எந்திரன் கமல் முதல் கோ சிம்பு வரை... டாப் ஹீரோக்கள் நடிக்க மறுத்து பிளாக்பஸ்டர் ஹிட் ஆன தமிழ் படங்கள் லிஸ்ட்
தமிழ் திரையுலகில் முன்னணி நடிகர்களாக இருக்கும் விஜய், அஜித், சூர்யா, கமல், ரஜினிகாந்த் ஆகியோர் நடிக்க மறுத்து ஹிட் ஆன படங்களை பற்றி பார்க்கலாம்.
Tamil cinema Heroes Rejected Movies
தமிழ் சினிமாவின் முன்னணி நடிகர்களாக வலம் வரும் விஜய், அஜித், விக்ரம், சூர்யா, கமல்ஹாசன், ரஜினிகாந்த் ஆகியோர் பல்வேறு பிளாக்பஸ்டர் ஹிட் படங்களை கொடுத்திருந்தாலும், அவர்கள் தவறவிட்டு பிளாக்பஸ்டர் ஹிட் ஆன படங்களும் சில இருக்கின்றன. அது என்னென்ன படங்கள் என்பதை பார்க்கலாம்.
எந்திரன் கமல் (Enthiran Kamalhaasan)
இயக்குனர் ஷங்கரின் பிரம்மாண்ட படைப்புகளுள் ஒன்றான எந்திரன் திரைப்படத்தில் முதன்முதலில் நடிக்க கமிட் ஆனது கமல்ஹாசன் தான். அவரும் பிரீத்தி ஜிந்தாவும் இப்படத்தில் நடிப்பதாக இருந்தது. அவர்களை வைத்து போட்டோஷூட்டெல்லாம் நடத்தி இருந்தார் ஷங்கர். ஆனால் அப்படம் டேக் ஆஃப் ஆகாததால், பின்னர் ரஜினியை வைத்து இயக்கினார் ஷங்கர். அப்படமும் அதிரி புதிரியான வெற்றியை ருசித்தது.
இந்தியன் ரஜினிகாந்த் (Indian Rajinikanth)
கமல்ஹாசனின் மாஸ்டர் பீஸ் படங்களுள் ஒன்று இந்தியன். ஷங்கர் இயக்கிய இப்படத்தில் முதலில் நடிக்க இருந்தது ரஜினிகாந்த் தானாம். படத்தில் அரசியல் அதிகம் இருப்பதனால் அதில் நடிக்க மறுத்துவிட்டாராம் ரஜினி. பின்னர் அந்த வாய்ப்பு கமலுக்கு சென்றது. அவரும் மாஸான நடிப்பை வெளிப்படுத்தி வெற்றிவாகை சூடினார்.
கோ சிம்பு (Ko Simbu)
கே.வி.ஆனந்த் இயக்கத்தில் வெளியாகி பிரம்மாண்ட வெற்றியை ருசித்த படங்களில் ஒன்று தான் கோ. முதலில் சிம்புவை ஹீரோவாக வைத்து தான் இப்படத்தை எடுத்தார் கே.வி.ஆனந்த். ஆனால் படக்குழுவினருடன் ஏற்பட்ட கருத்து வேறுபாடு காரணமாக அதில் இருந்து விலகினார் சிம்பு. பின்னர் ஜீவாவை ஹீரோவாக நடிக்க வைத்து வெற்றி கண்டார் கே.வி.ஆனந்த்.
சண்டக்கோழி விஜய் (Sandakozhi Vijay)
நடிகர் விஷாலை ஆக்ஷன் ஹீரோவாக உருவெடுக்க வைத்த திரைப்படம் தான் சண்டக்கோழி. லிங்குசாமி இயக்கிய இப்படத்தில் முதலில் ஹீரோவாக நடிக்க இருந்தது விஜய் தானாம். படத்தின் கதையை லிங்குசாமி விஜய்யிடம் சொன்னப்போது, இண்டர்வெல் காட்சிக்கு பின் தனக்கு ஸ்கோப் இல்லாதது போல் உணர்ந்ததால் அதில் நடிக்க மறுத்துவிட்டார் விஜய். பின்னர் விஷால் நடித்து அப்படம் அல்டிமேட் ஹிட் ஆனது.
இதையும் படியுங்கள்... உறியடி விஜய்குமார் நடிக்கும் 'எலக்சன்' படத்தின் ஃபர்ஸ்ட் லுக்கை வெளியிட்ட விஜய் சேதுபதி!
நான் கடவுள் அஜித்குமார் (Naan Kadavul Ajith)
பாலா இயக்கத்தில் வெளியாகி தேசிய விருது வென்ற திரைப்படம் தான் நான் கடவுள். இப்படத்தில் நடிகர் அஜித் தான் முதலில் ஹீரோவாக நடிக்க இருந்தார். அதற்காக தாடியெல்லாம் வளர்த்து வந்த அஜித், இயக்குனர் பாலாவுடன் ஏற்பட்ட சண்டையால் அப்படத்தில் இருந்து விலகிவிட்டார். இதையடுத்து அந்த வாய்ப்பை அலேக்காக தூக்கிய ஆர்யா வெற்றியையும் ருசித்தார்.
கஜினி அஜித்குமார் (Ghajini Ajith)
ஏ.ஆர்.முருகதாஸ் இயக்கத்தில் வெளியாகி பிளாக்பஸ்டர் ஹிட் ஆன திரைப்படம் தான் கஜினி. இப்படத்தின் கதையை முதன்முதலில் அஜித்துக்கு தான் சொன்னாராம் முருகதாஸ். மிரட்டல் என்கிற பெயரில் உருவாக இருந்த இப்படம் ஒரு கட்டத்தில் கைவிடப்பட்டதால், பின்னர் சூர்யாவை வைத்து இயக்கி வெற்றி கண்டார் முருகதாஸ்.
பாம்பே விக்ரம் (Bombay Vikram)
மணிரத்னம் இயக்கிய மாஸ்டர் பீஸ் படங்களில் ஒன்று தான் பாம்பே. அரவிந்த் சாமி ஹீரோவாக நடித்திருந்த இப்படத்தில் முதன்முதலில் ஹீரோவாக நடிக்க இருந்தது சீயான் விக்ரம் தானாம். அவர் அந்த சமயத்தில் வேறு ஒரு படத்துக்காக தாடி வளர்த்து வந்துள்ளார். அப்போது பாம்பே படத்துக்காக தாடியை எடுக்க மறுத்ததால் அவருக்கு அந்த வாய்ப்பு கிடைக்காமல் போனது. பின்னர் அரவிந்த் சாமி நடித்து அப்படம் அமோக வரவேற்பை பெற்றது.
இதையும் படியுங்கள்... அவரும்.. நானும்.. 29 ஆண்டுகளுக்கு முன் லவ் ப்ரொபோஸ் பண்ண சுந்தர் சி - குஷ்பூ பகிர்ந்த கியூட் பிக்ஸ் வைரல்!