100 பேரிடம் பேசியாச்சு... இதுதான் அடுத்த மூவ்... மோடி - ஷாவின் மாஸ்டர் ஸ்டோக்!
பீகார் தேர்தலுக்கு முன் பாஜகவின் புதிய தேசியத் தலைவர் தேர்ந்தெடுக்கப்படலாம். 100 முக்கிய பிரமுகர்களிடம் விவாதம் நடத்தியும் இன்னும் பல மாநில அலகுகளில் தலைவர் தேர்வு முடியவில்லை. தற்போதைய தலைவர் ஜே.பி. நட்டாவின் பதவிக்காலம் நீட்டிக்கப்பட்டுள்ளது.
பாஜகவின் புதிய தேசியத் தலைவர் யார்?
பீகார் மாநில சட்டமன்றத் தேர்தல் தேதிகள் அறிவிக்கப்படுவதற்கு முன்னதாகவே, பாரதிய ஜனதா கட்சிக்கு புதிய தேசியத் தலைவர் தேர்வு செய்யப்படலாம் என்று தகவல்கள் தெரிவிக்கின்றன. புதிய தேசியத் தலைவரின் கீழ் தேர்தலை எதிர்கொள்ள விரும்புவதாக கட்சி வட்டாரங்கள் தெரிவிக்கின்றன.
புதிய தலைவர் தேர்வு தாமதமாவதற்கு பல காரணங்கள் உள்ளதாகக் கூறப்படுகிறது.
100 முக்கிய பிரமுகர்களிடம் விவாதம்
கட்சி மூத்த தலைவர்கள் மற்றும் அதன் கொள்கை வழிகாட்டியான ஆர்எஸ்எஸ் (ராஷ்டிரிய ஸ்வயம்சேவக் சங்கம்) அமைப்பைச் சேர்ந்தவர்கள், சுமார் 100 முக்கிய பிரமுகர்களிடம் புதிய தலைவருக்கான பெயர்களைப் பற்றி விவாதித்துள்ளனர்.
துணை ஜனாதிபதி ஜகதீப் தன்கரின் திடீர் ராஜினாமாவைத் தொடர்ந்து, வரும் செப்டம்பர் 9 ஆம் தேதி துணை ஜனாதிபதி தேர்தல் நடத்தப்பட உள்ளது. இதில், கட்சியின் வேட்பாளரான மகாராஷ்டிரா ஆளுநர் சி.பி. ராதாகிருஷ்ணன் அதிக வாக்குகள் வித்தியாசத்தில் வெற்றி பெற வேண்டும் என்பதில் பாஜக கவனம் செலுத்தி வருகிறது.
கட்சியின் விதி என்ன சொல்கிறது?
கட்சியின் விதிகளின்படி, தேசியத் தலைவர் தேர்ந்தெடுக்கப்படுவதற்கு முன்னதாக, அதன் 36 மாநில மற்றும் யூனியன் பிரதேச அலகுகளில் குறைந்தது 19 அலகுகளுக்கு தேர்ந்தெடுக்கப்பட்ட தலைவர்கள் இருக்க வேண்டும். இதுவரை 28 மாநிலங்களில் இந்த செயல்முறை முடிந்துவிட்டாலும், குஜராத், உத்தரப் பிரதேசம், கர்நாடகா, ஹரியானா, டெல்லி, ஜார்க்கண்ட் மற்றும் மணிப்பூர் உள்ளிட்ட முக்கிய மாநிலங்களில் இன்னும் தலைவர்கள் தேர்வு செய்யப்பட வேண்டும்.
தற்போது பாஜகவின் தேசியத் தலைவராக ஜே.பி. நட்டா உள்ளார். இவர் ஜனவரி 2020-ல் தேர்ந்தெடுக்கப்பட்டார். அவரது மூன்று ஆண்டு பதவிக்காலம் முடிந்த பிறகு, 2024 மக்களவைத் தேர்தலுக்காகவும், அமைப்பு ரீதியான பணிகளுக்காகவும் இரண்டு முறை அவரது பதவிக்காலம் நீட்டிக்கப்பட்டது.
புதிய தலைவர்களுக்கான விதிமுறைகள்
பாஜகவின் இளைஞர் பிரிவுகளான மண்டலத் தலைவர்களைத் தேர்ந்தெடுப்பதில், 40 வயதிற்குட்பட்ட தலைவர்களுக்கு வாய்ப்பு அளிக்க முடிவு செய்யப்பட்டுள்ளது. அதேசமயம், மாவட்ட மற்றும் மாநிலத் தலைவர்களாக வர விரும்புபவர்கள் குறைந்தது 10 ஆண்டுகள் கட்சியில் தீவிர உறுப்பினராக இருக்க வேண்டும் என்ற விதிமுறை கடைபிடிக்கப்படுகிறது.
மற்ற கட்சிகளிலிருந்து வரும் தலைவர்களுக்கு முக்கிய பொறுப்புகள் அளிக்கப்படுவது குறித்து கட்சித் தொண்டர்களிடையே நிலவும் அதிருப்தியைப் போக்க இந்த முடிவு எடுக்கப்பட்டுள்ளது. இருப்பினும், சில விதிவிலக்குகளும் உண்டு.
