Valimai OTT : ரூ.300 கோடியுடன் டீல் பேசவந்த OTT! ‘நோ மீன்ஸ் நோ’ என கெத்தாக சொல்லி திருப்பி அனுப்பிய வலிமை டீம்

கொரோனா வேகமாக பரவி வரும் இந்த சமயத்தில் படத்தை வெளியிட்டால் வசூல் பாதிக்கும் என்பதாலும், மேலும் தொற்று பரவும் அபாயம் இருப்பதாலும் படத்தின் ரிலீஸ் தள்ளிவைக்கப்படுவதாக வலிமை படக்குழு நேற்று அறிவித்தது.

நேர்கொண்ட பார்வை படத்தின் வெற்றியை தொடர்ந்து எச்.வினோத் இயக்கத்தில் அஜித் நடிக்கும் 2-வது படம் வலிமை. இப்படத்தை மறைந்த நடிகை ஸ்ரீதேவியின் கணவர் போனி கபூர் தயாரித்துள்ளார். குடும்ப செண்டிமெண்ட் நிறைந்த அதிரடி ஆக்‌ஷன் திரைப்படமாக வலிமை தயாராகி உள்ளது.

இதில் அஜித் போலீஸ் அதிகாரி கதாபாத்திரத்தில் நடித்துள்ளார். இப்படத்தில் ஹீரோயினாக காலா பட நடிகை ஹூமா குரேஷி நடித்துள்ளார். மேலும் யோகிபாபு, குக் வித் கோமாளி புகழ் ஆகியோர் நகைச்சுவை கதாபாத்திரத்தில் நடித்துள்ளனர். இப்படத்தில் வில்லன் கேரக்டரில் பிரபல தெலுங்கு நடிகர் கார்த்திகேயா நடித்துள்ளார். 

யுவன் மற்றும் ஜிப்ரான் இசையமைத்துள்ள இப்படத்திற்கு நீரவ் ஷா ஒளிப்பதிவு செய்துள்ளார். இப்படத்தின் பணிகள் முடிந்து ரிலீசுக்கு தயாராக உள்ளது. அதன்படி வருகிற ஜனவரி 13-ந் தேதி பொங்கல் பண்டிகையை முன்னிட்டு தமிழ், தெலுங்கு, இந்தி ஆகிய 3 மொழிகளில் இப்படத்தை ரிலீஸ் செய்ய திட்டமிட்டிருந்தனர்.

ஆனால் தற்போது அதிகரித்து வரும் கொரோனா பாதிப்பு காரணமாக இந்தியா முழுவதும் பல்வேறு மாநிலங்களில் அடுத்தடுத்து பல்வேறு கட்டுப்பாடுகள் விதிக்கப்பட்டு வருகின்றன. தமிழகத்திலும் இரவு நேர ஊரடங்கு மற்றும் ஞாயிற்றுக்கிழமை முழு ஊரடங்கு அமல்படுத்தப்பட்டு உள்ளது.

இந்த சமயத்தில் படத்தை வெளியிட்டால் வசூல் பாதிக்கும் என்பதாலும், மேலும் தொற்று பரவும் அபாயம் இருப்பதாலும் படத்தின் ரிலீஸ் தள்ளிவைக்கப்படுவதாக வலிமை படக்குழு அதிகாரப்பூர்வமாக அறிவித்தது. நிலைமை சீரானது திரையரங்குகளில் வெளியிடுவோம் எனவும் உறுதி அளித்திருந்தனர்.

இந்நிலையில், வலிமை படத்தை நேரடியாக ஓடிடி-யில் வெளியிட முன்னணி நிறுவனம் ஒன்று ரூ.300 கோடிக்கு டீல் பேச சென்றதாம். ஆனால் வலிமை படக்குழுவோ, இது தியேட்டருக்காக எடுக்கப்பட்ட திரைப்படம், அதனை ஓடிடி-யில் வெளியிட விரும்பவில்லை எனக்கூறி திருப்பி அனுப்பிவிட்டார்களாம்.