PPF Investors: பிபிஎஃப் முதலீட்டாளர்களுக்கு எச்சரிக்கை.. இந்த விதிகளை மீறினால் நஷ்டம் உறுதி!

PPF Investors: பிபிஎஃப் பாதுகாப்பான முதலீட்டு திட்டமாக இருந்தாலும், முதலீட்டு நேரம், நாமினி விவரங்கள் மற்றும் ஆண்டு வரம்புகளை சரியாகப் பின்பற்றாவிட்டால், வட்டி இழப்பு மற்றும் தேவையற்ற சிக்கல்கள் ஏற்படலாம்.

Image Credit : iSTOCK

பிபிஎஃப் முதலீட்டாளர்கள் கவனத்திற்கு

நீண்ட கால சேமிப்பு மற்றும் வரிச் சலுகையை ஒரே நேரத்தில் வழங்கும் முதலீட்டு திட்டங்களில் பப்ளிக் பிராவிடண்ட் ஃபண்ட் (பிபிஎஃப்) முக்கிய இடத்தை பிடித்துள்ளது. மத்திய அரசின் ஆதரவுடன் செயல்படும் இந்தத் திட்டம், பாதுகாப்பான முதலீட்டை விரும்புபவர்களுக்கு ஏற்றதாகக் கருதப்படுகிறது. தற்போது ஆண்டுக்கு 7.1 சதவீத வட்டி வழங்கப்படும் இந்தத் திட்டம், கூட்டு வட்டியின் பலத்தால் நீண்ட காலத்தில் கணிசமான சொத்து உருவாக்க உதவுகிறது.

Image Credit : Getty

வரி விலக்கு கிடைக்கும்

பிபிஎஃப்-ல் ஆண்டுக்கு குறைந்தபட்சம் ரூ.500 முதல் அதிகபட்சம் ரூ.1.5 லட்சம் வரை முதலீடு செய்யலாம். இந்த முதலீட்டிற்கு வருமான வரிச் சட்டம் 80C-ன் கீழ் வரிச் சலுகையும் கிடைக்கும். இருப்பினும், நிர்ணயிக்கப்பட்ட வரம்பை மீறி முதலீடு செய்வது தேவையற்ற சிக்கல்களை உருவாக்கலாம். மேலும், குறைந்தபட்ச தொகையை செலுத்தத் தவறினால் கணக்கு செயலிழக்கவும் வாய்ப்பு உள்ளது.

Image Credit : social media

முதலீடு செய்யும் நேரமும் லாபத்தை தீர்மானிக்கும்

பிபிஎஃப் கணக்கில் வட்டி, ஒவ்வொரு மாதமும் 5-ஆம் தேதிக்கும் மாத இறுதிக்கும் இடையில் இருப்பின் அடிப்படையில் கணக்கிடப்படுகிறது. இதனால், மாதத்தின் 5-ஆம் தேதிக்கு முன்பாக பணம் செலுத்துபவர்கள் கூடுதல் வட்டி பலனைப் பெற முடியும். சிறிய திட்டமிடல் கூட நீண்ட காலத்தில் பெரிய வித்தியாசத்தை உருவாக்கும்.

Image Credit : adobe stock

அவசரத் தேவைக்கு பணம் எடுக்கலாமா?

இந்தத் திட்டம் 15 ஆண்டு லாக்-இன் காலத்தைக் கொண்டது. ஏழாவது ஆண்டிலிருந்து பகுதியளவு பணத்தை திரும்பப் பெறும் வசதி இருந்தாலும், அடிக்கடி பணம் எடுப்பது முதலீட்டு வளர்ச்சியை பாதிக்கலாம். குறுகிய கால இலக்குகளுக்காக பிபிஎஃப்-ஐ பயன்படுத்துவது பொருத்தமானதாக இருக்காது.

Image Credit : iSTOCK

நாமினி விவரங்களை மறந்துவிடாதீர்கள்

பிபிஎஃப் கணக்கில் நாமினி விவரங்கள் சரியாகப் பதிவு செய்வது அவசியம். புதிய விதிகளின்படி, நான்கு நாமினிகள் வரை சேர்க்க முடியும். ஆதார், பான் உள்ளிட்ட விவரங்களையும் புதுப்பித்து வைத்திருப்பது எதிர்கால சட்ட மற்றும் நிதி சிக்கல்களைத் தவிர்க்க உதவும். பாதுகாப்பான முதலீடு என்றாலும், சரியான திட்டமிடலே பிபிஎஃப்-ல் அதிகபட்ச பலனை உறுதி செய்யும்.