாழைப்பழம் சீக்கிரம் கெட்டுப்போகுதா? சமையலறையில் இருக்கும் 'இந்த' ஒரு பொருள் போதும்!
Bananas: நீங்கள் வீட்டில் வாங்கி வைத்த வாழைப்பழம் சீக்கிரம் கெட்டுப்போகுதா? வாழைப்பழத்தை நீண்ட நாட்கள் கெடாமல் ப்ரெஷ்ஷாக வைத்து இருப்பது எப்படி? என்பது குறித்து இந்த செய்தியில் பார்க்கலாம்.
வாழைப்பழம் நீண்ட நாள் ப்ரெஷ்ஷாக இருக்க டிப்ஸ்
நமது நாட்டில் ஏழை, எளியவர்கள் என அனைவரும் சாப்பிடும் ஒரே பழம் என்றால் அது வாழைப்பழம் தான். இதில் விலையும் குறைவு. அதே சமயம் சத்துகள் ஏராளம். வீட்டில் வாங்கி வந்த வாழைப்பழம், ஓரிரு நாட்களிலேயே தோல் கறுத்து, குழைந்து போவது என்பது நம்மில் பலரும் சந்திக்கும் ஒரு பொதுவான பிரச்னை. குறிப்பாக, மொத்தமாக ஒரு சீப்பு வாழைப்பழங்களை வாங்கும்போது, அவை சீக்கிரம் பழுத்து வீணாகிவிடும். ஆனால், இதைத் தவிர்க்க உங்கள் சமையலறையிலேயே ஒரு எளிய தந்திரம் இருக்கிறது; அதுதான் அலுமினியம் ஃபாயில்.
வாழைப்பழங்கள் பழுக்கும்போது இயற்கையாகவே எத்திலீன் என்ற வாயுவை வெளியிடுகின்றன. இந்த வாயுதான் பழம் வேகமாகப் பழுத்து, மென்மையாகக் காரணமே. வாழைப்பழத்தின் தண்டுப் பகுதியை அலுமினியம் ஃபாயில் கொண்டு இறுக்கமாகச் சுற்றும்போது, இந்த எத்திலீன் வாயு வெளியேறுவது கட்டுப்படுத்தப்படுகிறது. இதன் விளைவாக, பழம் பழுக்கும் வேகம் குறைந்து, சில நாட்களுக்குக் கூடுதலாக ஃப்ரெஷ்ஷாக இருக்கும்.
அலுமினியம் ஃபாயில் தந்திரம்: எப்படிச் செய்வது?
வாழைப்பழ சீப்பின் மொத்த தண்டுப் பகுதியையும் ஃபாயிலால் சுற்றுவதை விட, ஒவ்வொரு வாழைப்பழத்தையும் தனித்தனியாகப் பிரித்து, அதன் காம்புப் பகுதியைச் சுற்றுவது இன்னும் சிறப்பான பலனைத் தரும். ஏனென்றால், இது ஒவ்வொரு பழத்திலிருந்தும் வாயு வெளியேறுவதைத் தனித்தனியாகக் கட்டுப்படுத்தும். பழத்தின் மற்ற பகுதிகளைச் சுற்றத் தேவையில்லை, காம்புப் பகுதியை மட்டும் சுற்றினால் போதுமானது.
நிச்சயமாக, இது வாழைப்பழங்கள் என்றென்றைக்கும் கெட்டுப் போகாமல் தடுக்கும் ஒரு மந்திரக்கோல் அல்ல. ஆனால், வழக்கத்தை விட சில நாட்கள் கூடுதலாக அதன் புத்துணர்ச்சியைத் தக்கவைக்க இந்த முறை நிச்சயம் உதவும். இதைவிட ஒரு சிம்பிள் டெக்னிக் இருக்க முடியுமா என்ன?
வாழைப்பழத்தைப் பாதுகாக்க மேலும் சில சூப்பர் டிப்ஸ்
ஃபாயில் சுற்றுவதுடன், வேறு சில விஷயங்களையும் கவனித்தால், வாழைப்பழங்களை இன்னும் சில நாட்கள் ப்ரெஷ்ஷாக வைத்திருக்கலாம். ஆப்பிள், தக்காளி, அவகேடோ போன்ற பழங்கள் அதிக எத்திலீன் வாயுவை வெளியிடுபவை. எனவே, வாழைப்பழங்களை ஒருபோதும் இந்தப் பழங்களுடன் ஒரே கூடைக்குள் சேர்த்து வைக்காதீர்கள்.
வாழைப்பழங்களை நேரடியாக சூரிய ஒளி படும் இடத்திலோ, அடுப்புக்கு அருகிலோ வைப்பதைத் தவிர்க்க வேண்டும். அதிக வெப்பம் பழுக்கும் வேகத்தை அதிகரித்துவிடும். நல்ல காற்றோட்டமான, சற்றே குளிர்ச்சியான இடத்தில் அறை வெப்பநிலையில் வைப்பதே சிறந்தது. பழங்களை ஒன்றன் மீது ஒன்றாக அடுக்கி வைக்கும்போது, அதன் எடையால் அழுத்தம் ஏற்பட்டு காயங்கள் உண்டாகும். இந்தக் காயம்பட்ட இடங்கள் விரைவாகக் கறுத்துவிடும். இதைத் தவிர்க்க, வாழைப்பழங்களை ஒரு கொக்கியில் தொங்கவிடுவது மிகச் சிறந்த வழியாகும்.
பழுத்த பழங்களை என்ன செய்வது?
இத்தனை செய்தும் பழங்கள் அதிகமாகப் பழுத்துவிட்டால் கவலை வேண்டாம். அவற்றை ஸ்மூத்தி, மில்க்ஷேக், கேக் அல்லது பான்கேக் செய்யப் பயன்படுத்தலாம். மேலும், பழுத்த பழங்களை துண்டுகளாக்கி, ஃபிரீசரில் சேமித்து வைத்தால், தேவைப்படும்போது எடுத்துப் பயன்படுத்திக்கொள்ளலாம்.
ஏஷ்யாநெட் தமிழ் நியூஸின் லைஃப்ஸ்டைல் பிரிவு, வாசகர்களுக்கு வாழ்க்கை முறை, உறவுகள் மற்றும் நடைமுறை வாழ்க்கை குறித்து வளமான தகவல்களை வழங்குகிறது. இதில் ஆரோக்கிய ஆலோசனைகள், உணவு மற்றும் ஊட்டச்சத்து குறிப்புகள், ஃபாஷன் டிரெண்ட்ஸ் மற்றும் தினசரி வாழ்க்கையை மேம்படுத்தும் சிந்தனையூட்டும் கருத்துகள் அடங்கும்.
