Crispy Kalakala : சாப்பிடச் சாப்பிட இன்னும் கேட்கத் தோன்றும்.. ஈஸியான கலகலா ஸ்நாக்ஸ்!

Crispy Kalakala : மாலை நேர டீ, காபியுடன் சாப்பிட மொறுமொறுப்பான ஸ்நாக்ஸ் வேண்டுமா? மைதா, சர்க்கரை, நெய், ஏலக்காய் வைத்து எளிதாக கலகலா செய்வது எப்படி? தேவையான பொருட்கள், செய்முறை மற்றும் சுவையான குறிப்புகள் இதோ.

Image Credit : Gemini Ai

மொறுமொறுப்பான கலகலா

மாலை நேரத்தில் டீ அல்லது காபியுடன் ஏதாவது மொறுமொறுப்பாகச் சாப்பிட வேண்டும் என்று தோன்றுகிறதா? கடைகளில் விற்கும் ஸ்நாக்ஸ்களை வாங்குவதைவிட வீட்டிலேயே குறைந்த செலவில், எளிய பொருட்களை வைத்து சுவையான பலகாரம் செய்து அசத்தலாம். சிறியவர்கள் முதல் பெரியவர்கள் வரை விரும்பிச் சாப்பிடும் வகையில், இனிப்பும் மொறுமொறுப்பும் கலந்த ஒரு சூப்பரான ஸ்நாக்ஸ்தான் கலகலா.

மைதா, சர்க்கரை, நெய், ஏலக்காய் என வீட்டில் எளிதாகக் கிடைக்கும் பொருட்களை வைத்தே இதைத் தயாரித்துவிடலாம். ஒருமுறை செய்து வைத்தால் போதும், மாலை நேர சிற்றுண்டியாக மட்டுமின்றி பண்டிகை நாட்களிலும் பரிமாறலாம்.

சரி, இப்போது இந்த மொறுமொறுப்பான கலகலாவை வீட்டிலேயே எப்படிச் செய்வது என்று பார்க்கலாம்.

Image Credit : Gemini Ai

தேவையான பொருட்கள்

• மைதா மாவு - 1 கப்
• சர்க்கரை - 1\2 கப்
• நெய் - 1 டேபிள்ஸ்பூன்
• ஏலக்காய் - 2
• உப்பு - ஒரு சிட்டிகை
• எண்ணெய் - பொரிப்பதற்குத் தேவையான அளவு
• தண்ணீர் - தேவையான அளவு

Image Credit : Gemini Ai

கலகலா செய்முறை - படி 1

சர்க்கரைப் பாகு தயாரித்தல்

முதலில் ஒரு கடாயை அடுப்பில் வைத்து அதில் ஒரு டேபிள்ஸ்பூன் நெய் சேர்க்கவும். நெய் உருகியதும் சர்க்கரை மற்றும் தேவையான அளவு தண்ணீர் சேர்க்கவும். இதனுடன் ஏலக்காயை சர்க்கரையுடன் சேர்த்து அரைத்த பொடியையும் கலந்து கொள்ளவும்.

சர்க்கரை முழுவதுமாகக் கரையும் வரை மிதமான தீயில் சூடாக்கவும். இதற்கு கம்பிப் பதம் தேவையில்லை. சர்க்கரை கரைந்தாலே போதுமானது.

Image Credit : Gemini Ai

படி 2

மாவு பிசைதல்

சர்க்கரை கரைந்ததும் அடுப்பை அணைத்துவிட்டு கலவையைச் சிறிது ஆறவிடவும். பின்னர் அதில் மைதா மாவு மற்றும் ஒரு சிட்டிகை உப்பு சேர்க்கவும். அனைத்தையும் நன்றாகக் கலந்து மென்மையான மாவாகப் பிசைந்து கொள்ளவும். மாவு மிகவும் இளக்கமாகவோ அல்லது மிகவும் கெட்டியாகவோ இல்லாமல் இருக்க வேண்டும்.

Image Credit : Gemini Ai

படி 3

சிறிய துண்டுகளாக வெட்டுதல்

இப்போது பிசைந்த மாவிலிருந்து சிறிய உருண்டைகளாகப் பிரித்துக் கொள்ளவும். ஒவ்வொரு உருண்டையையும் சப்பாத்தியைவிட சற்று தடிமனாக இருக்க வேண்டும். பின்னர் கத்தியைப் பயன்படுத்தி சிறிய சதுரம் அல்லது வைர வடிவத் துண்டுகளாக வெட்டிக் கொள்ளவும்.

Image Credit : Gemini Ai

படி 4

எண்ணெயில் பொரித்தல்

ஒரு கடாயில் எண்ணெய் ஊற்றி மிதமான சூட்டில் காயவைக்கவும். எண்ணெய் சூடானதும் வெட்டி வைத்துள்ள மாவுத் துண்டுகளைச் சிறிது சிறிதாகப் போடவும். அவை ஒன்றோடு ஒன்று ஒட்டாமல் பார்த்துக் கொள்ளவும். மிதமான தீயில் பொன்னிறமாகவும் மொறுமொறுப்பாகவும் மாறும் வரை பொரித்தெடுக்கவும்.

Image Credit : Gemini Ai

படி 5

பரிமாறுதல்

பொரித்த கலகலாவை எண்ணெய் வடிந்ததும் ஒரு தட்டில் மாற்றி ஆறவிடவும். நன்றாக ஆறியதும் அதன் மொறுமொறுப்பான தன்மை அதிகரிக்கும். அவ்வளவுதான் சுவையான, மொறுமொறுப்பான கலகலா தயார்.

Image Credit : Gemini Ai

கலகலா சுவையாக வர சில முக்கியமான குறிப்புகள்

• சர்க்கரைப் பாகு தயாரிக்கும்போது கம்பிப் பதம் வரும் வரை காய்ச்ச வேண்டியதில்லை.
• மாவை மிகவும் மென்மையாகப் பிசையாமல், உருட்டித் தேய்க்கும் பதத்தில் வைத்துக் கொள்ளவும்.
• மாவை சப்பாத்தி போன்று மிகவும் மெல்லியதாகத் தேய்க்க வேண்டாம்.
• துண்டுகளை ஒரே அளவில் வெட்டினால் அனைத்தும் ஒரே சீராக வேகும்.
• எண்ணெய் அதிகமாகச் சூடாக இருந்தால் வெளிப்புறம் மட்டும் நிறம் மாறி உள்ளே வேகாமல் போகலாம்.
• குறைந்த அல்லது மிதமான தீயில் பொறிப்பதே மொறுமொறுப்புக்கு முக்கியம்.
• முழுமையாக ஆறிய பிறகு காற்றுப் புகாத டப்பாவில் சேமித்து வைக்கவும்.

Image Credit : Gemini Ai

எப்போது சாப்பிடலாம்?

இந்த கலகலாவை மாலை நேரத்தில் டீ, காபியுடன் சாப்பிடலாம். குழந்தைகளுக்குப் பள்ளி முடிந்து வந்ததும் சிற்றுண்டியாகக் கொடுக்கலாம். தீபாவளி, பொங்கல் போன்ற பண்டிகை நாட்களிலும் வீட்டிலேயே செய்து உறவினர்களுக்கும் நண்பர்களுக்கும் பரிமாறலாம்.

குறைந்த பொருட்கள், எளிய செய்முறை, நிறைவான சுவை. வீட்டிலேயே இந்த கலகலாவை ஒருமுறை செய்து பாருங்கள்.