- Home
- இந்தியா
- நீல கலர்ல முட்டை போட்ட கோழி... ஒரே நாளில் அடித்த ஜாக்பாட்... ஆச்சரியத்தில் கர்நாடக கிராமம்!
நீல கலர்ல முட்டை போட்ட கோழி... ஒரே நாளில் அடித்த ஜாக்பாட்... ஆச்சரியத்தில் கர்நாடக கிராமம்!
கர்நாடக மாநிலத்தில் ஒரு கோழி நீல நிற முட்டையிட்ட சம்பவம் அப்பகுதி மக்களை ஆச்சரியத்தில் ஆழ்த்தியுள்ளது. வழக்கமாக வெள்ளை முட்டையிடும் இந்தக் கோழி, திடீரென நீல நிற முட்டையிட்டது ஆச்சரியத்தை ஏற்படுத்தியுள்ளது.
ஊதா நிறத்தில் முட்டையிட்ட கோழி
கர்நாடக மாநிலம் தாவணகெரே மாவட்டம் சென்னகிரி தாலுகா நெல்லூர் கிராமத்தைச் சேர்ந்த சையத் நூர் என்பவருக்குச் சொந்தமான ஒரு கோழி, வழக்கமாக வெள்ளை நிற முட்டைகளை இட்டு வந்த நிலையில், திடீரென நீல நிற முட்டை ஒன்றை இட்டு அனைவரையும் ஆச்சரியத்தில் ஆழ்த்தியுள்ளது.
இரண்டு ஆண்டுகளுக்கு முன்பு ஒரு வியாபாரியிடம் இருந்து ₹20 கொடுத்து இந்த கோழியை வாங்கிய நூர், மற்ற கோழிகளுடன் அதையும் வளர்த்து வருகிறார். அந்த கோழி தினமும் வெள்ளை நிற முட்டைகளை இட்டு வந்தது. திடீரென ஒருநாள் அது நீல நிற முட்டையிட்டதைக் கண்ட நூர் அதை அப்படியே பாதுகாப்பாக வைத்துள்ளார். இந்த அரிய முட்டையைப் பார்க்க மக்கள் கூட்டம் கூட்டமாக வந்து செல்கின்றனர்.
முட்டை நீல நிறமாக மாறக் காரணம் என்ன?
"என்னிடமிருந்த 10 கோழிகளுக்கும் ஒரே உணவைத்தான் கொடுத்தேன். மற்ற கோழிகள் வெள்ளை அல்லது மஞ்சள் நிற முட்டைகளை இடுகின்றன. ஆனால், இந்த கோழி மட்டும் முதன்முறையாக நீல நிற முட்டையை இட்டது" என்கிறார் நூர்.
விலங்கு வளர்ப்பு மற்றும் கால்நடை சேவைகள் துறையின் உதவி இயக்குநர் டாக்டர் அசோக், இந்த சம்பவம் குறித்து வியப்பு தெரிவித்தார். "பச்சை கலந்த மஞ்சள் நிற முட்டைகளை நான் பார்த்திருக்கிறேன். ஆனால், இந்த கோழி இட்ட நீல நிற முட்டை எனக்கு ஆச்சரியமாக இருக்கிறது. கோழிகள் அரிதாகவே இப்படிப்பட்ட முட்டைகளை இடும். கோழியின் கணையத்தில் உள்ள 'பிலிவெர்டின்' (biliverdin) என்ற நிறமி காரணமாக இது நடந்திருக்கலாம்" என்று அவர் கூறினார்.
இரண்டு ஆண்டுகளுக்கு முன்பு...
கால்நடை மருத்துவ அதிகாரி டாக்டர் ரகு நாயக், இந்த முட்டைகள் நீல நிறமாக மாற முக்கியக் காரணம் நிறமிதான் என்று தெரிவித்தார். "பிலிவெர்டின் நிறமி மாறும்போது, முட்டையின் வெளிப்புற அடுக்கு நீல நிறமாக மாறும். சில சமயங்களில் மரபணு பிரச்சனை காரணமாகவும் இப்படி நிகழும். சாப்பிடும் உணவில் பிரச்சனை இருந்தாலும் இப்படி நிகழ வாய்ப்பு உள்ளது" என்று அவர் கூறினார்.
நூரின் நண்பர் ஹஃபீஸ், "இந்த கோழி தினமும் வெள்ளை முட்டைகளை இடும். நூர் அதை இரண்டு ஆண்டுகளுக்கு முன்பு ₹20க்கு ஒரு வியாபாரியிடமிருந்து வாங்கினார். இரண்டு நாட்களுக்கு முன்பு அது நீல முட்டையை இட்டது. அதன் நிறம் ஆச்சரியமாக இருக்கிறது. என் வாழ்க்கையில் இப்படி ஒரு நீல முட்டையை நான் பார்த்ததில்லை, கேள்விப்பட்டதில்லை" என்றார்.
பிரபலமான ஊதா முட்டை
இந்த அரிய முட்டையுடன் புகைப்படம் எடுத்துக் கொண்ட கோழியின் உரிமையாளர் நூர், "இது எப்படி நடந்தது என்று எனக்குத் தெரியவில்லை. இப்போது இது ஒரு பெரிய செய்தியாகிவிட்டது" என்று ஆச்சரியத்துடன் கூறுகிறார்.
தென் அமெரிக்காவின் சிலி நாட்டிலுள்ள அரௌக்கானா கோழிகள் (Araucana hen) மற்றும் 1990களில் அமெரிக்க கோழி மரபியல் நிபுணரால் உருவாக்கப்பட்ட வைட்டிங் ட்ரூ ப்ளூ (Whiting True Blue Chicken) என்ற கலப்பினக் கோழிகளும் நீல நிற முட்டைகளை இடுகின்றன என்பது குறிப்பிடத்தக்கது.