Sunroof Car : ரூ.10 லட்சத்துக்குள் பனோரமிக் சன்ரூஃப் உடன் உள்ள தரமான SUV கார் பற்றி தெரியுமா?

SUV with panoramic sunroof : டாடா மோட்டார்ஸ் தனது நெக்ஸான் காரின் 10 லட்சம் யூனிட்கள் விற்பனையை கொண்டாடும் விதமாக, நெக்ஸான் ப்யூர்+ பிஎஸ் என்ற புதிய வேரியன்ட்டை அறிமுகம் செய்துள்ளது.

Image Credit : social media

SUV with panoramic sunroof

இந்திய சாலைகளில் டாடா நெக்ஸானின் ஆதிக்கம் தொடர்ந்து கொண்டிருக்கிறது. தனது சூப்பர்ஹிட் எஸ்யூவி காரின் 10 லட்சம் யூனிட்கள் விற்பனையை கொண்டாடும் விதமாக, டாடா மோட்டார்ஸ் நிறுவனம் நெக்ஸான் ப்யூர்+ பிஎஸ் என்ற புதிய வேரியன்ட்டை அறிமுகப்படுத்தியுள்ளது. இதன் மிகப்பெரிய சிறப்பம்சம், இதன் எக்ஸ்-ஷோரூம் விலை வெறும் ரூ.9.59 லட்சத்தில் இருந்து தொடங்குவதுதான். 10 லட்ச ரூபாய்க்கும் குறைவான விலையில் பனோரமிக் சன்ரூஃப் போன்ற ஒரு பிரீமியம் வசதியை வழங்கும் இந்தியாவின் முதல் கார் இதுவாகும். குறைவான பட்ஜெட்டில் பிரீமியம் வசதிகளையும் ஸ்டைலையும் விரும்பும் வாடிக்கையாளர்களுக்காக டாடா இதை வடிவமைத்துள்ளது. இந்த புதிய எஸ்யூவியின் சிறப்பம்சங்கள், இன்ஜின் மற்றும் விலை விவரங்களை விரிவாகப் பார்க்கலாம்.

Image Credit : official website

பலவிதமான இன்ஜின் ஆப்ஷன்கள்

டாடா நெக்ஸான் ப்யூர்+ பிஎஸ் மாடலை உங்கள் விருப்பத்திற்கு ஏற்ப பெட்ரோல், டீசல் அல்லது சிஎன்ஜி என மூன்று வேரியன்ட்களில் வாங்கலாம். இதன் பெட்ரோல் மாடலில், சக்திவாய்ந்த 1.2 லிட்டர் டர்போசார்ஜ்டு இன்ஜின் பொருத்தப்பட்டுள்ளது. டீசல் மாடலைப் பொறுத்தவரை, இது மிக அதிக மைலேஜ் தரும் கார்களில் ஒன்றாக இருக்கிறது. மேலும், டாடா நிறுவனம் தனது புகழ்பெற்ற "ட்வின்-சிலிண்டர்" டெக்னாலஜியுடன் சிஎன்ஜி ஆப்ஷனையும் வழங்கியுள்ளது. இந்த டெக்னாலஜி மூலம், சிஎன்ஜி சிலிண்டர்கள் இருந்தாலும் காரின் டிக்கியில் நல்ல இடவசதி கிடைக்கிறது.

Image Credit : tata motors

இம்புட்டு வசதிகளா?

வசதிகளைப் பொறுத்தவரை, இந்த புதிய வேரியன்ட் விலை அதிகமான கார்களுக்கு இணையான அம்சங்களைக் கொண்டுள்ளது. இதில் வாய்ஸ் அசிஸ்டன்ட் வசதியுடன் கூடிய பனோரமிக் சன்ரூஃப் உள்ளது. அதாவது, உங்கள் குரல் மூலமாகவே சன்ரூஃபை திறக்கவோ அல்லது மூடவோ முடியும். மேலும், காரின் உட்புறத்தை ஹை-டெக்காக மாற்ற, ஆண்ட்ராய்டு ஆட்டோ மற்றும் ஆப்பிள் கார்பிளே வசதியுடன் கூடிய 26.03 செ.மீ ஹார்மன் டச்ஸ்கிரீன் சிஸ்டம் கொடுக்கப்பட்டுள்ளது. இசை பிரியர்களுக்காக 6 ஸ்பீக்கர்கள் கொண்ட சவுண்ட் சிஸ்டமும் இதில் உள்ளது. பாதுகாப்பிற்காக, ஹெச்.டி ரியர்-வியூ கேமரா, ஆட்டோமேட்டிக் எல்இடி ஹெட்லேம்ப்கள் மற்றும் மழை வந்தால் தானாக இயங்கும் வைப்பர்கள் போன்ற ஸ்மார்ட் அம்சங்களும் இதில் அடங்கும்.

Image Credit : Tata Motors

டிசைன் மற்றும் இதர வசதிகள்

ஓட்டுநருக்கு சௌகரியமான பயணத்தை வழங்க, க்ரூஸ் கண்ட்ரோல் மற்றும் எலக்ட்ரிக் ORVM-கள் போன்ற வசதிகளை டாடா சேர்த்துள்ளது. தோற்றத்தைப் பொறுத்தவரை, கூபே போன்ற வடிவமைப்பு மற்றும் எல்இடி டெயில் லேம்ப்கள் சாலையில் மற்ற கார்களில் இருந்து இதை தனித்துக் காட்டுகின்றன. இந்த அறிமுக விழாவில் பேசிய டாடா மோட்டார்ஸின் தலைமை வர்த்தக அதிகாரி விவேக் ஸ்ரீவத்ஸவா, "நெக்ஸான் இந்தியாவின் நம்பர் 1 எஸ்யூவி. இப்போது பத்து லட்சத்திற்கும் அதிகமான குடும்பங்களின் ஒரு பகுதியாக மாறியுள்ளது. அனைத்து பட்ஜெட் வாடிக்கையாளர்களுக்கும் சிறந்த பாதுகாப்பு மற்றும் நவீன வசதிகளை வழங்குவதே எங்கள் நோக்கம்," என்று கூறினார்.

வேரியன்ட் வாரியான விலை விவரம் (அனைத்து விலைகளும் எக்ஸ்-ஷோரூம் விலைகள்)

பெட்ரோல் மேனுவல்: ரூ.9.59 லட்சம்

பெட்ரோல் ஆட்டோமேட்டிக் (AMT): ரூ.10.14 லட்சம்

சிஎன்ஜி: ரூ.10.39 லட்சம்

டீசல் மேனுவல்: ரூ.10.54 லட்சம்

டீசல் ஆட்டோமேட்டிக்: ரூ.11.19 லட்சம்