HBD Rajinikanth : கோலிவுட்டின் ‘பவர்ஹவுஸ்’... இந்திய சினிமாவின் ராஜாதி ராஜா ரஜினிகாந்த் பிறந்தநாள் இன்று..!

சூப்பர்ஸ்டார் ரஜினிகாந்த் இன்று தனது 75வது பிறந்தநாளை கொண்டாடி வருகிறார். அவருக்கு சமூக வலைதளங்களில் வாழ்த்துக்கள் குவிந்து வரும் நிலையில், அவரைப் பற்றிய சிறப்பு தொகுப்பை பார்க்கலாம்.

Image Credit : X

Rajinikanth Birthday

தமிழ் சினிமாவை ரஜினிக்கு முன் ரஜினிக்கு பின் என எளிதாக பிரிக்கலாம். ஏனென்றால் ரஜினிக்கு முன்பு வரை ஒரு நாயகன் என்றால் வெள்ளைத்தோலுடன் வாட்டசாட்டமாக, அழகான வசீகர முகத்துடன் இருக்க வேண்டும் என்ற பிம்பம் இருந்தது. அந்த பிம்பத்தை எல்லாம் தவிடுபொடி ஆக்கி தன் யதார்த்த நடிப்பாலும் ஸ்டைலாலும், ஒட்டுமொத்த தமிழகத்தையும், யாருடா இந்த பையன் என திரும்பிப் பார்க்க வைத்ததும் ஒரு அதிசயம் தான். ரஜினியின் காலகட்டத்திற்கு பின் தமிழ் சினிமாவில் அறிமுகமான அத்தனை நடிகர்களிலும் ரஜினியின் சாயல் நிச்சயம் இருக்கும்.

Image Credit : instagram

ரஜினிகாந்த் திரைப்பயணம்

விஜய், அஜித்தில் தொடங்கி தற்போது உள்ள ஹரிஷ், பிரதீப் வரை தாக்கத்தை ஏற்படுத்திக் கொண்டிருக்கும் ஒரு அதிசய பிறவி தான் ரஜினி. பாலிவுட் சினிமாவை நாம் வியந்து பார்த்தது ஒரு காலகட்டமாக இருந்தாலும், இன்று உச்சத்தில் இருக்கும் பாலிவுட் நடிகர்களையே தன்னை தலைவா என்று அழைக்க வைத்து தமிழ் சினிமாவுக்கு பெருமை சேர்த்தவர் ரஜினிகாந்த். தமிழ் சினிமாவில் முதல் 50 கோடி, 100 கோடி, 200 கோடி, 500 கோடி என மைல்கல்களை தன்னுடைய படங்கள் மூலம் இன்று இருக்கும் நடிகர்களுக்கு பென்ச் மார்க் ஆக செட் செய்து வைத்தவர் ரஜினிகாந்த். இந்த ரெக்கார்டுகளை முறியடிக்க தமிழ் சினிமா நடிகர்கள் போராடிக் கொண்டிருப்பது தனி கதை.

Image Credit : instagram

வெற்றி நாயகன் ரஜினி

ரஜினியின் திரைப்படம் வெளியாகிறது என்றாலே தியேட்டர்களில் கட்டவுட், பாலபிஷேகம், பேண்ட் வாத்தியங்கள், பட்டாசுகள் என ஒரு திருவிழாவாக மாறும். அதே போன்று ரஜினிகாந்தின் வெற்றியை அவரது ரசிகர்கள் கொண்டாடியதை விட ரஜினியின் தோல்விகளை அவரது எதிரிகள் மிகப்பெரிய அளவில் கொண்டாடினார்கள். ரஜினி எப்போது வீழ்வார் என பல நடிகர்கள் காத்துக் கொண்டிருந்தனர். ஆனால் இன்றுவரை அந்த கனவு மெய்ப்படவில்லை என்பதே உண்மை. ரஜினிகாந்த் ஒவ்வொரு முறை தடுமாறும் போதும் ரசிகர்களின் பேரன்பினாலும் உற்சாகத்தாலும் தனது அடுத்த படத்தின் இமாலய வெற்றி மூலம் எதிரிகளுக்கு பதில் சொல்லும் பாணியை தற்போது வரை பின்பற்றி வருகிறார்.

Image Credit : instagram

ஸ்டைல் மன்னன் ரஜினி

ரஜினிகாந்த் தனது நடை, உடை, ஹேர் ஸ்டைல் அனைத்திலுமே புது ஸ்டைலை புகுத்தி, திரையில் ரசிகர்களை ஆர்ப்பரிக்க செய்ததெல்லாம் வேறலெவல். அவர் திரையில் முடியை சிலுப்பி விட்டால் ரசிகர்களின் கால்கள் தரையில் இருக்காது. அவர் உடுத்தும் ஒவ்வொரு உடையும், கையில் போடும் காப்பும், கழுத்தில் அணியும் ருத்ராட்சமும் பல ரசிகர்களின் அடையாளமாக மாறியது. அவருடைய ஒவ்வொரு வார்த்தையும் தமிழகத்தின் ஹாட் டாபிக் ஆக மாறியது. அவருடைய ஒவ்வொரு மேனரிசத்தையும் மக்கள் கொண்டாடி தீர்த்தனர். தமிழ் சினிமா மட்டுமின்றி, இந்திய சினிமாவிற்கே சூப்பர் ஸ்டார் எனும் ரசிகர்களின் குரல் இன்று வரை ஒழித்துக் கொண்டிருக்கிறது.

Image Credit : Twitter

ரஜினிகாந்த் பிறந்தநாள்

எந்த நடிகரிடமும் காணாத ஏதோ ஒன்றை ரசிகர்கள் ரஜினியிடம் கண்டனர். அவரை சூப்பர் ஸ்டார் ஆக்கிக் கொண்டாடினர். இதயத்தில் இடம் கொடுத்து இன்பம் உற்றனர். அவரை சிம்மாசனத்தில் உட்கார வைத்து உற்சாகப்படுத்தினர். வில்லன், ஹீரோ, ஸ்டார், ஸ்டைல் மன்னன், அப்புறம் சூப்பர் ஸ்டார் என தனது நடிப்பு திறமையால் திரையுலகை ஆட்கொண்ட அசாத்திய மனிதர் இவர். வயசானாலும் உன் அழகும் ஸ்டைலும் இன்னும் ஒன்னவிட்டு போகல என்று படையப்பா படத்தில் ஒரு வசனம் வரும், அதற்கு ஏற்ப அவரின் வயது ஏற ஏற அவரின் இளமையும், எனர்ஜியும், வசீகரமும் அதிகரித்து கொண்டேதான் செல்கிறது. திரைத்துறையில் தன் பொன்விழா ஆண்டில் அடி எடுத்து வைக்கும் சூப்பர் ஸ்டாருக்கு இனிய பிறந்தநாள் நல்வாழ்த்துக்கள்.