சிவகார்த்திகேயனின் அடுத்த படம் ஹாலிவுட் ரேஞ்சில் இருக்கும்! அடிச்சு சொல்லும் பிரபலம்- அப்படி அதுல என்ன ஸ்பெஷல்

டான், அயலான், சிங்கப்பாதை போன்ற படங்களை கைவசம் வைத்துள்ள சிவகார்த்திகேயன், இதுதவிர ரங்கூன் பட இயக்குனர் ராஜ்குமாருடன் ஒரு படம், தெலுங்கில் ஒரு படம் என அடுத்தடுத்து பிசியாக நடித்து வருகிறார்.

சின்னத்திரையில் மிமிக்ரி ஆர்டிஸ்டாக தொடங்கி, பின்னர் தொகுப்பாளராக உயர்ந்து, தற்போது வெள்ளித்திரையில் முன்னணி ஹீரோவாக கலக்கி வருபவர் சிவகார்த்திகேயன். அண்மையில் இவர் நடிப்பில் வெளியான டாக்டர் படம் பிளாக்பஸ்டர் ஹிட் ஆனது. இவர் நடிப்பதோடு மட்டுமின்றி எஸ்.கே.புரடக்‌ஷன்ஸ் என்கிற நிறுவனத்தின் மூலம் படங்களை தயாரித்தும் வருகிறார். இதுதவிர பாடகர், பாடலாசிரியர் என பன்முகத்திறமை கொண்டவராக விளங்கி வருகிறார். 

தற்போது இவர் கைவசம் டான், அயலான், சிங்கப்பாதை போன்ற படங்கள் உள்ளன. இதுதவிர ரங்கூன் பட இயக்குனர் ராஜ்குமாருடன் ஒரு படம், பிச்சைக்காரன் பட இயக்குனர் சசியுடன் ஒரு படம் என அடுத்தடுத்து பிசியாக நடித்து வருகிறார் சிவகார்த்திகேயன். மேலும் இந்த ஆண்டு டோலிவுட்டிலும் அறிமுகமாக உள்ளார் சிவா.

இதில் டான் மற்றும் அயலான் படங்களின் படப்பிடிப்பு முடிந்து பின்னணி பணிகள் விறுவிறுப்பாக நடைபெற்று வருகின்றன. குறிப்பாக அயலான் படம் மிகப்பிரம்மாண்டமாக தயாராகி வருகிறது. இப்படத்தை இன்று நேற்று நாளை படத்தின் இயக்குனர் ரவிக்குமார் இயக்கி உள்ளார். இப்படத்தில் சிவகார்த்திகேயனுக்கு ஜோடியாக நடிகை ரகுல் பிரீத் சிங் நடித்துள்ளார்.

நீரவ் ஷா ஒளிப்பதிவு செய்துள்ள இப்படத்திற்கு ஏ.ஆர்.ரகுமான் இசையமைக்கிறார். எடிட்டர் ரூபன் படத்தொகுப்பு பணிகளை கவனிக்கிறார். இவ்வாறு பலமான டெக்னிக்கல் டீமுடன் தயாராகி வரும் இப்படத்தில் கிராபிக்ஸ் காட்சிகள் ஹாலிவுட் தரத்தில் இருக்கும் என எடிட்டர் ரூபன் தெரிவித்துள்ளார். இப்படம் சிவகார்த்திகேயனின் கெரியரில் முக்கியமான படமாக இருக்கும் என கூறியுள்ள அவர், சினிமாவில் அவரை அடுத்தகட்டத்திற்கு கொண்டு செல்லும் படமாகவும் அயலான் அமையும் என தெரிவித்துள்ளார்.

இப்படத்தில் சிவகார்த்திகேயனுடன் ஏலியன் கேரக்டர் ஒன்று படம் முழுக்க பயணிக்குமாம். அந்த கேரக்டரை நவீன தொழில்நுட்பம் மூலம் வடிவமைத்துள்ளார்களாம். இது படத்திற்கு பிளஸ் ஆக அமையும் என்றும் ரூபன் தெரிவித்துள்ளார். எடிட்டர் ரூபனின் இந்த அப்டேட், படத்தின் மீதான எதிர்பார்ப்பை மேலும் அதிகரிக்கச் செய்துள்ளது என்றே சொல்லலாம். அயலான் படம் இந்தாண்டு இறுதிக்குள் திரைகாண வாய்ப்புள்ளதாக தகவல் வெளியாகி உள்ளது.