விண்வெளி பயணத்திற்கு முன் சுபான்ஷு சுக்லா கேட்ட ஏ.ஆர்.ரகுமான் பாடல்
சுபான்ஷு சுக்லா, ஆக்சியம் 4 விண்கலத்தில் விமானியாக விண்வெளி நிலையத்திற்குச் சென்றுள்ளார். விண்வெளிப் பயணத்திற்கு முன்பு ஏ.ஆர்.ரகுமானின் 'யூஹி சலா சல் ராஹி' பாடலைக் கேட்டுள்ளார்.
சுபான்ஷு சுக்லா விண்வெளிப் பயணம்
அமெரிக்காவின் ஸ்பேஸ் எக்ஸ் நிறுவனமும், ஆக்சியம் ஸ்பேஸ் நிறுவனமும் இணைந்து ஆக்சியம் 4 என்ற பெயரில் அனுப்பும் 4வது தனியார் விண்கலம், இன்று வெற்றிகரமாக விண்ணில் செலுத்தப்பட்டது. இந்த விண்கலத்தின் விமானியாக இந்திய விண்வெளி ஆய்வு நிறுவனத்தின் (இஸ்ரோ) வீரர் சுபான்ஷு சுக்லா (39) செயல்பட உள்ளார். 41 ஆண்டுகளுக்குப் பிறகு விண்வெளி நிலையம் செல்லும் இந்தியர் என்ற சாதனையை இவர் படைத்துள்ளார்.
அமெரிக்காவின் புளோரிடா மாகாணத்தில் அமைந்துள்ள நாசாவின் கென்னடி விண்வெளி மையத்தில் இருந்து 'பால்கன்-9' ராக்கெட் மூலம், இன்று மதியம் 12.01 மணிக்கு (இந்திய நேரம்) 'ஸ்பேஸ்எக்ஸ் டிராகன்' விண்கலம் வெற்றிகரமாக விண்ணில் செலுத்தப்பட்டது. இந்த விண்கலம் நாளை (ஜூன் 26) மாலை 4.30 மணிக்கு சர்வதேச விண்வெளி நிலையம் சென்றடையும்.
"ஜெய்ஹிந்த்.. ஜெய்பாரத்.." முழக்கம்
இந்த விண்கலத்தில் அமெரிக்கா, இந்தியா, போலந்து மற்றும் ஹங்கேரி ஆகிய நாடுகளைச் சேர்ந்த தலா ஒருவர் என மொத்தம் 4 விண்வெளி வீரர்கள் பயணிக்கின்றனர். ராக்கெட் விண்வெளியை அடைந்த பிறகு விண்கலத்தைச் செலுத்தும் பணியை மேற்கொள்ளும் விமானியாக இந்திய விண்வெளி வீரர் சுபான்ஷு சுக்லா செயல்பட உள்ளார்.
விண்வெளிப் பயணத்தின் துவக்கத்தின்போது, இந்திய விண்வெளி வீரர் சுபான்ஷு சுக்லா "ஜெய்ஹிந்த்.. ஜெய்பாரத்.." என்று கம்பீரமாக முழங்கி தனது தேச பக்தியை வெளிப்படுத்தினார். இந்த நிகழ்வு இந்தியர்கள் மத்தியில் பெரும் பெருமிதத்தை ஏற்படுத்தியுள்ளது.
ஏ.ஆர்.ரகுமான் பாடல் விருப்பம்
இந்த முக்கிய விண்வெளிப் பயணத்திற்குப் புறப்படுவதற்கு முன்பு இசையமைப்பாளர் ஏ.ஆர்.ரகுமானின் பாடலை சுபான்ஷு சுக்லா விரும்பி கேட்டுள்ளார் என்ற தகவல் தற்போது வெளியாகியுள்ளது. விண்வெளிக்குச் செல்வதற்கு முன்பாக 4 விண்வெளி வீரர்களும் எந்தெந்த பாடலை விரும்பி கேட்டனர் என்பது குறித்த தகவல் வெளியிடப்பட்டது.
அதன்படி, 2004 ஆம் ஆண்டு ஷாருக்கான் நடிப்பில் வெளியான 'சுவதேஸ்' என்ற பாலிவுட் திரைப்படத்தில் இடம்பெற்ற 'யூஹி சலா சல் ராஹி' என்ற இந்தி பாடல் சுபான்ஷு சுக்லாவின் விருப்பப் பாடலாக இருந்துள்ளது. ஏ.ஆர்.ரகுமான் இசையில் பின்னணி பாடகர்கள் உதித் நாராயணன், ஹரிஹரன் ஆகியோர் இணைந்து பாடிய இந்த பாடல் தற்போது இணையத்தில் மீண்டும் டிரெண்டாகி வருகிறது. தேசபக்தி உணர்வோடு ஏ.ஆர்.ரகுமான் இசையில் உருவான பாடல் விண்வெளிக்குச் செல்லும் இந்திய வீரருக்கு உத்வேகம் அளித்த நிகழ்வு பலரையும் கவர்ந்துள்ளது.