படம் பார்க்கும் முன்பே கதையை சொல்லிய தமிழ் பட போஸ்டர்கள்... இதையெல்லாம் கவனிக்காமல் விட்டுட்டோமே!

திரைப்பட போஸ்டர்களில் மறைந்துள்ள திரைக்கதை ரகசியங்கள்; தெறி, மாநாடு, ராட்சசன் உள்ளிட்ட 8 தமிழ் பட போஸ்டர்களின் ஆச்சரியமூட்டும் குறியீடுகள் பற்றி விரிவாகப் பார்ப்போம்.

Image Credit : Chatgpt

ட்ரெய்லரில் கூட சொல்லாத மெயின் ட்விஸ்ட்டை போஸ்டரிலேயே உடைத்த 8 படங்கள்!

நம்மில் பெரும்பாலானோருக்கு ரூமிலோ அல்லது சமூக வலைதள முகப்பிலோ பிடித்த திரைப்பட போஸ்டர்களை ஒட்டி வைப்பது அலாதி பிரியம். ஆனால், சினிமா போஸ்டர் என்பது வெறும் கதாநாயகனின் 'மாஸ்' லுக்கை காட்டி விசிலடிக்க வைப்பதற்கான விளம்பரம் மட்டும் தானா? நிச்சயமாக இல்ல. படத்தின் டீசர், ட்ரெய்லரில் கதை சொல்வது போல, போஸ்டருக்குள்ளேயே படத்தின் முக்கிய திருப்பங்களையும், மொத்த திரைக்கதையையும் ஒரு குறியீட்டு மொழியாக (Visual Storytelling) புதைத்து வைக்கும் வித்தையைத் தமிழ் சினிமாவின் முன்னணி பப்ளிசிட்டி டிசைனர்கள் அற்புதமாகச் செய்து காட்டியிருக்கிறார்கள். படத்தைப் பார்த்துவிட்டு வந்து உற்றுப்பார்த்தால் மட்டுமே புரியும் அந்த 'சீக்ரெட் போஸ்டர் டீட்டெய்லிங்' ரகசியங்கள் பற்றி பார்ப்போம்.

போஸ்டர் டிசைனின் பொதுவான சூட்சுமங்கள்!

ஒரு கதாநாயகன் அல்லது கதாபாத்திரம் போஸ்டரில் பின்னோக்கித் திரும்பி நின்றால், அவருக்குப் பின்னால் ஒரு அழுத்தமான ஃபிளாஷ்பேக் அல்லது கசப்பான கடந்த கால நினைவுகள் உண்டு என்று அர்த்தம். ஒரு கதாபாத்திரத்திற்குப் பின்னால் மற்றவர்களை வைப்பது அவர்களின் முக்கியத்துவ வரிசையையும், மற்றவர்களை விட ஒருவரைத் தள்ளி வைப்பது அவரது தனிமையையும் உணர்த்தும். மற்றவர்களை விட ஒருவரின் உருவத்தைப் பெரிதாகக் காட்டுவது, கதையில் அவரின் பலத்தையும் அதிகாரத்தையும் சுட்டிக்காட்டும்.

Image Credit : Asianet News

போஸ்டருக்குள் மொத்தக் கதையையும் மறைத்த 8 தமிழ் படங்கள்!

1. தெறி: வாயை மூடிய ரகசியம்!

அட்லீ இயக்கத்தில் விஜய் நடித்த 'தெறி' ஃபர்ஸ்ட் லுக் போஸ்டரில், விஜய் திரும்பி நிற்பார். அவருக்குப் பின்னால் போலீஸ் உடையில் இருக்கும் விஜய், ஜோசப் குருவில்லா கெட்டப்பில் இருக்கும் விஜய்யின் வாயைப் பொத்தியிருப்பார். தனக்கு 'விஜய்குமார் ஐ.பி.எஸ்' என்ற போலீஸ் கடந்த காலம் (ஃபிளாஷ்பேக்) உண்டு; அதை யாருக்கும் சொல்லாமல் வாயை மூடி மறைத்துதான் 'ஜோசப் குருவில்லா'வாக வாழ்கிறார் என்பதை அந்த ஒற்றைப் போஸ்டரே அப்பட்டமாக உடைத்துக் காட்டியது.

2. மாநாடு: ட்ரெய்லரிலும் வராத இடைவேளை ட்விஸ்ட்!

வெங்கட் பிரபு இயக்கத்தில் சிம்பு, எஸ்.ஜே. சூர்யா நடித்த இப்படத்தின் போஸ்டரை டிசைனர் டூனே ஜான் செதுக்கியிருந்தார். அதில் சிம்புவும் எஸ்.ஜே. சூர்யாவும் தலைகீழாக இருக்க, இருவருக்கும் நடுவே 'இன்ஃபினிட்டி' (infty) வடிவ சன்கிளாஸ் வைக்கப்பட்டிருக்கும். சிம்புவின் கண்ணாடியில் எஸ்.ஜே. சூர்யாவும், சூர்யாவின் கண்ணாடியில் சிம்புவும் தெரிவார்கள். படத்தின் முக்கிய இடைவேளை ட்விஸ்ட்டான சிம்புவுக்கு மட்டுமல்ல... எஸ்.ஜே. சூர்யாவுக்கும் டைம் லூப் ஆகிறது என்ற அதிர்ச்சித் திருப்பத்தை ரிலீஸுக்கு முன்பே இந்த போஸ்டரில் சூசகமாக வெளிப்படுத்தியிருந்தார்கள்.

Image Credit : Asianet News

3. ராட்சசன்: படிக்கட்டுகளாக மாறிய பியானோ!

தண்டோரா டிசைன்ஸ் வடிவமைத்த 'ராட்சசன்' போஸ்டர்களில் சைக்கோ கில்லரைத் தேடும் பாதை ஒளிந்திருந்தது. கொலையாளியைக் கண்டுபிடிக்க உதவும் தடயமான பியானோ கட்டைகளை (Keyboard keys) படிக்கட்டுகளாக அமைத்து, அதன் கீழே நின்றுகொண்டு மேலே இருக்கும் மர்ம கொலையாளியை போலீஸ் உடையில் விஷ்ணு விஷால் அண்ணாந்து பார்ப்பது போல் ஒரு போஸ்டர் அமைக்கப்பட்டிருக்கும். மற்றொரு போஸ்டரில், ஒரு கையில் சினிமா கிளாப் போர்டும் (இயக்குநராகத் துடிக்கும் ஃபிளாஷ்பேக்), மறுகையில் துப்பாக்கியும் (நிகழ்கால போலீஸ்) வைத்திருப்பார்.

4. குரங்கு பொம்மை: முழு திரைக்கதையையும் தாங்கிய புதிர்!

கெட் இன் ட்ரீம் ஸ்டுடியோஸ் வடிவமைத்த இப்படத்தின் போஸ்டர் வேற லெவல் ரகம்! ஒரு குரங்கின் முக வடிவ புதிருக்குள் (Puzzle) நடுவில் ஒரு பை இருக்கும். அதை நோக்கி 5 பேர் பயணிப்பார்கள். அந்தப் புதிரை நீங்கள் தீர்த்துப் பார்த்தால், அந்தப் பை ஹீரோ விதார்த்துக்கு மட்டுமே போய்ச் சேரும். பாரதிராஜா மற்றும் சிலை கடத்தல் கும்பலின் பாதைகள் இணையும், ஆனால் பை கிடைக்காது. திருடனின் பாதை எந்தப் பாதையுடனும் இணையாமல் கடைசிவரை அவனுக்குப் பை கிடைக்காமல் போகும். படத்தில் நடந்த மொத்த சம்பவங்களையும் இந்த ஒரே புதிரில் அடக்கியிருந்தார்கள்.

Image Credit : Asianet News

5. துருவங்கள் 16: குற்ற உணர்ச்சியில் கூனிக்குறுகிய போலீஸ்!

இயக்குநர் கார்த்திக் நரேன் இப்படத்தின் போஸ்டர்கள் மற்றும் ட்ரெய்லரில் ரஹ்மானின் இரு வேறு தோற்றங்களை அமைத்திருப்பார். ஒரு நேர்மையான போலீஸ் அதிகாரி, தன் மகனைக் காப்பாற்றுவதற்காக ஒரு கொலையை 'துப்பறிய முடியாத வழக்கு' என்று சுயநலமாக மூடிமறைக்கிறார். அந்தப் பாவமும், குற்ற உணர்ச்சியும்தான் கதையின் ஆணிவேர் என்பதை ரஹ்மானின் நிழல் உருவங்களும், இருவேறு தோற்றங்களும் முன்கூட்டியே பார்வையாளர்களுக்குப் படம் பிடித்துக் காட்டியிருந்தன.

6. இமைக்கா நொடிகள்: முகமூடிக்கு பின்னால் இருக்கும் உண்மை!

நயன்தாரா, அதர்வா, அனுராக் காஷ்யப் மூவரும் ஒருவருக்கொருவர் மாஸ்க்கை மாற்றிப் பிடித்திருக்கும் ஒரு போஸ்டர் வெளியாகிப் பரபரப்பை ஏற்படுத்தியது. அதர்வா கொலையாளி ருத்ராவின் மாஸ்க்கை வைத்திருப்பார் (அவன் மீது பழி சுமத்தப்படுகிறது); நயன்தாரா தம்பி அதர்வாவின் மாஸ்க்கை வைத்திருப்பார் (தம்பியைக் காப்பாற்றப் போராடும் அக்கா); அனுராக் காஷ்யப் நயன்தாராவின் மாஸ்க்கை வைத்திருப்பார் (நயன்தாராவைப் பழிவாங்குவதே கொலையாளியின் வெறி). ஒவ்வொரு கதாபாத்திரமும் எதை நோக்கிப் பயணிக்கிறது என்பதை முகமூடி வழியே சொல்லியிருப்பார்கள்.

Image Credit : Asianet News

7. ஜகமே தந்திரம்: மதுரை பரோட்டாவும் லண்டன் கேங்ஸ்டரும்!

டாவின்சியின் 'தி லாஸ்ட் சப்பர்' புகழ்பெற்ற ஓவியத்தை ரீ-கிரியேட் செய்திருப்பார் டிசைனர் டூனே ஜான். ஒருபுறம் மேற்கத்திய உணவுடன் லண்டன் தாதாக்கள்; மறுபுறம் மதுரை பரோட்டாவுடன் சிவதாஸ் கேங். நடுவில் இரண்டு உலகங்களுக்கும் பாலமாக, மேலே கோட்-சூட்டும் கீழே வெள்ளை வேட்டியும் கட்டிக்கொண்டு புரோக்கராக அமர்ந்திருப்பார் தனுஷ் (சுருளி). மேலும், மற்றொரு போஸ்டரில் உள்ள இமிக்ரேஷன் சீல் வடிவ தனுஷின் முகம் அகதிகளின் உரிமைப் போராட்டத்தை வெளிப்படுத்தும்.

8. கர்ணன் & கபாலி: குறியீடுகளின் சங்கமம்!

கபிலன் செல்லையா வடிவமைத்த போஸ்டர்களில் வாள், குதிரை, தனுஷ் மற்றும் நாட்டுப்புற சிறுதெய்வம் மட்டுமே இடம்பெற்றிருக்கும். உரிமைக்கான ஆயுதமாக வாளும், கர்ணன் குழம்பும் போதெல்லாம் வழிகாட்டும் சிறுதெய்வமாக அவனது மறைந்த தங்கையும் போஸ்டர்களிலேயே குறியீடுகளாகப் பேசப்பட்டனர். வின்சி ராஜ் வடிவமைப்பில் உருவான கபாலி போஸ்டர்களில் ரஜினியின் மாஸைத் தாண்டி, அனுமன் தன் நெஞ்சைப் பிளந்து ராமரைக் காட்டுவது போல் தன் மனைவியைத் தேடும் கேங்ஸ்டரின் பிஞ்சு மனம் மற்றும் மலேசியத் தமிழர்களின் உரிமைப் போராட்டம் போன்ற பல அடுக்குகள் ஒளிந்திருந்தன. இனிமேல் ஒரு புதிய திரைப்படத்தின் போஸ்டர் வெளியானால், சும்மா மேலோட்டமாகப் பார்த்துவிட்டு கடந்துவிடாதீர்கள்; கொஞ்சம் ஜூம் செய்து பாருங்கள்... படக்குழு மறைத்து வைத்திருக்கும் முழு திரைக்கதையும் உங்களுக்குள்ளேயே ரகசியமாகப் பேசக்கூடும்!