Samantha Favorite Thayir Vadai : நடிகை சமந்தாவுக்கு பிடித்த ஹோட்டல் தயிர் வடை..வீட்டிலேயே அதே சுவையில் செய்வது எப்படி?

Samantha Thayir Vadai :நடிகை சமந்தா நினைவுகூர்ந்த தயிர் வடையை வீட்டிலேயே ஹோட்டல் சுவையில் செய்யலாம். மென்மையான உளுந்து வடை, சுவையான தயிர் கலவை, மணக்கும் கடுகு தாளிப்பு என தயிர் வடை செய்முறை, தேவையான பொருட்கள் மற்றும் சுவை கூடுதல் டிப்ஸ் இதோ.

Image Credit : Gemini Ai + @SonyLIVTamil youtube

சமந்தாவுக்கு பிடித்த ஹோட்டல் தயிர் வடை

பள்ளிப் பருவத்தில் சாப்பிட்ட ஒரு உணவு, பல ஆண்டுகள் கடந்தாலும் நம்முடைய நினைவுகளை அப்படியே மீட்டுக் கொண்டுவரும். அப்படித்தான் நடிகை சமந்தா ரூத் பிரபுவுக்கும் தயிர் வடை தொடர்பான ஓர் இனிமையான நினைவு இருக்கிறது.

சமீபத்தில் அவர் பங்கேற்றுவரும் Celebrity MasterChef Tamil நிகழ்ச்சியில், பல்லாவரத்தில் உள்ள துர்கா ஹோட்டரில் சாப்பிட்ட தயிர் வடையை நினைவுகூர்ந்து உணர்ச்சிவசப்பட்டுள்ளார்.

மெத்தென்ற உளுந்து வடை, அதில் ஊறிய கெட்டியான தயிர், மேலே தூவப்படும் காரசாரமான மிளகாய்த் தூள், மணக்கும் கடுகு தாளிப்பு என தயிர் வடையைப் பார்த்தாலே சாப்பிடத் தோன்றும்.

ஹோட்டலில் கிடைக்கும் அதே சுவையை வீட்டிலேயே தயாரிக்க முடியுமா என்று நினைக்கிறீர்களா? சரியான பக்குவத்தில் வடை செய்து, தயிரைத் தயாரித்து, சுவையான தாளிப்பைக் கொட்டினால் நிச்சயம் அசத்தலாம்.

நடிகை சமந்தாவின் தயிர் வடை நினைவைத் தொடர்ந்து, வீட்டிலேயே இந்தச் சுவையான சிற்றுண்டியை எப்படிச் செய்வது என்று பார்க்கலாம்.

தயிர் வடை செய்யத் தேவையான பொருட்கள்

• முழு வெள்ளை உளுந்து - 1 கப்
• உப்பு - தேவையான அளவு
• எண்ணெய் - பொரிப்பதற்குத் தேவையான அளவு

கெட்டியான, அதிகம் புளிக்காத தயிர் - 2 கப்

தாளித்துக் கொட்டத் தேவையான பொருட்கள்

• எண்ணெய் - 1 டேபிள்ஸ்பூன்
• கடுகு - 1\2 டீஸ்பூன்
• உளுந்து - 1\2 டீஸ்பூன்
• கறிவேப்பிலை - ஒரு கொத்து
• பெருங்காயம் - 1 சிட்டிகை
• முந்திரிப் பருப்பு - 5 முதல் 6 (விருப்பப்பட்டால்)

Image Credit : Gemini Ai

தயிர் வடை செய்முறை - படி 1

உளுந்தை ஊறவைக்கவும்

முதலில் உளுந்தை நன்றாகக் கழுவி, 4 முதல் 5 மணி நேரம் தண்ணீரில் ஊறவைக்க வேண்டும். பின்னர் தண்ணீரை முழுவதுமாக வடித்துவிட்டு, நைஸாக அரைத்துக்கொள்ளவும். மாவு மிகவும் தண்ணீராக இருக்கக்கூடாது. கெட்டியாகவும், காற்றோட்டமாகவும் இருந்தால்தான் வடை மென்மையாக வரும். அரைத்த மாவில் உப்பு சேர்த்துக் கலக்கவும்.

Image Credit : Gemini Ai

படி 2

வடைகளைப் பொரிக்கவும்

ஒரு கடாயில் எண்ணெய் ஊற்றி மிதமான சூட்டில் காயவைக்கவும். கையில் சிறிது தண்ணீர் தொட்டு, மாவை எடுத்து நடுவில் துளையிட்டு வடையாக எண்ணெயில் விடவும். இருபுறமும் பொன்னிறமாகும் வரை மிதமான தீயில் பொரித்து எடுக்கவும். அதிகத் தீயில் பொரித்தால் வெளியே மட்டும் நிறம் மாறி, உள்ளே சரியாக வேகாமல் போகலாம்.

Image Credit : Gemini Ai

படி 3

வடையை மென்மையாக்கவும்

இதுதான் தயிர் வடையின் முக்கியமான ரகசியம். ஒரு பாத்திரத்தில் தயிரை தண்ணீர் சேர்த்து மோர் பதத்திற்கு கரைத்து எடுத்துக்கொள்ளவும். பொரித்த வடைகளை அதில் சுமார் 2 நிமிடங்கள் ஊறவைக்கவும்.

பின்னர் ஒவ்வொரு வடையையும் உடையாமல் மெதுவாக அழுத்தி அதிகப்படியான தண்ணீரை நீக்கவும். இந்த முறையால் வடை மென்மையாகி, தயிரை நன்றாக உறிஞ்சிக்கொள்ளும்.

விருப்பப்பாடால் வாசனைக்காக தேங்காய், பச்சை மிளகாய், சீரகம் ஆகியவற்றைச் சிறிது தண்ணீர் சேர்த்து மையாக அரைத்து மோர் கலவையில் சேர்க்கலாம். கட்டாயம் இல்லை.

Image Credit : Gemini Ai

படி 4

சுவையான தயிர் கலவையைத் தயாரிக்கவும்

மற்றொரு பாத்திரத்தில் கட்டியான தயிரை நன்றாகக் கடைந்து, அதில் உப்பு சேர்த்துக் கலக்கவும். அதிகம் புளித்த தயிரைப் பயன்படுத்த வேண்டாம். அப்படிப் பயன்படுத்தினால் தயிர் வடையின் சுவை மாறிவிடும்.

Image Credit : Gemini Ai

படி 5

தாளித்துக் கொட்டுவது எப்படி?

ஒரு சிறிய தாளிப்புக் கடாயில் எண்ணெயைச் சூடாக்கவும். முதலில் கடுகு சேர்த்துப் பொரியவிடவும். பின்னர் உளுந்து, சீரகம் தேவைப்பட்டால் முந்திரிப் பருப்பு, கறிவேப்பிலை சேர்த்து பொன்னிறமாக வதக்கவும். கடைசியாகப் பெருங்காயம் சேர்த்து அடுப்பை அணைக்கவும்.

இந்தத் தாளிப்பைத் தயிர் கலவையில் சேர்த்துக் கலக்கவும். கடுகின் மணமும், கறிவேப்பிலையின் வாசனையும் தயிர் வடைக்கு கூடுதல் சுவையைக் கொடுக்கும்.

Image Credit : Gemini Ai

படி 6

தயிர் வடையைப் பரிமாறவும்

ஒரு அகலமான பாத்திரத்தில் ஊறவைத்த வடைகளை அடுக்கவும். அதன் மீது தயிர் கலவையைத் தாராளமாக ஊற்றவும். வடைகள் தயிரில் முழுமையாக மூழ்கியிருக்கும்படி பார்த்துக்கொள்ளவும். பரிமாறுவதற்கு முன்பு துருவிய கேரட், கொத்தமல்லி, காராபூந்தி ஆகியவற்றைத் தூவினால் சுவையும் தோற்றமும் அருமையாக இருக்கும்.

Image Credit : Gemini Ai

தயிர் வடை ரெடி

சமந்தாவுக்கு நினைவுகளை மீட்டுத் தந்த தயிர் வடையைப் போல, நீங்களும் வீட்டில் செய்து குடும்பத்தினருடன் பகிர்ந்துகொள்ளலாம். ஒரு சாதாரண மாலை நேரச் சிற்றுண்டியாக மட்டுமல்லாமல், விருந்தினர்களுக்கும் செய்து கொடுக்க ஏற்ற உணவு இது.