- Home
- Business
- Gold: தங்கத்தை அடகு வைக்க போறீங்களா? ஏலத்துக்கு போவதை தவிர்க்க 'இந்த' 5 விஷயங்களை செய்யுங்க!
Gold: தங்கத்தை அடகு வைக்க போறீங்களா? ஏலத்துக்கு போவதை தவிர்க்க 'இந்த' 5 விஷயங்களை செய்யுங்க!
Gold: அவசரத் தேவைக்கு தங்கத்தை அடகு வைக்க போறீங்களா? உங்கள் நகை ஏலம் போவதை தவிர்க்க இந்த 5 வழிமுறைகளை பின்பற்றுங்கள். அவை என்னென்ன? என்று இந்த செய்தியில் பார்க்கலாம்.
தங்கத்தை அடகு வைக்க போறீங்களா?
அவசரச் செலவுகளுக்குத் தங்கத்தை விற்றுவிடாமல், கடனாகப் பெறுவது புத்திசாலித்தனமான முடிவே. ஆனால், அவசரத்தில் செய்யும் சில சிறிய தவறுகள் உங்கள் ஒட்டுமொத்தப் பொக்கிஷத்தையும் ஏலத்திற்குள் கொண்டு போய்விடும் அபாயம் உள்ளது. நகைக்கடன் வாங்குவதற்கு முன் கவனிக்க வேண்டிய மிக முக்கிய 5 விஷயங்கள் என்னென்ன என்பதை விரிவாக பார்ப்போம்.
1. தேவைக்கு அதிகமாக கடன் வாங்குவது
தங்கத்தின் விலை உயர்ந்துள்ளதால், குறைந்த எடையுள்ள நகைகளுக்கும் தற்போது வங்கிகள் அதிகத் தொகை தர முன்வரும். அதிக கடன் கிடைக்கிறது என்பதற்காக தேவைக்கு அதிகமாகக் கடன் வாங்குவது ஆபத்தானது. எதிர்காலத்தில் தங்கம் விலை குறைந்தால், அது உங்களுக்குப் பெரும் சுமையாக மாறும். எனவே, உங்களின் உண்மையான தேவைக்கு ஏற்ப மட்டும் கடன் பெறுங்கள்.
2. மறைமுக கட்டணங்களை ஓரம் கட்டுவது
பெரும்பாலானோர் வட்டி விகிதத்தை மட்டுமே பார்த்துவிட்டு கடனைப் பெற்றுவிடுகிறார்கள். ஆனால் அதனுடன் வரும் பரிசீலனைக் கட்டணம் (Processing Fee), மதிப்பீட்டுக் கட்டணம் (Appraisal Charges), முன்கூட்டியே கடனை முடிப்பதற்கான கட்டணம் (Foreclosure Charges) போன்றவற்றை முன்கூட்டியே கணக்கிடுவது அவசியம். மேலும், உள்ளூர் அடகுக் கடைகளைத் தவிர்த்து, ஆர்பிஐ அங்கீகாரம் பெற்ற வங்கிகள் அல்லது முன்னணி என்.பி.எப்.சி நிறுவனங்களைத் தேர்ந்தெடுப்பதே பாதுகாப்பானது.
3. கற்கள் மற்றும் தூய்மை பற்றித் தெரியாமல் இருப்பது
அனைத்து நகைகளுக்கும் கடன் கிடைக்காது. 18 முதல் 22 காரட் தூய்மை கொண்ட நகைகளுக்கு மட்டுமே கடன் வழங்கப்படும். நகைகளில் பதிக்கப்பட்டுள்ள கற்கள் மற்றும் முத்துக்களின் எடையைக் கழித்துவிட்டு, சுத்தமான தங்கத்தின் எடை மட்டுமே கணக்கில் கொள்ளப்படும் என்பதை நினைவில் கொள்ளுங்கள்.
4. 'புல்லட் ரீபேமென்ட்' முறையை தேர்ந்தெடுப்பது
தங்கத்தின் விலை திடீரென குறையும்போது, வங்கிகள் 'மார்ஜின் கால்' அனுப்ப வாய்ப்புள்ளது. அதாவது, குறையும் மதிட்டிற்கு ஏற்ப கூடுதல் பணம் செலுத்தவோ அல்லது கூடுதல் தங்கம் வைக்கவோ கோருவார்கள். ஒரே தடவையில் அசலையும் வட்டியையும் செலுத்தும் 'புல்லட் ரீபேமென்ட்' (Bullet Repayment) முறையைத் தேர்ந்தெடுப்பவர்களுக்கு இந்த ஆபத்து அதிகம். இதைத் தவிர்க்க மாதாந்திரத் தவணை (EMI) முறையைப் பின்பற்றுவது சிறந்தது.
5. வங்கி அறிவிப்புகளை அலட்சியப்படுத்துவது
நகைக்கடன்கள் பொதுவாக 3 முதல் 12 மாதங்கள் வரை குறுகிய காலத்திற்கே வழங்கப்படுகின்றன. பகுதித் தவணைகள் (Part payments), மாத வட்டி செலுத்தும் முறை அல்லது ஈ.எம்.ஐ என உங்கள் வருமானத்திற்கு ஏற்ற முறையைத் தேர்ந்தெடுக்கலாம். எதற்கும் மேலாக, வங்கியில் இருந்து வரும் குறுஞ்செய்திகள் அல்லது அழைப்புகளுக்கு உடனுக்குடன் பதிலளிப்பதன் மூலம் உங்கள் நகைகள் ஏலத்திற்குச் செல்வதை முழுமையாகத் தவிர்க்க முடியும்.
சுருக்கமாகச் சொன்னால், நகைக்கடன் என்பது இக்கட்டான கட்டத்தில் கைகொடுக்கும் ஒரு சிறந்த நிதியுதவியே தவிர, அது நிரந்தர வருமானமல்ல. கடன் வாங்கும் முன் வட்டி விகிதம், மறைமுகக் கட்டணங்கள் மற்றும் உங்கள் மாதாந்திரத் திருப்பிச் செலுத்தும் திறனை முழுமையாக ஆராய்ந்து செயல்படுவது அவசியம். இந்த விழிப்புணர்வுடன் திட்டமிட்டுப் பெற்றால், உங்கள் தங்கம் எப்போதும் பாதுகாப்பாக இருக்கும்; நிதிச்சுமையிலிருந்தும் எளிதில் மீண்டு வரலாம்.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
