தமிழகத்தில் எகிறும் டெங்கு பாதிப்பு: குழந்தைகளைப் பாதுகாக்க பெற்றோர்கள் செய்ய வேண்டிய முக்கிய விஷயங்கள்!

சென்னையில் பருவமழை, காலநிலை மாற்றத்தால் ஏடிஸ் கொசுக்களால் பரவும் டெங்கு காய்ச்சல் அச்சுறுத்தல் மீண்டும் அதிகரித்துள்ளது. ஏ.டி.ஸ் கொசுக்கள் நன்னீரில் மட்டுமே உற்பத்தியாவதால் வீட்டைச் சுற்றியுள்ள இடங்களில் நீர் தேங்காமல் அகற்ற வேண்டும் என அறிவுறுத்தல்.

Image Credit : x

சென்னையில் தீவிரமடையும் டெங்கு காய்ச்சல் அச்சுறுத்தல்

மழைக்காலங்கள், பருவநிலை மாற்ற காலங்களில் தமிழ்நாட்டின் தலைநகரான சென்னையில் ஆண்டுதோறும் டெங்கு காய்ச்சலின் தாக்கம் அதிகரித்து வருவது மிகுந்த கவலைக்குரிய விஷயமாக மாறியுள்ளது. ஏடிஸ் (Aedes) வகை கொசுக்களின் மூலம் பரவும் இந்தக் கொடிய டெங்கு காய்ச்சலை உரிய நேரத்தில் கண்டறிந்து சிகிச்சை அளிக்காவிட்டால் அது உயிருக்கே ஆபத்தாக முடியும் என்பதால், பொதுமக்கள் முழுமையான விழிப்புணர்வுடனும் முன்னெச்சரிக்கையுடனும் இருக்க வேண்டும் என அறிவுறுத்தப்பட்டுள்ளது.

Image Credit : Google

டெங்கு காய்ச்சலின் முக்கிய அறிகுறிகள் என்னென்ன?

டெங்கு வைரஸ் தாக்கிய 3 முதல் 14 நாட்களுக்குள் அதற்கான அறிகுறிகள் வெளிப்படத் தொடங்குகின்றன. உடல் வெப்பநிலை திடீரென 104 டிகிரி பாரன்ஹீட் வரை உயர்ந்து கடுமையான காய்ச்சல் ஏற்படும். நெற்றி மற்றும் தலையின் பின்புறத்தில் தாங்க முடியாத வலி ஏற்படுவதுடன், கண்களை அசைக்கும்போது கண்களுக்குப் பின்னால் தீவிர வலி உண்டாகும்.

எலும்புகளை உடைப்பது போன்ற தாங்க முடியாத உடல் வலி மற்றும் மூட்டு வலி ஏற்படுவதால், இதற்கு 'எலும்பு முறிவு காய்ச்சல்' (Breakbone Fever) என்ற பெயரும் உண்டு. காய்ச்சல் தொடங்கிய 2 அல்லது 3 நாட்களில் முகம், மார்பு, கை மற்றும் கால் பகுதிகளில் சிறிய தடிப்புகள் அல்லது சிவந்த புள்ளிகள் தோன்றும். எதிலும் கவனம் செலுத்த முடியாத அளவிற்கு அதீத உடல் பலவீனமும் சோர்வும் ஏற்படும்.

தீவிர டெங்கு பாதிப்பு ஏற்படும்போது, ஈறுகளில் இரத்தம் கசிதல், மூக்கில் ரத்தம் வடிதல் மற்றும் வாந்தியில் ரத்தம் வருவது போன்ற ஆபத்தான அறிகுறிகள் தோன்றும். இத்துடன் ரத்தத்தில் உள்ள தட்டணுக்களின் எண்ணிக்கை மிக வேகமாகக் குறையும்.

Image Credit : Freepik

தடுப்பு & முன்னெச்சரிக்கை நடவடிக்கைகள் என்ன?

டெங்குவை உருவாக்கும் ஏடிஸ் கொசுக்கள் தேங்கி நிற்கும் நன்னீரில் மட்டுமே முட்டையிட்டுப் பெருகும் தன்மை கொண்டவை. எனவே சுற்றுப்புறத் தூய்மையே சிறந்த பாதுகாப்பாகும். வீடுகளுக்கு அருகிலுள்ள பழைய டயர்கள், தேங்காய் சிரட்டைகள், உடைந்த பிளாஸ்டிக் பாத்திரங்கள், ஆட்டு உரல்கள் மற்றும் பூந்தொட்டி தட்டுகளில் மழைநீர் தேங்காமல் அகற்ற வேண்டும். தண்ணீர் தொட்டிகள் மற்றும் பீப்பாய்களை எப்போதும் காற்றுப் புகாமல் மூடி வைக்க வேண்டும்.

வீடுகளில் கொசு உற்பத்தியைத் தடுக்க வாரம் ஒருமுறை தண்ணீர் தொட்டிகளை முழுமையாகக் காலி செய்து உலர வைக்கும் 'ட்ரை டே' (Dry Day) நடைமுறையை கடைப்பிடிக்க வேண்டும். கொசு வலைகள், கொசு விரட்டிதிரவங்கள் அல்லது களிம்புகளைப் பயன்படுத்தலாம். ஏடிஸ் கொசுக்கள் பிரதானமாகப் பகல் நேரங்களில் கடிக்கும் என்பதால் குழந்தைகள் மற்றும் பெரியவர்கள் உடலை முழுமையாக மூடும் முழுக்கால் சட்டைகள், நீண்ட ஆடைகளை அணிய வேண்டும்.

மேல்நிலை நீர்த்தேக்கத் தொட்டிகளை முறையாகச் சுத்தம் செய்து குளோரின் மூலம் கிருமி நீக்கம் செய்ய வேண்டும். மாநகராட்சி மற்றும் உள்ளாட்சி அமைப்புகள் மேற்கொள்ளும் கொசு மருந்து அடிக்கும் பணிகளுக்கு பொதுமக்கள் முழு ஒத்துழைப்பு அளிக்க வேண்டும்.

Image Credit : Freepik

காய்ச்சல் ஏற்பட்டால் செய்ய வேண்டியவை

டெங்கு அறிகுறிகள் தென்பட்டால் உடனடியாக அரசு அல்லது தனியார் மருத்துவமனைக்குச் சென்று NS1 Antigen மற்றும் CBC (முழு இரத்தப் பரிசோதனை) செய்துகொள்வது கட்டாயமாகும். மருத்துவரின் ஆலோசனையின்றி மருந்தகங்களில் சுயமாக வலி நிவாரணி மாத்திரைகளை (குறிப்பாக ஆஸ்பிரின் அல்லது ஐபுபுரூஃபன்) வாங்கி உட்கொள்வது இரத்தப்போக்கு அபாயத்தை மேலும் தீவிரப்படுத்தும் என்பதால் அதைத் திட்டவட்டமாகத் தவிர்க்க வேண்டும்.

உடலில் நீரிழப்பு ஏற்படாமல் தடுக்க இளநீர், கஞ்சி, எலுமிச்சை சாறு மற்றும் சுடுநீர் போன்ற திரவ உணவுகளை அதிக அளவில் உட்கொள்ள வேண்டும். முறையான மருத்துவ கண்காணிப்பு, சரியான சிகிச்சை மற்றும் போதுமான ஓய்வு ஆகியவற்றின் மூலம் டெங்கு காய்ச்சலிலிருந்து விரைவாகவும் முழுமையாகவும் குணமடைய முடியும்.